Salmos 101 - Biblia Enxet

Xama wesse' apwányam apxeyenma elának aqsok nápaqto' Dios

¹ Wesse', peyk ko'o kataqmalmakha sekpeywa axének ma'a ektémakxa mehegyenyaweykha, tén han ekpéwomo senláneseykekxa negheykha; Wesse', peyk ko'o anneykmássesek xép negmeneykmasso;

² émenyeyk ko'o atnehek ekpéwomo sektémakxa. ¿Háxko sa' ekwánxa hey'óta'? Ektaqmalma sektémakxa sa' ko'o atnehek, cham'a exagkok nak;

³ magwohok sa' ko'o keytek nahaqtók xama aqsok ekmaso. Altaqnaweygkohok chá'a ko'o m'a apkelyenseyam nak chá'a apkelyetleykha Dios; ¡magwohók sa' chá'a hépetchegwohok xama enxoho!

⁴ Eytnakhaksek sa' ko'o m'a ektémakxa nak élchetamso egwáxok ekmaso: ¡malanyek sa' chá'a aqsok ekmaso xama enxoho!

⁵ Alwanmeyásekxak sa' chá'a m'a apkelyexamakpoho nak chá'a apkelxéneykha ekmaso m'a apheykha nak ketók apheykegkaxa'; ¡megkalchehek sa' ko'o ewáxok ma'a apkelásennómap nak, tén han ma'a éleymáxkoho apkelwáxok!

⁶ Kalkohok sa' eyke chá'a ko'o ewáxok ma'a énxet'ák melyenseyam nak chá'a apkelyetleykha Dios, yaqwayam sa' exmakha chá'a xamók ko'o; wánxa sa' aqsa chá'a etnehek séláneykha m'a ektaqmalma nak chá'a apkeltémakxa.

⁷ Mexek sa' eyke chá'a exagkok ma'a apmopwána amya'a nak, ¡mexek sa' chá'a sekhakxa xama enxoho m'a metne nak chá'a ekmámnaqso' appeywa!

⁸ Yókxoho ekhem sa' chá'a amasséssók negókxa m'a apyókxoho élmasagcha'a nak apkeltémakxa; ¡alántekkesek sa' chá'a Wesse' egegkok tegma apwányam apagkok ma'a apyókxoho apkeláneykegkoho nak chá'a aqsok ekmaso!