Proverbios 27 - Biblia Enxet

¹ Nágkeyxkoho chá'a appeywa exének elának aqsok saka, hakte mey'asagkehek xép katnehek ma'a élsaka enxoho.

² Asagkek xép kataqmalmakha chá'a appeywa exénakpekxohok apagko'; yoho aqsa chá'a pók énxet'ák kataqmalmakha apkelpeywa exének xép.

³ Kelyentex'ak ma'a meteymog tén han xapop ánek, eyke ekyentaxnakxa agkok aplo m'a énxet ekyeyháxma nak.

⁴ Asagkek ma'a nenlo nak chá'a, hentawasha m'a nennatheyáseykha nak, eyke ekyagwánxa agkok aplo m'a énxet apkelmeyeykha nak chá'a aptáwa'.

⁵ Tásek ampékesseshok nempaqhetchesso nápaqtók egmók, kaxnók manxekmósso nak negásekhayo.

⁶ Tásek agáwhok segmésso nak appeywa ekyennaqte m'a egmók, kaxnók agáwhok sempatheteykha m'a megkatnaha nak egmók.

⁷ Kammohok aptaqnagko etwok yányawhéna' apyegmenek ma'a énxet apyaqkáneykmoho nak chá'a; keñe m'a meyk áto nak, kammohok ekmátsa etwok ma'a aqsok ekmáske nak.

⁸ Énxet apweynchámeykha nak makhawók megkatnahakxa apchókxa', aphawók ma'a ektémól'a náta ekweynchámeykhal'a makhawók ekyetnamakxa m'a axagkok.

⁹ Néltexneymáxche' ekmátsa ekpaqneyam chá'a kapeykásekxak egwáxok; kallókashok chá'a egyempehek ma'a segmésso nak chá'a appeywa ekmátsa m'a egmók.

¹⁰ Ná ekxakhagwom chá'a apkelxegexma'a, tén han ma'a apyáp apkelxegexma'a nak. Ná emyekxa chá'a apepma apxagkok eyesagko enxoho ektáhakxa apha. Tásek ey'ókxak ma'a apha nak ketók apxagkok, kaxnók ma'a apepma apha nak makhawo'.

¹¹ Hatte, etne apya'áseykegkoho aqsok, keñe sa' ko'o kapayhekxak ewáxok; tén sa' chá'a ewanchek wátegmowagkok ma'a énxet'ák ektáha nak chá'a setaqnaweykha.

¹² Étak chá'a aqsok ekmaso m'a énxet ekha nak chá'a élchetámeykha apwáxok, keñe étnakhaksek chá'a; keñe m'a meyke nak chá'a élchetámeykha apwáxok, exog aqsa, keñe eñegkohok chá'a ektemégweykmoho exma ekmaso.

¹³ Énxet apxeyenma nak chá'a eyánmagkassesek apméyak aqsok ma'a meteykxa nak, elyementem sa' apkelnaqta, elma sa' ekwokmo apyánmagkásekxo makham.

¹⁴ Nempeykesseykekxa nak egmók ampaqhetchesek ekyennaqte anxátekhássekxak amonye' élseye, hawók ma'a ektémakxal'a negyemneykha ekmaso egmók.

¹⁵ Máxa yegmen eksekkenmal'a neyseksa ekmámeye katnehek ma'a kelán'a ekyenneykha nak chá'a ekpeywa kalának atáwa'.

¹⁶ Agmáwhok eykhe agmássesagkok yaqwánxa katnehek, mogwanchek eyke agmássesagkok, máxa ektémól'a m'a éxchahayam magmowánal'a agmagkok, essenhan ma'a ektémól'a pexmok égmenek agmáwhok agmagkok.

¹⁷ Sawo ekyentaxno chá'a kólmaha kólahamtaksek ma'a sawo ekyentaxno nak, keñe énxet kañék chá'a apya'ásegwayam aqsok ma'a pók nak.

¹⁸ Etwok chá'a ekyexna higo yámet ma'a énxet ektáha nak aptaqmelchesso; keñe m'a ektáha nak chá'a aptaqmelchesso wesse' apagkok, exkak chá'a ektaqmalma apxénamap.

¹⁹ Cham'a ektémakxa nak han chá'a negko'o negwete ektémakxa négát ma'a neygmen nak, cháxa ektémakxa han énxet apmopwána nak étak ektémakxa m'a apwáxok.

²⁰ Megkayaqkáneykmok ma'a élmaheykegkaxa nak eghagák, tén han ma'a takhaxpop nak, hawók han ektémakxa nak énxet étsapeykha nak apnények aqsok xa, mewagkasek néxa apmopmenyého aqsok.

²¹ Kólwatnohok chá'a kóllanok ektémakxa m'a sawo ekyátekto ekmomnáwa, tén han sawo ekmope nak; keñe énxet kólyekpelkohok chá'a m'a ektémakxa nak ektaqmalma apxénamap.

²² Kóltekxók eykhe yetlo aqsok aktek ma'a énxet ekyeyháxma nak, megkamassehek eyke apteme ekyeyháxma'.

²³ Elanha chá'a nepkések apnaqtósso, eltaqmelches chá'a aqsok apnaqtósso,

²⁴ hakte megkawegqók chá'a m'a ekxákma nak aqsok egagkok, megkawegqók han chá'a m'a apkelókxa nak.

²⁵ Tepékxek sa' agkok makham ma'a pa'at tén han éltektépekxo enxoho ekyókxoho, kélyaqtenna enxoho pa'at kéléyak kélnaqtósso m'a néten egkexe nak,

²⁶ kaxek sa' nepkések apwa' yaqwayam elának aptaxno, kaxek sa' han selyaqye apagkok eñama m'a yát'ay apnaqtósso yaqwayam emok xapop apagkok.

²⁷ Kaxek sa' han ekyawe agko' yát'ay neme apyegmenek apagkok, yaqwayam ének xép tén han ma'a ekheykha nak apxagkok, keñe han ma'a apkeláneykha nak.