Salmos 100 - Biblia Enxet

Wesse' egegkok apteme senlane tén han nenteme apagkok

¹ ¡Kólmeneykmásses Wesse' egegkok, kélyókxoho kélheykha nak keso náxop yetlo ekpayheykekxa kélwáxok!

² Kólpeykesho Wesse' egegkok yetlo ekpayheykekxa kélwáxok; ¡kólmeyenta aphakxa yetlo kélwehéseykha kélátseykha!

³ Kólya'asagkoho Wesse' egegkok apteme Dios; cha'a senlane negko'o m'a, tén han apagkok; ¡negko'o nenteme énxet'ák apagkok, tén han nepkések apnaqtósso apkelleykha nak yókxexma apagkok!

⁴ Kólántaxnegwata átog apagkok yetlo kélmeneykmasso kélpeykessamo, kólántaxnegwata apwáxok tegma appagkanamap apagkok, yetlo kélmésso ekxeyenma kélwáxok. ¡Kólmés ekpayheykekxa kélwáxok, kólxénmakha ektaqmalma m'a apwesey!

⁵ Hakte Wesse' egegkok apteme ektaqmalma apwáxok; megkamassegwomek chá'a segásekhayo, méko néxa m'a ektémakxa mehegyenyaweykha.