Salmos 109 - Biblia Enxet

Néltémo hempasmok segyekpelchémo meyke nak ekhémo

¹ Oh Dios, ná ewanma aqsa chá'a sélmaxneya enxoho chá'a,

² asagkek chá'a ko'o sexéneykha m'a énxet'ák apkelmopwancha'a nak amya'a, tén han élmasagcha'a nak apkeltémakxa, wanchek amya'a m'a aptémakxa nak chá'a ko'o sexéneykha.

³ Kallágwaták chá'a apkelpaqmeyesma sekhakxa, ¡hektámenták chá'a meykexho sektáhakxa!

⁴ Alásekhohok eykhe chá'a ko'o m'a, hektámenták aqsa chá'a; almaxnéssesagkok eyke chá'a ko'o.

⁵ Ekmaso chá'a apyaqmagkáseykekxak sekteméssessamakxa ektaqmela, alásekhohok eykhe chá'a, hetaqnók aqsa chá'a.

⁶ Etnésses xama énxet ekmaso aptémakxa apkelyekpelchémo chá'a, elsexnáneyekxohok sa' chá'a apagko' ma'a apkelánekxésso nak chá'a amya'a;

⁷ elxénakpok sa' chá'a apsexnánémap ma'a kélyekpelchémokxa nak chá'a; magya'assáxma sa' kóltemessásekxak ma'a apkelmaxneyéyak nak.

⁸ ¡Yaqwatakxoho agko' sa' elweynchamha, pók énxet sa' elmekxak ma'a aqsok apagkok nak!

⁹ ¡Apkelyéheykha sa' etnehek ma'a apketchek, tampe' sa' katnehek ma'a aptáwa'!

¹⁰ ¡Elweynchamha sa' aqsa m'a apketchek, elmaxneyha sa' chá'a aptéyak ma'a énxet'ák! ¡Kólántekkesek sa' ma'a apxanák apmopsagcha'a nak!

¹¹ Elsakxak sa' ekyókxoho aqsok apagkok ma'a apmássáseykha nak chá'a selyaqye apagkok. Elyementamok sa' apwete nak chá'a eñama aptamheykha m'a énxet'ák melweteya nak.

¹² Méko sa' kapyóshok kalano', tén han ma'a apketchek apkelyéheykha nak.

¹³ Esawhakpohok sa' eletsapok ma'a aptawán'ák neptámen, kamassegwomhok agko' sa' apwesey.

¹⁴ Kaxénwakxohok sa' apwáxok Wesse' egegkok aptémakxa ekmaso axta apyáp, memasséssesek sa' aqsa han chá'a megkay'assáxma m'a egken;

¹⁵ kaxének sa' nahan chá'a apwáxok Wesse' egegkok aptémakxa m'a, emasséssesek sa' apxénamap keso náxop.

¹⁶ Axta ey'áseykegkok ektémakxa apmopyósa anlanok egmók; apkelyetleykha axta chá'a m'a meyke nak aqsok apagkok, tén han ma'a apkelyelqamákpoho nak, tén han ma'a ekyentaxnamo nak apheykha, ekwokmoho apkelnapma.

¹⁷ ¡Tásek kólának katnégwomhok exma ekmaso, hakte apmenyeyk katnehek xa ektáha nak, nágkólana kataqmelek apha hakte mopmenye'!

¹⁸ Kápok sa' ekmaso apha ektémól'a negaqlamaxche', kalántexek sa' apexchakkok tén han apwáxok, ektémól'a vino essenhan pexmok égmenek;

¹⁹ ¡kápok sa' ektémól'a antaxnekxak nentaxno, kayaqhápok sa' ektémól'a nentétamáxche kayaqhápok nenxet!

²⁰ ¡Sa' etnéssesek Wesse' egegkok eyaqmagkásekxak setnéssessamakxa m'a sélenmexma, tén han sexéneykha nak chá'a ekmaso!

²¹ Xép eyke Wesse', hetaqmelches eñama apmasma apwesey. ¡Hewagkas teyp, eñama m'a segásekhayo nak!

²² Méko agko' ko'o aqsok ahagkok, yentexek han sekha, legeykegkók ewáxok,

²³ taqmelcháseykegkók ko'o sekmáheyo amassegwók, ektémól'a pessesse, ¡éttelegwáseykegkek éxchahayam aptémól'a sawa'!

²⁴ Kelyawheykha etapnák eñama mato sekto; ekyamhagkamchek eñama meyke sekto.

²⁵ ¡Ellektegmaha chá'a hélanok énxet'ák! ¡Elyeykesha chá'a apqatkok hey'ássók sét'a enxoho!

²⁶ Wesse', Dios ahagkok, hepásem ko'o; ¡hewagkas teyp eñama segásekhayo!

²⁷ Elya'ásegwók sa' apteme exchep xa ektáha nak sewagkasso teyp Wesse'.

²⁸ Eltamhok sa' eykhe chá'a hetnégwomhok exma ekmaso, méko katnehek, hakte etaqmelchessegkek chá'a exchep. Elmegqágwakxak sa' ma'a apyókxoho nak, keñe sa' ko'o sektáha nak xép apkeláneykha kapayhekxak ewáxok.

²⁹ ¡Elmegqáwhok apagko' sa' ma'a sélenmexma nak. ¡Kápok sa' apkelmegqakto, aptémól'a kélaqlamaxche'!

³⁰ Malwátéssemek sa' chá'a ko'o apaqmétek agkések ekxeyenma ewáxok Wesse' egegkok; ¡alpeykeshok sa' chá'a nepyeseksa apxámokma apagko' énxet'ák!

³¹ Hakte apmasmeyk ma'a meyke nak aqsok apagkok, apwagkassegkek teyp nepyeseksa m'a apmáheyo nak yaqhek.