Proverbios 4 - Biblia Enxet

Sẽlyáteyeykegkoho yaqwayam kataqmelhok nenxega

¹ Kélketchek, kólyahakxoho chá'a appeywa kélyáp; kóltaqmelchesho chá'a kélháxenmo yaqwayam kólmok kélyekpelchémo aqsok.

² Ekméssek ko'o m'a ektaqmalma séltámeséyak kéxegke, nágkólyenyaw aqsa m'a nélxekmowásamáxche ahagkok.

³ Hakte kélketche axta ko'óxa: awanhek axta seyásekhayo m'a méme

⁴ axta etnehek chá'a hélxekmósagkok táta s'e: “Epekken apwáxok se'e sekpeywa nak; elána m'a séltamhókxa enxoho chá'a elána', keñe sa' kawegqohok apha.

⁵ Ema negya'áseykegkoho aqsok tén han negyekpelchémo; nágkalwánaqmágwom ma'a sektémakxa nak chá'a sekpeywa.

⁶ Yásekhoho m'a ektémakxa nak negya'áseykegkoho aqsok, ná eyensem aqsa, sa' kamyók chá'a exchep xa.

⁷ Elmeyókasho chá'a amonye' emok ma'a negya'áseykegkoho aqsok, tén han negyekpelchémo.

⁸ Yásekhoho sa', keñe sa' katnéssesek néten kéláyo; epathet sa', tén sa' katnéssesek ekha kélyeheykekxoho;

⁹ ¡kagkések sa' kélnatanma ektaqmela, katchessesek sa' apqátek apketchesso apqátek élyenma!”

¹⁰ Hatte, yeyxho chá'a sekpeywa, ema chá'a takha', keñe sa' exámekxak apyeyam apha.

¹¹ Ko'o sa' eyntamok ma'a ámay ekyetnamakxa nak negya'ásegwayam aqsok: wának sa' nahan étlók ma'a ámay ekpéwomo nak,

¹² meykexa nak chá'a kalya'aksexma neyseksa apxega, metlápegwomek sa' chá'a neyseksa apkenye.

¹³ Emyow sa' ma'a sélxekmowáseyak axta, ná eyenyekxa aqsa; elána' sa' chá'a, hakte cháxa yaqwayam chá'a kagkések ekyennaqte apnények xa.

¹⁴ Ná elyetlawha apkelmahágkaxa m'a énxet'ák élmasagcha'a nak apkeltémakxa', ná etne han ma'a aptamheykegkaxa ekmaso nak.

¹⁵ Ná étlow ámay apagkok nak ma'a; ná epéwho chá'a, exeg aqsa,

¹⁶ hakte menaqtének chá'a axta'a melánegko enxoho aqsok ekmaso m'a; megkalnáphek tén ma'a metnéssessekmoho enxoho chá'a exma ekmaso xama énxet.

¹⁷ ¡Cham'a aptéyak ma'a ekmaso nak nentémakxa', keñe apyenéyak ma'a apkelyennaqtésamakpoho nak chá'a elanagkok aqsok ekmaso!

¹⁸ Máxa kaxwe ekteyapma ekhem élsassóxmal'a ámay apagkok ma'a énxet'ák élpéwomo nak apkeltémakxa': kataqmelchesagkohok aqsa kalsaksek exma, ekwokmoho m'a ekyennaqwokmo élsassóxma.

¹⁹ Kayáqtéshok eyke exma ámay apagkok ma'a énxet'ák élmasagcha'a nak apkeltémakxa'; ¡melya'asagkehek chá'a m'a ektáha enxoho élpelápagkasso!

²⁰ Hatte, etaqmelchesho chá'a apháxenmo sekpeywa; yeyxho chá'a sektáhakxa enxoho chá'a seyáneya.

²¹ Ná elwatés chá'a elanha; ¡epekken apwáxok!

²² Hakte cháxa ekmésso chá'a élyennaqte apnénya'ák tén han élyennaqte apyempe'ék apyókxoho m'a ektáha nak chá'a apkelweteykekxa'.

²³ Elanagkoho chá'a élchetámeykha apwáxok, hakte cháxa éñamakxa ekyennaqte nak egnények xa.

²⁴ Ná exén chá'a aqsok megkamámnaqsoho nak; étnakhés ma'a ektémakxa nak negmowána amya'a.

²⁵ Yenmexho aqsa chá'a apmonye', nágyaháxehekxa chá'a.

²⁶ Etaqmelchesho chá'a apkelányo m'a apmahágkaxa enxoho chá'a, tén sa' tásek chá'a katnehek apxega.

²⁷ Ná étnakhágwom chá'a ámay apagkok; nágyoho kasógwok apxega.