Salmos 103 - Biblia Enxet

Alpeykeshok sa' chá'a ko'o Wesse' egegkok

¹ Alpeykeshok sa' chá'a ko'o Wesse' egegkok ekweykmoho kañók agko' ewáxok; alpeykeshok sa' chá'a ekyókxoho sekyennaqte m'a apwesey ekpagkanamaxche'.

² Alpeykeshok sa' chá'a ko'o Wesse' egegkok ekweykmoho kañók agko' ewáxok; mehelwánaqmeyk sa' chá'a xama enxoho m'a aqsok éltaqmalma apkelane nak.

³ Cha'a meyaqmagkáseykekxa ko'o ekyókxoho may'assáxma m'a, tén han setaqmelchesseyam ekyókxoho sekháxamáxche',

⁴ apteme semallahanchesso nétsapmakxa m'a, tén han seyeykhássesseykmoho segkésso seyásekhayo, tén han ektaqmeleykha apwáxok sélányo,

⁵ apteme nahan sélmésso chá'a ekyókxoho aqsok ektaqmela, tén han setnessáseykekxa chá'a étkok, tén han segkeyáseykekxa chá'a sekyennaqte, ektémól'a náta ekyawe.

⁶ Elyekpelkohok chá'a Wesse' egegkok yetlo ekmámnaqsoho apkelánéseykekxa apheykha m'a kélnaqtawáseykegkoho nak chá'a.

⁷ Apxekmóssegkek axta ámay apagkok ma'a Moisés, keñe aqsok apkelane m'a énxet'ák Israel.

⁸ Wesse' egegkok apteme ektaqmeleykha apwáxok henlano', tén han apmopyósa henlano'; tén han mepekhésamap, awanhek han segásekhayo.

⁹ Mehenxénchásekxók chá'a nentémakxa yókxoho ekhem, megkawegqók chá'a aplo;

¹⁰ mehenteméssessók ma'a ekpayhawo nak henteméssesek, eñama ekmaso nentémakxa, tén han mólya'assáxma;

¹¹ awanhók agko' katnehek apkelásekhayo m'a ektáha nak chá'a apcháyo, kaxhok ma'a ekwánxa nak ekyawe néten, keso xapop nak.

¹² Makhawók chá'a hegya'ássesek ma'a mólya'assáxma nak negko'o, ekhawo ektémakxa nak ekyetno makhawók mók ma'a teyapmakxa ekhem tén han taxnegwánxa ekhem.

¹³ Eláhapmakha chá'a Wesse' egegkok ma'a ektáha nak chá'a apkeláyo, aptémól'a xama apyáp elának ma'a apketchek;

¹⁴ hakte apya'ásegkok néñamakxa negko'o senlane m'a: apya'ásegkok nenteme xapop.

¹⁵ Hawók ektémakxa apyennaqte énxet ma'a pa'at; etyapok chá'a ektémól'a pánaqte exnók naxma:

¹⁶ wátekhapchek agkok chá'a éxchahayam, kamassegwók chá'a, kamassegwók han chá'a ekwetamaxche'.

¹⁷ Megkamassegwomek eyke chá'a apkelásekhayo Wesse' egegkok ma'a ektáha nak chá'a apcháyo; megkatnégwomek chá'a néxa aptaqmelchessáseykekxa apheykha apyókxoho m'a aptawán'ák neptámen nak,

¹⁸ apkeláneykegkoho nak chá'a m'a ekhémo mók nélpaqhetchásamáxkoho apagkok, meyenseyam nak chá'a apkelyaheykekxoho m'a apkeltémókxa nak etnahagkok.

¹⁹ Appekkenmeyk aptaháno Wesse' egegkok ma'a néten, apsawheykekxók apteme Wesse' apwányam ekyókxoho aqsok.

²⁰ ¡Kólpeykesho Wesse' egegkok kélyókxoho kélteme nak apkelásenneykha kélyennaqte! Kéxegke kéllane nak chá'a m'a apkeltamhókxa enxoho chá'a kóltéhek, kélhaxanma nak chá'a yaqwayam kólyahakxoho'.

²¹ ¡Kólpeykesho Wesse' egegkok kélyókxoho kélteme nak apkelásenneykha kélxámokma, kéllane nak chá'a m'a apmopmenyého nak!

²² ¡Kólpeykesho Wesse' egegkok kélyókxoho kélteme nak apkelane, cham'a ekyókxoho yókxexma aptémakxa nak Wesse' apwányam! ¡Alpeykeshok sa' chá'a ko'o Wesse' egegkok ekweykmoho kañók agko' ewáxok!