Proverbios 5 - Biblia Enxet

Kelán'a ekmanyehe kategkesek énxet

¹ Hatte, elyahakxoho chá'a ektémakxa nak ko'o sekya'áseykegkoho aqsok; etaqmelchesho apháxenmo ektémakxa nak ko'o sekmowána aqsok.

² Keñe sa' ey'ásegwók apteme apmopwána apkeláneykegkoho aptémakxa, epaqmétek sa' nahan yetlo ekha ektémakxa apya'áseykegkoho aqsok.

³ Hakte atsek chá'a katnehek ekpeywa henlának ma'a kelán'a megkatnaha nak entáwa', yeykhásseykmók pexmok égmenek ektaqmalmal'a m'a ektémakxa nak sempetseseykha;

⁴ askehek eyke katnehek ekyaqmageykekxa', kayeykhássamhok ma'a aqsok égmenek ekmáskel'a, askehek katnehek senlegassáseykegkoho, kayeykhássamhok ma'a ektémakxal'a hempexyekhak sawo ánet ahamtek.

⁵ Negyetlákxeyk agkok, cham'a nétsapma m'a; hakte payhémók ámay agkok ma'a takhaxpop.

⁶ Hakte megkeytlók ámay ekyennaqtamakxa egnények xa kelán'a nak, megkay'ásegkok ekmasagko m'a ektémakxa nak ekweynchámeykha.

⁷ Hatte, yeyxho sekpeywa, ná étnakhés chá'a sélxekmowáseyak.

⁸ Ná épetchegwom ma'a kelán'a megkatnaha nak aptáwa'; ná etnegwom ma'a átog axagkok nak,

⁹ yaqwayam enxoho megkamassegwomek ma'a ektémakxa nak apteme ekha kéláyo, keñe han megyaqhehek aptáhakxoho apketkok ma'a atáwa' nak ma'a kelán'a nak,

¹⁰ yaqwayam enxoho metókasek aqsok apagkok ekyetnakxa nak xép ma'a pók énxet'ák megkatnaha apkeleñémeyo xamo', tén han esawhaksek selyaqye apagkok.

¹¹ Keñe sa' natámen kaqhek apwáxok apwet'a enxoho ektaqmelchásegkoho ekmassa apyennaqte, apyamhowa enxoho.

¹² Sa' etnehek se'e: “¡Yaqsa axta ex'a ektéma malyaheykekxo chá'a sélpaqhetcháseykha! ¡Yaqsa axta ex'a ektéma mamoma takha' m'a ektémakxa axta chá'a sélésso aqsok!

¹³ ¡Magwaháxenmók apkelpeywa m'a apmáheyo axta chá'a hélxekmósek, magwaháxenmók han ma'a ektáha axta chá'a sélxekmowáseyak,

¹⁴ xegkessamók amegqasaxkohok ahagko', nápaqta'awók ma'a apyókxoho énxet'ák nak!”

¹⁵ Etnésses wánxa appathetéyak chá'a m'a aptáwa' nak, etnésses wánxa apchásekhayo m'a.

¹⁶ Megkataqmelchessesek xép apha apwetássekmo enxoho chá'a étche m'a mók kelán'a.

¹⁷ Yektegkes aqsa chá'a apketchek apancha'awo nak yaqwayam sa' kapasmok, ¡háwe yaqwayam kapasmok ma'a pók énxet!

¹⁸ ¡Kapayhekxa apwáxok xamo' xa aptáwa' nak, cham'a kelán'a apmoma axta aptéma aptáwa' m'a aptémakxa axta wokma'ák,

¹⁹ cham'a kelán'a ektaqmalma nak ekyókxa'! ¡Megkatnehek sa' chá'a megkásekhayo! ¡Kamok sa' chá'a apwáxok ekteméssesakxa'!

²⁰ Hatte, ¡Ná kalának apwáxok pók aptáwa'! ¡Ná epathetwom ma'a kelán'a megkatnaha nak aptáwa'!

²¹ Apkeláneykha chá'a Wesse' egegkok ektémakxa aqsok apkelane m'a énxet; meyenyókasek apaqtek ma'a apmahágkaxa enxoho.

²² Kamekxohok agko' chá'a aqsok ekmaso apkelane m'a énxet ekmaso nak aptémakxa'; máxa táma katnehek kalpextétek ma'a mey'assáxma apkelane apagkok apagko' nak.

²³ Meláneykegkoho aptémakxa sa' keyntamok ma'a nétsapmakxa nak; aptémakxa ekyeyháxma sa' kañék etwasakpohok apagko'.