Proverbios 3 - Biblia Enxet

Negánémaxchexa antéhek yaqwayam agwetak negya'ásegwayam

¹ Hatte, nágkalwánaqmágwom aqsa m'a ektémakxa nak sélxekmowáseyak; epekken apwáxok ma'a segánamakxa ahagkok nak,

² keñe sa' kawegqohok chá'a apweynchámeykha yetlo ektaqmalma apha.

³ Ná eyensem ektémakxa negásekhayo egmók tén han ekmámnaqso' agko'; eswoho chá'a apmahágkaxa enxoho, ektémól'a agkexnek egyespok ma'a nennatanma. Elqahés apwáxok,

⁴ tén sa' kalkohok chá'a apwáxok elanok Dios, keñe han ma'a énxet'ák nak.

⁵ Etne apcháyo Wesse' egegkok ekweykmoho kañók agko' apwáxok, nágyásenneykxa m'a ektémakxa nak apmopwána aqsok.

⁶ Ná elwánaqma chá'a Wesse' egegkok apkelana enxoho chá'a ekyókxoho aqsok, keñe sa' ma'a, exekmósek chá'a m'a ámay ekpéwomo nak.

⁷ Ná exénmakha apteme apmopwána apagko' aqsok; etne apcháyo Wesse' egegkok, étnakhés ma'a aqsok ekmaso.

⁸ ¡Cháxa ekteme pánaqte ektaqmela xa yaqwayam keynnaqtések apyókxa'!

⁹ Etne apcháyo Wesse' egegkok elmések aqsok apagkok yetlo m'a émha amonye' ekyexna nak aqsok apkeneykekxa';

¹⁰ keñe sa' kallanagkohok agko' chá'a aqsok aktek apkeneykekxa m'a apxátamakxa nak chá'a, keñe han ma'a apkelyátamakxa nak vino.

¹¹ Hatte, ná etaqheksoho m'a ektémakxa nak Wesse' egegkok appékessáseyak, ná enathoho han ma'a appaqhetchesa enxoho;

¹² hakte eñássesagkohok chá'a Wesse' egegkok ma'a énxet ektáha nak apchásekhayókxa, aptémól'a xama énxet eñássesagkohok apketche apchásekhayókxa nak.

¹³ Apkeleñémo énxet apweteykekxa nak ektémakxa negya'áseykegkoho aqsok, apmà nak ektémakxa apmopwána aqsok;

¹⁴ hakte awanchek hempasmok xa, xámok agko' katnehek aqsok segwetasso, yeykhásseykmók ma'a sawo ekmope nak, tén han ma'a sawo ekyátekto ekmomnáwa nak.

¹⁵ Tásók agko' ma'a negya'áseykegkoho aqsok, yeykhásseykmók ma'a meteymog éltaqmalma nak; ¡mogwanchek nahan aghéshok ma'a aqsok kélmamenyého kélagko' nak chá'a!

¹⁶ Negya'ásegwayam ekpayho nak élya'assamakxa segmésso ekwenaqte negha, keñe m'a ekpayho nak násagqalwa segmésso ekxámokma aqsok egagkok, tén han ekha sẽláyo.

¹⁷ Atse' katnehek negyetlawa enxoho; méko katnehek ektáhakxa negha negyetlawa enxoho ámay agkok ma'a.

¹⁸ Negya'áseykegkoho aqsok ekmésso ekyennaqte apnények ma'a énxet ektáha enxoho apmà; ¡apkeleñémo énxet meyenyeykekxa nak!

¹⁹ Yetlo apya'áseykegkoho aqsok axta apkeláneya Wesse' egegkok ma'a néten, apmopwána aqsok axta han keñamak apkeláneya náxop;

²⁰ apya'áseykegkoho aqsok axta han keñamak apkexpánchessama yegmen ma'a wátsam ekwányam nak, keñe han aptekkessama chá'a yálye m'a neyseksa yaphope.

²¹ Hatte, etaqmelches apmeykha m'a ektémakxa nak apyekpelchémo aqsok, nágyoho kagketek ma'a ektémakxa nak apmopwána apkeláneykegkoho aptémakxa,

²² hakte sa' kagkések xép ekwenaqte apha m'a, kalnáxegkesha sa' nahan ektémól'a agkexnek egyespok nennatanma.

²³ Méko sa' chá'a katnehek ektáhakxa apweynchámeykha, metlápegwomek sa' han.

²⁴ Apkellókassek sa' agkok chá'a apyampe, méko sa' katnehek ektamheykha apwáxok; apyetneyk sa' agkok, tásek sa' chá'a katnehek apteyenma.

²⁵ Megyekyek sa' ma'a aqsok ekpelakkasso nak chá'a kamáwhok hentemégwomhok exma', tén han ma'a aqsok ekmaso peya nak káhapwak ma'a élmasagcha'a apkeltémakxa',

²⁶ hakte Wesse' egegkok sa' emyók chá'a exchep, megyohók sa' kamok ma'a kelhanma nak.

²⁷ Epásem chá'a m'a ekha nak eyeyméxchexa aqsok, ná emyágwakxa chá'a apkepwagko enxoho epasmok.

²⁸ Ná eleyxches chá'a saka epasmok ma'a pók, eyeyméxchexa nak chá'a aqsok sakhem.

²⁹ Ná elána chá'a aqsok ekmaso énmexma m'a apheykha nak chá'a keto' apxagkok, megkalxeyenma nak chá'a apkelwáxok elának aqsok ekmaso exchep.

³⁰ Ná etaqnawágwom aqsa chá'a pók meykexho apteméssesakxa ekmaso.

³¹ Ná eyásekkes aptémakxa m'a énxet apyennaqteyáseykha nak chá'a apyempehek, nágyeykmasha han ma'a aptémakxa nak;

³² hakte eltaqnaweygkohok apagko' Wesse' egegkok ma'a énxet'ák élmasagcha'a nak apkeltémakxa', keñe m'a énxet'ák éltaqmalma nak apkeltémakxa', eltennaksohok chá'a yaqwánxa etnehek.

³³ Aqsok ekmaso chá'a yahak Wesse' egegkok apxagkok ma'a énxet ekmaso nak aptémakxa', aqsok ektaqmela eyke chá'a etekkessesek aphakxa m'a énxet ekpéwomo nak aptémakxa'.

³⁴ Ey'ássók chá'a Wesse' egegkok ma'a énxet'ák apkelya'ásseykmoho nak chá'a, kataqmalmakha eyke chá'a apwáxok elanok ma'a énxet'ák apkelmopyóseka nak.

³⁵ Ekha kéláyo sa' chá'a elxawagkok ma'a énxet'ák ekha nak apkelya'áseykegkoho aqsok, keñe sa' ma'a élyeyháxma nak, elmegqasakpohok apagko' sa'.