Proverbios 24 - Biblia Enxet

- 19 -

¹ Ná eyásekkes apkeltémakxa m'a énxet'ák élmasagcha'a nak apkeltémakxa', nágyepmenyého epaxqaha m'a,

² hakte apkelyennaqteyáseykha apyempe'ék aqsa kelxéneykha apkelwáxok ma'a, aqsok ekmaso aqsa elxénagkok chá'a elanagkok.

- 20 -

³ Yetlo kélya'áseykegkoho aqsok chá'a elanakpok ma'a tegma nak, yetlo kélmowána aqsok han chá'a kólyennaqtéshok kéllane m'a apowhók nak;

⁴ yetlo kélya'áseykegkoho aqsok chá'a kóllanaksohok kañe' tegma m'a aqsok élmomnáwa nak, tén han ma'a éltaqmalma nak anlano'.

- 21 -

⁵ Tásek etnehek apya'áseykegkoho aqsok ma'a énxet, kaxnók etnehek ma'a apyennaqte; tásek antéhek ma'a negya'ásegwayam aqsok, kaxnók antéhek ma'a ekyennaqte nak egyempe'ék,

⁶ hakte kóltaqmelcheshok chá'a kélláneykekxa kéltáhakxa m'a peya enxoho kampakhaxche', agmallánek eyke chá'a m'a apxáma enxoho apkelpaqméteykha appasmeykha apkeltamheykha.

- 22 -

⁷ Mey'asagkehek chá'a yaqwánxa etnehek appeywa énxet ekyeyháxma aphakmo enxoho m'a sẽlyekpelchémókxa nak, hakte megkeytnók aphakxa m'a negya'áseykegkoho nak aqsok.

- 23 -

⁸ Énxet ekxéneykha nak apwáxok wánxa elának aqsok ekmaso, exénakpok chá'a apteme énxet aptekkesso chá'a apkelenmexamap ma'a apnámakkok.

⁹ Magya'assáxma m'a ekxéneykha nak chá'a apwáxok elának ma'a énxet ekyeyháxma; ¡apyókxoho énxet'ák chá'a etaqnawhok ma'a énxet ekyenneykha nak chá'a appeywa!

- 24 -

¹⁰ Kélyelqáxchek agkok kélwet'a enxoho ekmaso kélha, cháxa kélyelqáxkoho xa.

- 25 -

¹¹ Elwagkas teyp ma'a kélyenyawásegko nak yaqwayam etekyewekxa'; elwagkas teyp neyseksa aqsok ekmaso m'a keto' nak yaqweykenxa eletsapok.

¹² Exének sa' eykhe mey'ásegko exchep, sa' eyke ey'asagkohok ma'a apkelányo nak chá'a egwáxok; ey'asagkohok sa' ma'a ektáha nak chá'a apkeláneykha, apyaqmagkáseykekxa nak chá'a mók aqsok nenlane.

- 26 -

¹³ Hatte, etaw yányawhéna' apyegmenek; ekmátsa nak antók.

¹⁴ Sa' kaxhok xép apwet'a enxoho apya'áseykegkoho aqsok, tén han apmopwána aqsok ma'a ekwánxa nak ekmátsa; apwet'ak sa' agkok xa, tásek sa' chá'a katnehek apwetágwayam apmonye', megqakhók sa' eleyxek ma'a apkeltémo nak éta'.

- 27 -

¹⁵ Nágkaxén aqsa apwáxok ekmaso elának ma'a énxet meyke nak aptémakxa, ná ektamák enaqtawássesha aqsok apagkok ma'a apxagkok nak,

¹⁶ hakte eyaqnenek eykhe chá'a ekweykmoho siete m'a meyke nak aptémakxa, siete eyke han chá'a katnehek apkempeykekxa néten; keñe m'a élmasagcha'a nak apkeltémakxa, káhapwak chá'a ekmaso apheykha eletsapok.

- 28 -

¹⁷ Nágkapayhekxa chá'a apwáxok apwet'a enxoho apteyekmo m'a apkenmexma nak, nágyátsaha chá'a apwet'a enxoho etlapmok ma'a,

¹⁸ hakte megkalchehek apwáxok Wesse' egegkok apwet'a enxoho aptáha xa, elwátessók han apmáheyo etaqnók ma'a apkenmexma nak.

- 29 -

¹⁹ Nágkalókas aqsa apwáxok elanok ma'a énxet'ák élmaso nak apkeltémakxa, ná eyásekkes han apkeltémakxa m'a énxet'ák élmasagcha'a nak apkeltémakxa,

²⁰ hakte megkataqmelwomek sa' apwetágwayam apmonye' m'a énxet ekmaso nak aptémakxa: ¡máxa cháléwasso kélsapanchesso sa' etnehek emassegwók!

- 30 -

²¹ Hatte, etne apcháyo Dios, tén han wesse' apwányam; ná epáxaqwom chá'a m'a apkelenmexeykha nak chá'a,

²² hakte yahamok chá'a káhapwak ekmaso apheykha m'a, méko han kay'asagkohok chá'a yaqwánxa etnehek apkellegassáseykegkoho Dios ma'a, tén han ma'a wesse' apwányam nak.

Mók apkelpeywa m'a apkelya'áseykegkoho nak aqsok

²³ Keso apkelxeyenma han apkelya'áseykegkoho nak aqsok se'e: Megkapayhawok anteméssesek apyeykhamap pók nenlányo énxet ma'a sẽlyekpelchémókxa nak.

²⁴ Énxet apxeyenma nak meyke aptémakxa m'a apsexnánémap nak, etaqnók ma'a énxet'ák, elya'ássók ma'a apyókxoho énxet'ák;

²⁵ keñe m'a énxet aplegassáseykegkoho nak ma'a apsexnánémap nak, tásek chá'a katnehek ektáhakxa, kalkohok han apwáxok aptáhakxa m'a énxet'ák.

²⁶ Ekpayhémo nak negátegmowéyak, cháxa ekteme ekyetna nélásekhamaxkoho xa.

²⁷ Elánekxa sekxók aqsok yaqwayam kapasmok, etneykha sa' namyep apagkok keñe sa' natámen elának apxagkok.

²⁸ Ná exén aqsa meykexho aqsok eksexnenagko pók, ná etne nahan apmopwána amya'a exének ma'a.

²⁹ Nágkaxén aqsa chá'a apwáxok eyaqmagkásekxak mók kélteméssessamakxa', ná exnésho nahan apteméssesakxa enxoho m'a pók.

³⁰ Ekyeykhágwokmek axta ko'o m'a yókxexma apagkok nak ma'a énxet apháxamakpoho nak etneykha, tén han apkeneykekxexa nak anmen yámet ma'a énxet ekyeyháxma nak:

³¹ keñe sekwet'a ekxámokma éktegeykekxa namyep apagkok ma'a aqsok ekha nak am'ák, kelyaqneneykegkek ma'a meteymog aphaxtegkesso nak.

³² Xama axta ko'o sekwet'a xa, keñe élchetagkasa ewáxok; ekwet'a axta ko'o xa keñe sekya'ásegwokmo ektéma nak se'e:

³³ neyseksa apyenmeykha tén han ekyawheykha apqátek, neyseksa apteyammeykegkokxa apaktog yaqwayam kataqmelhok apteyenma,

³⁴ sa' káhapwak ma'a senteme nak meyke aqsok, kaktámegmak sa', aptémól'a énxet apmáheyo nak hegyementók aqsok egagkok.