Salmos 113 - Biblia Enxet

Ektaqmeleykha nempeywa anxének Wesse' egegkok eñama ektaqmalma apwáxok

¹ ¡Aleluya! ¡Kólpeykesho chá'a apwesey Wesse' egegkok! kéxegke apkeláneykha nak.

² ¡Tásek sa' chá'a katnehek ekxénamaxche Wesse' egegkok apwesey, kaxwo' nak, tén han megkatnégwayam néxa!

³ ¡Kólpeykeshok sa' chá'a Wesse' egegkok apwesey eyeynamo m'a teyapmakxa ekhem, ekweykekxoho m'a taxnegwánxa ekhem!

⁴ Wesse' egegkok apteme néten agko' nepyeseksa m'a apyókxoho énxet'ák; ¡yetnegkek apcheymákpoho m'a teyp yaphope nak!

⁵ Méko ekhawo m'a Dios, Wesse' egegkok, aptéma nak Wesse' apwányam ma'a aphakxa nak néten;

⁶ yaháxek eyke chá'a yenmexentámhok elanok yaphope, tén han náxop.

⁷ Yempásekxak chá'a Wesse' egegkok náxop ma'a meyke nak aqsok apagkok, etekkesek chá'a aphamakxa ekmaso m'a ekhakxa nak chá'a eyéméxchexa aqsok,

⁸ exnéssekxak ma'a nepyeseksa nak énxet ekha kéláyo, cham'a nepyeseksa nak énxet'ák apagkok ekha kéláyo.

⁹ Epeykessásekxak chá'a awáxok kelán'a megkate nak étchek egkések étche, tén han egkések chá'a axagkok agkok agko'. ¡Aleluya!