Salmos 12 - Biblia Enxet

Nélmaxnagko néltémo hempasmok Dios

¹ Wesse', hẽlwagkas negko'o teyp, hakte méko aptáhak ma'a énxet'ák apteme nak melya'ásseyam meyenyaweykha nak xép; méko han aptáhak ma'a ekpéwomo nak apkeltémakxa.

² Elyexanchesha aqsa chá'a pók; atsek chá'a katnehek apkelpeywa háwe eyke naqso', eyaqmagkasek chá'a mók ektáhakxa apkelpeywa.

³ Wesse', emasséssamho apagko' ma'a apkelxeyenma nak chá'a meltemegweykmoho exma, tén han ma'a éleymáxkoho nak chá'a apkelpaqméteykha,

⁴ apteme nak chá'a elpaqmétek se'e: “Egwancha'ak negko'o nélpeywa yaqwayam hegwetaksek aqsok, hẽlwagkasek chá'a teyp nélpeywa. ¿Yaqsa awanchek negko'o hẽlxekmósagkok?”

⁵ Aptáhak appeywa Wesse' egegkok se'e: “Kélnaqtawáseykegkók ma'a meyke nak aqsok apagkok, kéllegassáseykegkók ma'a apkelyelqamákpoho nak. Cháxa keñamak peya nak ko'o wampekxak néten, apasmok sa' ekhawo ektémakxa nak chá'a apkelmopmenyého.”

⁶ Naqsók agko' ma'a apxeyenma nak Wesse' egegkok, cháxña'awók agko', ¡máxa m'a sawo ekmope ekmomnáwa agko' la'a, kéltemél'a siete kélháneykekxa'!

⁷ Wesse', xép sa' hẽltaqmelchesek negko'o; ¡hẽltaqmelchesek sa' chá'a nepyeseksa xa aptéma nak énxet!

⁸ Yókxoho yókxexma apkelweynchámeykha m'a élmasagcha'a nak apkeltémakxa, apyókxoho énxet'ák han leklamók apkelwáxok ma'a nentémakxa ekmaso.