Salmos 104 - Biblia Enxet

Nélpeykessamo apteme nak senlane

¹ ¡Alpeykeshok sa' chá'a ko'o Wesse' egegkok ekweykmoho kañók agko' ewáxok! ¡Apwányam apagko' xép, Wesse', Dios ahagkok! Aptaxneykekxeyk apcheymákpoho, tén han apkelyenma, ektémól'a nentaxno;

² apchaqlamakpek élseyéxma, ektémól'a negaqlamaxche'. ¡Appeykessegkek xép néten ektémól'a apáwa kélapmal'a!

³ ¡Apkeláneyak apxagkok ma'a néten yegmen nak, cham'a netno' nak! Apchánte aptamheykekxak ma'a yaphope nak; ¡exog chá'a neyseksa éxchahayam!

⁴ Apteméssessegkek chá'a apkelápháseykha m'a éxchahayam, keñe chá'a táxa eyáléwe m'a apkeláneykha nak.

⁵ Appekkenmeyk axta xapop néten ma'a awhak ekyennaqtéssamakxa nak, yaqwayam enxoho megkaltaqheykha m'a ekyetnamakxa nak.

⁶ Chapmeyk axta wátsam ekwányam ekmattawóneg ma'a xapop, ektémól'a nentaxno. Chapmeyk axta yegmen ma'a meteymog élwenaqte nak.

⁷ Appaqhetchessegkek axta eyke exchep, keñe élxegama; yetlómok axta ényehéyak eklegaya appeywa éxtegyawà.

⁸ Kelápxegmeyk axta m'a egkexe, keñe élweweykento m'a élyapwátegweykenxa nak xapop, kelmaheykegkek axta m'a apkeltémókxa axta kalmahagkok,

⁹ cham'a néxa axta apkeltémókxa megkamalláne', yaqwayam enxoho megkápekxók chá'a m'a xapop.

¹⁰ Aptekkessegkek xép yegmen ma'a élánteyapmakxa nak yegmen, apkelya'áseykekxo m'a wátsam, ényahama nak neyseksa meteymog élekhahéyak.

¹¹ Cháxa ekyeneykegko nak chá'a aqsok nawha'ák xa yegmen nak; cháxa ekmasséssama nak chá'a hem élnapma m'a yámelyeheykok nawha'ák.

¹² Kelyáqtegkek neyáwa wátsam éláneykegko axanák ma'a náta; ¡cha'a élpáwomakxa chá'a m'a neyseksa aktegák nak yenta'a!

¹³ Xeyep chá'a apkelexpaqhéyak yegmen ma'a egkexe, cham'a apxagkok, aphamakxa nak netnók agko'; apméssegkek chá'a exchep ektaqmalma xapop apméssama m'a ekmámeye.

¹⁴ Aptekkessegkek chá'a pa'at yaqwayam katawagkok aqsok nawha'ák, tén han aqsok apkeneykekxa énxet, yaqwayam étak apto,

¹⁵ nento ekméssamo nak chá'a apyennaqte, tén han vino, ekpeykáseykekxoho nak chá'a apwáxok, eyátsessáseykhal'a chá'a nápat, ektémól'a pexmok égmenek.

¹⁶ Kaxek chá'a yegmen élámhakxa m'a yenta'a élyawe, cham'a yámet cedros élámha nak Líbano, apkeneykekxa nak Wesse' egegkok,

¹⁷ cham'a éláneykegkaxa han chá'a axanák nátétkók ma'a, keñe han chá'a seyána kalyagqak ma'a néten nak yámet élyawe pinos.

¹⁸ Yát'ay apkelyáqtamakxa m'a néten egkexe nak chá'a, keñe m'a neyseksa meteymog nak, élyexanmomakxa chá'a m'a yekpa'.

¹⁹ Apkeláneyak axta exchep pelten yaqwayam elyetsetagkok chá'a ekhem; ya'ásegkók han chá'a ekwánxa katxek ma'a ekhem.

²⁰ Eyáqtéssesek chá'a exchep, keñe chá'a katnehek axta'a, keytlawhok han chá'a élánteyapma m'a aqsok nawha'ák élleykha nak naxma.

²¹ Kalpáwha chá'a awáxok kategyagkok ekyógkexma m'a yámakméwa; kalmaxnak chá'a Dios ma'a ektéyak.

²² Keñe ektepa enxoho chá'a ekhem, kaltaqhekxak chá'a, kaxnagwakxak chá'a m'a axanák nak meteymog áxwa.

²³ Keñe etyapok chá'a énxet etneykha, ekweykmoho ekyáqtésa.

²⁴ ¡Wesse', xamók agko' xép aqsok apkelane! Yetlo apya'áseykegkoho apkelanék ma'a ekyókxoho nak; ¡sawheykekxók ekyókxoho xapop ma'a aqsok apkelane!

²⁵ Cháxa ekyetna wátsam ekwányam ekyawe ekpayhakxa, élleykegkaxa nak ma'a ekxámokma aqsok nawha'ák, élyawe, tén han keyetse nak;

²⁶ cha'a élweynchámeykegkaxa yántakpayhe m'a, cha'a ekyetnamakxa yegmen askok ekyawe Leviatán ma'a, apkeláneya axta yaqwayam eneykesha chá'a.

²⁷ Kaleyxek chá'a exchep elagkok ektéyak xa ekyókxoho nak, cham'a ekmayhágko enxoho chá'a.

²⁸ Elmések chá'a exchep, keñe kalmagkok chá'a; apkelméssek agkok chá'a, kalyaqkanmekxohok chá'a ektéyak ektaqmela;

²⁹ massék agkok chá'a exchep apkelano, kalyegweyk chá'a; apyementamákxeyk agkok élennama, kaletsapok chá'a, xapop chá'a katnekxa'.

³⁰ Apméssek agkok ma'a apkennama segméssamo nak negyennaqte, eyke peya kalanaxchek ma'a, cháxa aptémakxa nak chá'a exchep etnessásegkokxak axnancha'ák aqsok keso náxop.

³¹ ¡Megkamassegwomek apcheymákpoho Wesse' egegkok! ¡Kapeykessásekxak chá'a apwáxok Wesse' egegkok ma'a aqsok apkelane nak!

³² Kalpexyennók chá'a xapop apkelano enxoho chá'a; ¡kalpaqnek chá'a néten egkexe apkelpaknegwokmoho enxoho chá'a!

³³ Anneykmássesek sa' chá'a ko'o negmeneykmasso Wesse' ahagkok sekhakxa nak makham, anneykmássesek sa' chá'a ko'o negmeneykmasso Dios ahagkok, sekyennákxa nak makham.

³⁴ Émenyeyk ko'o kapeykessásekxak apwáxok Wesse' egegkok ma'a ektémakxa nak chá'a élchetámeykha ewáxok, hakte wánxa chá'a ko'o segkésso ekpayheykekxa ewáxok ma'a.

³⁵ ¡Tásek kamassegwók apkelweynchámeykha náxop ma'a melya'assáxma nak! ¡Tásek elmassegwók ma'a élmasagcha'a nak apkeltémakxa! ¡Alpeykeshok sa' chá'a ko'o Wesse' egegkok, ekweykmoho kañók agko' ewáxok! ¡Aleluya!