Salmos 126 - Biblia Enxet

¡Yána katnekxak makham negheykha ektémakxa axta nano'!

¹ Xama axta aptemessáseykekxo makham Wesse' egegkok Sión ma'a ektémakxa axta nano', máxa negwanmagko axta temék.

² Néllektegmeykha egagko' axta, nélwóncháseykha axta élpayheykekxo egwáxok; keñe axta melya'áseyak nak Dios aptáha apkelpaqmeta s'e: “¡Apkelánessek ekyawe agko' aqsok Wesse' apagkok xa énxet'ák nak!”

³ Naqsók senlánéssama aqsok élyawe m'a Wesse' egegkok, kelpayheykekxeyk axta egwáxok.

⁴ ¡Wesse', henteméssásekxa makham negko'o m'a sentémakxa axta, ektémól'a ekmámeye kayaqmagkasek ektémakxa m'a ekyamáyekxa nak xapop!

⁵ Énxet apkeneykekxa nak aqsok yetlo apaqtek égmenek, enakxek sa' aqsok ekyexna yetlo apwóncháseykha ekpayheykekxa apwáxok.

⁶ Elekxagwaha sa' eykhe neyseksa apseykha aqsok aktek éltaqmalma, éxyamok sa' eyke enneykmásenták kapayhekxak apwáxok, yetlo apkelpatheteykenta hótáhap apaktek kélyaqténma kélpextéteykekxa'.