Salmos 122 - Biblia Enxet

Jerusalén ektaqmeleykha apxénamap

¹ ¡Kapayhekxa nak la'a chá'a ko'o ewáxok kéltáha enxoho hélának se'e: “Ólmeyekxak Wesse' egegkok tegma appagkanamap apagkok!”

² Jerusalén, ¡nélántaxneyk kaxwók kañe' apwáxok!

³ Jerusalén, tegma apwányam apkelánamap nak yaqwayam yaqnekxak kañe' m'a énxet'ák.

⁴ Cha'a apkelmeyeykentamxa chá'a Wesse' egegkok énxet'ák apagkok, yaqwayam elpeykeshok ma'a apwesey, apkelánémakpexa axta etnahagkok ma'a énxet'ák Israel.

⁵ Cháxa ekyetnamakxa sẽlyekpelchémókxa kélláneseykekxexa nak apheykha énxet'ák, apheykegkaxa nak kelwesse'e apkelwányam Israel, David aptawán'ák neptámen.

⁶ Kólteme kólmaxnak se'e: “Méko sa' katnehek ektáhakxa Jerusalén; tásek sa' katnehek apkelweynchámeykha m'a ektáha nak chá'a apchásekhayo.

⁷ Méko sa' katnehek ektáhakxa m'a kañe' nak kélhaxtegkesso nepyáwa'; méko sa' han katnehek ektemegweykmoho exma m'a kelwesse'e apagkok apxanák nak.”

⁸ Sa' atnehek ko'o alának kaxwók élyáxeg'a, tén han énámakkok se'e: “Keytek sa' meyke ektáhakxa kélheykha kéxegke.

⁹ Almaxnéssesek sa' ko'o exchep wának kataqmelek apha, eñama seyásekhayo Wesse' Dios egagkok nak tegma appagkanamap apagkok.”