Salmos 107 - Biblia Enxet

LIBRO 5 (Salmos 107—150 ) Megkayetyapwágwomek segásekhayo Wesse' egegkok

¹ Kólmés ekxeyenma kélwáxok Wesse' egegkok, hakte tásek apwáxok ma'a, megkamassegwomek chá'a segásekhayo.

² Kólteme xa, ektáha axta apkelwagkasso teyp Wesse' egegkok, apkelwagkassama axta teyp apkelmoma m'a kélenmexma nak,

³ apnaqlósaweykekxo axta m'a apkelókxa nexcheyha, nepyeyam, teyapmakxa ekhem, tén han taxnegwánxa ekhem.

⁴ Apkelweynchámeykha axta aqsa melya'áseyak ma'a yókxexma meykexa nak énxet, ekyentaxnamakxa nak yagkamex, meyke apkelwetágwayam ámay ekmahéyak tegma apwányam yaqweykenxa exmakha;

⁵ hem axta kelnapmak, tén han meyk, ¡ketók axta apkeletsapmakxa!

⁶ Apkelwóneykha axta eyke Wesse' egegkok ekyentaxnama apheykha, apkelmallahanchessek axta m'a ektémakxa apkellegeykegkoho.

⁷ Tén axta apkelya'ásekxo ektaqmelakxa ámay ekmahéyak ma'a xama tegma apwányam yaqwánxa exmakha.

⁸ Kólmés ekxeyenma kélwáxok Wesse' egegkok, eñama segásekhayo, ¡tén han apkelánésso chá'a aqsok éltaqmalma appasmo m'a énxet'ák!

⁹ Hakte emasséssesek chá'a élnapma hem ma'a hem élnapma nak, eyeykhássessamhok chá'a nento éltaqmalma m'a meyk át'ák nak.

¹⁰ Apheykha axta neyseksa ekyaqtéssamakxa agko' exma, negmomaxchexa' eklegeykegkaxa nak egwáxok, tén han cadenas,

¹¹ eñama apkenmexeykekxa m'a apkeltémókxa axta chá'a etnahagkok Wesse' egegkok, tén han apkeltaqnagko m'a apmáheyókxa axta chá'a etnehek ma'a Meyke nak Ekhémo.

¹² Apméssegkek axta ekyentaxno agko' apkeltamheykha m'a Dios; apkelpelápeykmek axta chá'a, méko axta han chá'a ekpasmoma.

¹³ Apkelwóneykha axta eyke Wesse' egegkok ekyentaxnama apheykha, apkelmallahanchessek axta m'a ektémakxa apkellegeykegkoho;

¹⁴ apkelántekkessegkek axta m'a neyseksa ekyaqtéssamakxa agko' nak exma, apkelyétekkessessegkek axta han cadenas.

¹⁵ Kólmés ekxeyenma kélwáxok Wesse' egegkok, eñama segásekhayo, ¡tén han apkelánésso chá'a aqsok éltaqmalma appasmo m'a énxet'ák!

¹⁶ ¡Nekha'a étkók axta aptemessáseykekxak ma'a atña'ák élánamáxche nak sawo ekyexwase! ¡Apkelekkexeykekxeyk axta m'a sawo kélápeykekxa nak chá'a átog!

¹⁷ Apkelháxamákpek axta eñama apkeltémakxa ekmaso, kellegeykegkok axta apkelwáxok eñama apkeltémakxa melya'assáxma,

¹⁸ massegkek axta ekmátsa apkelányo ekyókxoho aptéyak; ¡ketók axta han apkeletsapmakxa!

¹⁹ Apkelwóneykha axta eyke Wesse' egegkok ekyentaxnama apheykha, apkelmallahanchessek axta m'a ektémakxa apkellegeykegkoho;

²⁰ apcháphássessegkek axta appeywa, tén axta apkeltaqmelcháseykekxo; ¡apkelmallahanchessegkek axta nétsapmakxa!

²¹ Kólmés ekxeyenma kélwáxok Wesse' egegkok, eñama segásekhayo, ¡tén han apkelánésso chá'a aqsok éltaqmalma appasmo m'a énxet'ák!

²² Kólmés kélnaqtósso kélnapma kélmésso nak ekxeyenma kélwáxok, kólxén yetlo ekpayheykekxa kélwáxok ma'a aqsok apkelane nak.

