Salmos 11 - Biblia Enxet

Magya'ásseyam Wesse' egegkok

¹ Ekye'eykekxeyk ko'o sekyexánegweykekxo m'a Wesse' egegkok. Kaqhok katnehek amya'a wánéxchek se'e: “Emhók exyenmok ma'a élámhakxa nak meteymog, ektémól'a náta.

² Kóllano énxet'ák élmasagcha'a nak apkeltémakxa: apkelmátchessegkek yágke apagkok apmáheyo elhaxtaqpog elyátak ma'a énxet'ák meyke nak apkeltémakxa, cham'a apkelyexanmomakxa nak.

³ Apnaqtawáseykpek agkok ma'a ekyennaqwákxexa nak chá'a nepyeseksa énxet'ák, ¿yaqsa elának ma'a énxet meyke nak aptémakxa?”

⁴ Apheyk Wesse' egegkok ma'a tegma appagkanamap apagkok aptaqmalma nak. Appekkenmeyk aphamakxa Wesse' egegkok ma'a néten nak, apsawheykha exma apkeláneykencha'a ektémakxa apkelweynchámeykha énxet'ák.

⁵ Elanok chá'a Wesse' egegkok ma'a apkelpéwomo nak, tén han ma'a élmasagcha'a nak apkeltémakxa, etaqnawhok apagko' chá'a m'a apkelmopmenyého nak elyennaqtésha apyempe'ék.

⁶ Yahak sa' Wesse' egegkok átex, táxa tén han aqsok eyáléwomól'a m'a énxet'ák élmaso nak apkeltémakxa, yahak sa' éxchahayam yaqwayam sa' kalwatnek ma'a apyókxoho nak. ¡Ellegássesagkohok sa' Wesse' egegkok ekpayhawo nak etnéssesek!

⁷ Wesse' egegkok apteme appéwomo, tén han apchásekhayo m'a aqsok ekpéwomo nak, ¡cháxa keñamak peya sa' elwetak apaqta'ák apagko' ma'a meyke nak apkeltémakxa!