Salmos 128 - Biblia Enxet

Wesse' egegkok sempasmo

¹ Apkeleñémo exchep apcháyo nak chá'a Wesse' egegkok, tén han apkelyaheykekxoho nak chá'a.

² Etwok sa' chá'a ekyánmaga aptamheykha, kapayhekxak sa' apwáxok, tásek sa' nahan chá'a katnehek ekteyapma aqsok apkelane.

³ Máxa anmen yámet ekxámokma ekyexna sa' katnehek xép aptáwa' m'a kañe' apxagkok nak; máxa olivo éltekteyapma sa' katnehek kaxmakha apketchek ma'a nekha mésa apagkok.

⁴ Sa' etnéssesek epasmok Wesse' egegkok ma'a énxet apcháyo nak chá'a.

⁵ ¡Epasmok sa' xép Wesse' egegkok, cham'a aphamakxa nak egkexe Sión! ¡Étak sa' ektaqmeleykekxa m'a Jerusalén, yókxoho ekhem neyseksa apha!

⁶ ¡Elwethok sa' ma'a aptawán'ák nak! ¡Keytek sa' chá'a meyke ektáhakxa negha m'a Israel!