²³ Apkelxegamchek chá'a neyseksa wátsam ekwányam ma'a apkelyánmagkásamap nak chá'a. Apkelxegkessegkek chá'a yántakpayhe apagkok ma'a neyseksa nak yegmen,

²⁴ apkelwetágweykmek chá'a aqsok éltaqmalma nak apkelane Wesse' egegkok ma'a neyseksa wátsam ekwányam.

²⁵ Appeywa axta chá'a etekkesek Wesse' egegkok éxchahayam ekyennaqte, élnextegkessamo axta chá'a élyawe élyaqyahayam;

²⁶ kalya'ásekxak axta chá'a ekweykekxoho m'a néten, tén axta kalweykásenták chá'a ekweykekxoho m'a kañók agko' nak wátsam ekwányam; ¡kelyélaqtéssegkek axta apkelwáxok eñama ektémakxa apkelwete!

²⁷ Máxa anmen át'ák axta aptamheykegkok apkelyawheykencha'a; ¡mékoho axta tamheykekxak ma'a ektémakxa axta apkelmopwancha'a aqsok!

²⁸ Apkelwóneykha axta eyke Wesse' egegkok ekyentaxnama apheykha, apkelmallahanchessek axta m'a ektémakxa apkellegeykegkoho;

²⁹ apweykásenteyk axta m'a éxchahayam ekyennaqte nak, massék axta han ma'a élyaqyahayam élyawe nak.

³⁰ Xama axta apkelwet'a ekmassa élyaqyahayam, kelpayhekxeyk axta apkelwáxok, apkelwagkassek axta Dios ma'a ekhagweykekxexa yántakpayhe, apkeltamhókxa axta elwakxa'.

³¹ Kólmés ekxeyenma kélwáxok Wesse' egegkok, eñama segásekhayo, ¡tén han apkelánésso chá'a aqsok éltaqmalma appasmo m'a énxet'ák!

³² ¡Kólxén chá'a apteme apwányam apagko' apchaqnákxo enxoho chá'a énxet'ák! ¡Kólpeykesho chá'a m'a apchaqnákxexa enxoho apkelámha amonye'e!

³³ Etnessásekxak chá'a Wesse' egegkok yókxexma meykexa énxet ma'a wátsam, Keñe chá'a ekteyapmakxa yegmen etnessásekxak ma'a ekyamáyekxa nak xapop;

³⁴ yásek xapop chá'a etnessásekxak ma'a xapop ektaqmalma nak, eñama ekmaso apkeltémakxa m'a apheykha nak awáxok;

³⁵ ságe chá'a etnessásekxak ma'a yókxexma meykexa nak énxet, keñe chá'a ekteyapmakxa yegmen ma'a ekyamáyekxa nak xapop;

³⁶ exnésha chá'a meyk át'ák ma'a, elanagkok chá'a tegma apkelyawe apagkok ma'a.

³⁷ Eknekxak chá'a aqsok namyep, eknagkok chá'a anmen yámet, enakxek chá'a ekyexna ekxámokma agko'.

³⁸ Etaqmelchessesek chá'a apheykha m'a, yának chá'a exámekxa', tén han kaxámekxak agko' ma'a aqsok apnaqtósso.

³⁹ Apkeletsekkek agkok chá'a, tén han aptamhákxo enxoho apqántawo', eñama kélnaqtawáseykegkoho, essenhan kéltawassáseykha apheykha, tén han apkellegeykegkoho,

⁴⁰ mékoho chá'a etnessásekxak Dios ma'a ektáha nak chá'a apnaqtawáseykegkoho, yának chá'a elweynchamha meyke apkelya'áseyak ma'a yókxexma meykexa nak énxet, meykexa nak ámay.

⁴¹ Emassésseshok chá'a ekmaso apheykha m'a meyke nak aqsok apagkok, ¡exámassásekxak chá'a apnámakkok ektémól'a kélnaqtósso!

⁴² Kalpayhekxak chá'a apkelwáxok énxet'ák meyke nak apkeltémakxa apkelwet'a enxoho xa, keñe chá'a elwanmeyagkok ma'a élmasagcha'a nak apkeltémakxa.

⁴³ Énxet apya'áseykegkoho nak aqsok, kéméxcheyk ey'asagkohok xa, tén han ey'asagkohok segásekhayo m'a Wesse' egegkok.