Salmos 123 - Biblia Enxet

Nélmaxnagko magya'ásseyam Dios

¹ Wesse', énmexawok ko'o exchep aphakxa sekwóneyncha'a, énmexawok ma'a aptémakxa nak Wesse' apwányam néten.

² Nélenmexawók negko'o aphakxa exchep negwóneyncha'a Wesse', Dios egagkok, aptémól'a elanha apmék wesse' apagkok ma'a apkeláneykha, ektémól'a kalanha ámek wesse' agkok ma'a éláneykha, nélhaxanma negko'o kapyóshok henlano'.

³ Wesse', kapyósho henlanok negko'o; kapyósho negko'o henlano', hakte massék negko'o nélenmáxexko sẽlxéneykha ekmaso.

⁴ ¡Ẽlleklámeykegkek sẽlya'ásseyam ma'a kelwesse'e nak, tén han sẽlwanyeykha m'a apkeleymákpoho nak!