Salmos 124 - Biblia Enxet

Dios apkelwagkasso teyp énxet'ák apagkok

¹ Kólteme sa' kólpaqmétek se'e Israel: Axta agkok negko'o hempasmak Wesse' egegkok,

² axta agkok negko'o hempasmak Wesse' egegkok, cham'a sẽlenmexa axta negko'o énxet'ák peya hegketámegma',

³ hensawhohok axta hẽlnápok, sẽltaqnaweygko apagko' enxoho negko'o.

⁴ Hẽlsók axta han ma'a yegmen; ¡hegápekxak axta han negko'o m'a wátsam!

⁵ ¡Hẽlweykesagkok axta hegápekxak negko'o m'a yegmen élyaqyahayam élyawe!

⁶ ¡Tásek sa' chá'a katnehek apxénamap Wesse' egegkok, eñama megyahayo henteméssesek nekha'a egketkók hẽltakxagkok ma'a nélenmexma!

⁷ Ẽlegketchek negko'o kelhanma, ektémól'a náta kagketek ma'a ektáha nak aptegye; kelekkexáxcheyk ma'a kelhanma, keñe negko'o sẽlegketákxo.

⁸ Wesse' egegkok chá'a kañék sempasmo, apkelane nak néten, tén han keso náxop.