Proverbios 30 - Biblia Enxet

Ektáhakxa seis Agur appeywa

¹ Agur appeywa, Jaqué apketche, apkeñama axta Masá. Aptáhak axta Agur apkelpaqhetchesa m'a Itiel tén han Ucal:

² Ko'o aqsa wánxa seyeyháxma ahagko' nepyeseksa m'a énxet'ák, méko sekya'áseyak ektéma nak apya'áseyak ma'a énxet.

³ May'ásegkok ma'a ektémakxa nak negya'ásegwayam aqsok, may'ásegkok han aptémakxa nak ma'a Dios Appagkanamap apagko' nak.

⁴ ¿Yaqsa axta ekmeheykegko néten keñe ekweyweykento makham? ¿Yaqsa awanchek kamagkok ma'a éxchahayam? ¿Yaqsa eyaqlassama eyaqlamaxche m'a wátsam ekwányam? ¿Yaqsa axta ekpekkenma m'a néxa xapop nak? ¡Héltennés sa' apwesey! ¡Héltennés sa' han apwesey m'a apketche apya'ásegko enxoho!

⁵ Eltaqmelcheshok Wesse' egegkok ma'a ektáha nak chá'a apcháyo, máxa xama negáhakkásamáxche etnehek; naqsók ma'a ekyókxoho aqsok apxeyenma nak chá'a.

⁶ Etne chá'a aptáhakxa enxoho chá'a apcháneya m'a, ná exeyenwom aqsa chá'a m'a metnahakxa enxoho chá'a appeywa; epaqhetchesek katnehek ma'a, keñe exchep etnehek apmopwána amya'a.

⁷ Dios ahagkok, ánet aqsok akke aqsa élmaxneyk xép; hélmés sa' ko'o sekyennákxa nak makham:

⁸ Hétnakhásses ma'a sektémakxa megkamámnaqsoho tén han sekmowána amya'a, ná hetnésses aqsa ekxákma aqsok ahagkok, essenhan meyke aqsok ahagkok; hegkés aqsa chá'a sekto eyeyméxchexa enxoho chá'a,

⁹ hakte eyeykhágwokmók agkok ko'o xa aqsok nak, ayenyók kexa katnehek xép, axének may'ásegko; méko agkok han aqsok ahagkok, amenyexek kexa nahan katnehek, keñe atwássesha m'a apwesey nak xép Dios ahagkok.

¹⁰ Ná exén ekmaso kélásenneykha naqsa nápaqtók ma'a ektáha nak wesse' apagkok, eltamhok katnehek katnégwomhok exma', keñe exchep eñegkohok ekyaqmageykekxa ektáhakxa.

¹¹ Yetneyk énxet apyemneykha nak chá'a apyáp, metaqmelchesso nak chá'a appeywa elának ma'a egken.

¹² Yetneyk énxet apkenagko nak káxña'awok aptémakxa, megyaxñáseykekxa nak makham aptémakxa ekmanyása.

¹³ Yetneyk énxet apkenagko nak etnahak ekyawe kéláyo, elanok chá'a pók yetlo eyeymáxkoho apwáxok.

¹⁴ Yetneyk énxet ekho nak sókwenaqte m'a apma'ák nak, tén han sawo m'a awhók apma'ák nak, yaqwayam emasséssók ma'a ekha nak chá'a eyeyméxchexa aqsok ma'a aphágkaxa, tén han ma'a meyke nak aqsok apagkok.

¹⁵ Ánet katnehek étkók ma'a seyáneg, wánxa aqsa chá'a katnehek se'e: ¡Mók makham, mók makham! Yetneyk ántánxo aqsok megkalyaqkáñam nak, keñe m'a ektáhakxa nak cuatro megkatnehek ekpeywa s'e: “Wánxa ektáhak”,

¹⁶ cham'a takhaxpop, kelán'a megkate étche, ekyame exma nak xapop meyke yegmen tén han ma'a táxa megkaspónegwayam nak.

¹⁷ Énxet apwanyémo nak chá'a elanok apyáp aptawáseykegkoho nak chá'a egken ekwányam, payhawok kalhexyawássesek apaqta'ák ma'a kágqag keñe etwok ma'a máma.

¹⁸ Yetneyk ántánxo aqsok ekpelakkasa nak sekwete, keñe m'a ektáhakxa nak cuatro may'ásegko ektáhakxa:

¹⁹ náta ekyawe ámay agkok ma'a néten, yéwa ámay agkok ma'a neyseksa nak meteymog élyawe, yántakpayhe ámay agkok ma'a neyseksa nak wátsam ekwányam, keñe énxet elának chá'a m'a kelán'a.

²⁰ Keso ektémakxa kelán'a ektawáseykegkoho nak chá'a atáwa' s'e: kapathetagkok énxet, kayaqpaksek yegmen, keñe kaxének chá'a megkalana aqsok ekmaso.

²¹ Yetneyk ántánxo aqsok megkólmámenyého nak katnehek xama apchókxa, keñe m'a ektáhakxa nak cuatro kalpexyennegkesek xóp:

²² cham'a aptáha enxoho wesse' apwányam ma'a kélásenneykha naqsa, ekyeykhágwokmoho enxoho aptéyak ma'a élyeyháxma nak,

²³ ekwet'a enxoho atáwa' m'a kelán'a megkásekhamaxche', keñe han ektáha enxoho wesse' m'a kélásenneykha naqsa, ekyaqmagkasa enxoho m'a wesse' agkok.

²⁴ Yetneyk cuatro aqsok nawha'ák étcheyetse nak keso náxop, élya'áseykegkoho agko' nak aqsok:

²⁵ cham'a pexyegke, apxámok han etnehek ma'a, apkelyelqákpok eyke, apcháncheseykekxa nak chá'a aptéyak ma'a ekmexanmakxal'a exma;

²⁶ tóm axta'a apkelánegwayam nak chá'a apxanák ma'a neyseksa nak meteymog, apkelyelqákpók eykhe han ma'a;

²⁷ sawa' méko eykhe etnehek wesse' apagkok, kaxhok eyke mók apkelxega;

²⁸ pegyáxña'a negmowána nak agmok, apkelweykmoho nak chá'a m'a wesse' apwányam apxagkok nak.

²⁹ Yetneyk ántánxo aqsok élyennaqte, keñe ektáhakxa nak cuatro, éleymáxkoho chá'a kalxog:

³⁰ cham'a neptána, aqsok nawhak eklo agko', megyenye nak amonye' xama aqsok, megyeye nak han ma'a énxet;

³¹ tat'a kennawo' eyásennómaxche nak chá'a, yát'ay apketkok tén han wesse' apwányam apxega nak apmonye' m'a sẽlpextétamo apagkok.

³² Apkelánekxeyk sa' agkok yaqwánxa etnehek ekmaso neyseksa apchásennamap, kalchetam sa' apwáxok eyesagko yaqwánxa etnehek

³³ hakte apyennaqtéssek agkok weyke nagkeygmenek, étak sa' ma'a pexmok agkok, agkok yeyásak chá'a apkexaya apyexwála', éma katyapok apwéhek, aplókassek agkok pók, keytlawhok apkelnápomap.