Salmos 118 - Biblia Enxet

Awanhek apmopwána Wesse' egegkok

¹ Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.

² Sa' etnehek chá'a énxet'ák Israel se'e: “Megkamassegwomek segásekhayo Wesse' egegkok.”

³ Sa' etnehek chá'a apkelmaxnéssesso Dios énxet'ák apagkok se'e: “Megkamassegwomek segásekhayo Wesse' egegkok.”

⁴ Sa' etnehek chá'a apcháyo nak chá'a Wesse' egegkok se'e: “Megkamassegwomek segásekhayo Wesse' egegkok.”

⁵ Ekwóneykha axta ko'o Wesse' egegkok ma'a ekyentaxnama axta setnamakxa', aplegayak axta ko'o sélmaxnagko, tén axta semallahanchessama.

⁶ Wesse' egegkok apteme ko'o sekxegexma; méko seyekakxa'. ¿Háxko apwanchek ko'o hetnéssesek énxet?

⁷ Wesse' egegkok apteme ko'o sekxegexma; cha'a sepasmo chá'a m'a. ¡Atagkohok sa' ko'o emenxenakpok ma'a aptáha nak chá'a setaqnagko!

⁸ Tásek antéhek negáyo Wesse' egegkok, kaxnók antéhek negáyo énxet.

⁹ Tásek antéhek negáyo Wesse' egegkok, kaxnók antéhek negáyo m'a énxet'ák ekyawe nak kéláyo.

¹⁰ Ewakhayak ko'o apyókxoho pók aptémakxa énxet'ák, makke hexnémók eñama Wesse' egegkok apwesey.

¹¹ Ewakhayók apagko', makke hexnémók eñama Wesse' egegkok apwesey.

¹² Máxa kenáwet aptemék sewakhaya, massegweykmek eyke aqsa m'a apkello nak, máxa m'a ektémól'a kalmétek yámet ekha nak am'ák, ¡makke hexnémók eñama Wesse' egegkok apwesey!

¹³ Eyhegamchek axta ekyennaqte agko' apmáheyo hetegkesek, ey'eykekteyk axta eyke Wesse' egegkok sepasmoma.

¹⁴ Anneykmásseshok chá'a ko'o Wesse' egegkok, segkésso nak sekyennaqte. ¡Cha'a apteme ko'o Sewagkasso teyp ma'a!

¹⁵ Legáxcheyk kélmeneykmasso negmallane apxanák ma'a énxet'ák apkelpéwomo: “¡Wesse' egegkok apmopwána keñamak apkelmallana!

¹⁶ ¡Méko ekhawo m'a Wesse' egegkok apmopwána! ¡Wesse' egegkok apmopwána keñamak apkelmallana!”

¹⁷ ¡Aweynchamha sa' chá'a ko'o, magwatsepe', yaqwayam axének chá'a ko'o aqsok apkelane m'a Wesse' egegkok!

¹⁸ Eñássáseykegkók ekyentaxno agko' Wesse' egegkok, makke yahayók watsapok.

¹⁹ Hélmeykessesák ko'o atña'ák ma'a tegma appagkanamap, atxek sa' ko'o agkések ekxeyenma ewáxok Wesse' egegkok.

²⁰ Cháxa Wesse' egegkok átog apagkok xa, sa' elántexek chá'a m'a élpéwomo nak chá'a apkeltémakxa.

²¹ Wesse', ekméssek ko'o exchep ekxeyenma ewáxok, hakte eyátegmoweykegkokxeyk xép, apteme han sewagkasso teyp.

²² Tamhákxeyk kaxwók meteymog kélmámenyého kólmaha m'a apyetnakhasso axta apkeláneyak nak tegma.

²³ Cháxa apkelane axta Wesse' egegkok xa, kelpayhekxeyk agko' axta negko'o egwáxok negwet'a.

²⁴ Cháxa ekhem apkelanakxa axta aqsok Wesse' egegkok: ¡kalpayhekxa hana egwáxok sakhem, ólátsaha!

²⁵ Wesse', ¡hẽlwagkas negko'o teyp! Wesse', ¡yána kataqmelek negheykha!

²⁶ ¡Tásek sa' chá'a katnehek apxénamap xa apwa'a nak Wesse' egegkok apcháphasso! Nélmaxnéssessek negko'o kéxegke neyseksa nenchaqneykha s'e Wesse' egegkok tegma appagkanamap apagkok néltamho etaqmelchessesek kélheykha.

²⁷ Wesse' egegkok apteme Dios; ¡sẽlsássesso exma! Kólxegkes heykxa kélessawássessamo, kólsakxa yámet aktegák ekweykekxoho kélwákxo m'a élámhakxa nak nekhaw'ék ma'a ekwatnamáxchexa aqsok.

²⁸ Ekméssek ko'o exchep ekxeyenma ewáxok, ekteméssessegkek han eyeymáxkoho m'a ektémakxa nak apteme apwányam apagko', hakte xép apteme Dios ahagkok.

²⁹ Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.