Salmos 1 - Biblia Enxet

LIBRO 1 (Salmos 1—41 ) Ekmámnaqsoho ekpayheykekxa egwáxok

¹ Apkeleñémo énxet melyeheykekxa nak apkeltémókxa etnehek ma'a énxet'ák élmasagcha'a nak apkeltémakxa, tén han métleykekxa nak apkeltémakxa m'a énxet'ák melya'assáxma nak, tén han mewháneykekxoho nak ma'a énxet'ák apwanyeykha nak chá'a Dios,

² wánxa aqsa etnehek apchásekhayo m'a Wesse' egegkok nak segánamakxa apagkok. Kaxénmakha han chá'a apwáxok axta'a, tén han ekyókxoho ekhem.

³ Cháxa énxet nak, aphawók ma'a yámet kélcheneykekxal'a neyáwa wátsam, ekyexnamól'a kammok ekhem agkok ekyexnamakxa, cham'a megkalyamayél'a chá'a áwa'. ¡Tásek chá'a katnehek ekteyapma m'a ekyókxoho aqsok apkelanakxa enxoho!

⁴ Megkaxnawok ma'a énxet'ák élmasagcha'a nak apkeltémakxa, hakte aphawók ma'a pa'at apák élsó nak éxchahayam.

⁵ Cháxa keñamak peya nak káhapwaták Dios sẽlyekpelchássessamo m'a énxet'ák élmasagcha'a nak apkeltémakxa, mexmakha sa' nahan ma'a yaqwánxa nak exmakha énxet'ák apkelpéwomo.

⁶ Wesse' egegkok aptaqmelchessesso ámay apagkok ma'a énxet'ák apkelpéwomo nak, keñe m'a ámay apagkok nak énxet'ák melya'assáxma, kalya'aksek sa' ma'a sẽlmassésseykemxa nak.