Proverbios 23 - Biblia Enxet

- 6 -

¹ Apcháneyáha agkok xama wesse' apwányam yaqwayam epasmok apto, etaqmelchesho chá'a sekxók élchetámeykha apwáxok yaqsa ekha m'a apmonye' nak.

² Meyk agko' sa' eykhe katnehek, elenmaxakpoho sa' aqsa meyk apagkok;

³ nágkatsep apnények ma'a apto élmátsa nak, kólyexanchesha katnehek.

- 7 -

⁴ Nágyaqhap aptamheykha eltamhok etnehek ekxákma aqsok apagkok; elwatés ekxéneykha apwáxok katnehek xa ektáha nak.

⁵ Aptaqmelchásawók sa' agkok apkelányo, étak sa' ektáha méko m'a ekxákma nak aqsok egagkok; yahamok chá'a kalchampak kalxeganmok, ektémól'a náta ekyawe kampa', máxa katnehek ma'a ekhákxo enxoho axempenák.

- 8 -

⁶ Ná etwoho chá'a xamo' apto m'a énxet apmasma nak chá'a aqsok, nágkatsep apnények ma'a apto élmátsa nak,

⁷ ekho nak xama kélwa' ekyetnayam nak egyespok. Sa' etnehek yának se'e: “Etaw, eyen”, háwe eyke naqso' xa aptáhakxa nak apcháneya;

⁸ eyekxagkok sa' natámen apto xa apto nak, megkapasmehek sa' ma'a aptáhakxa exchek xép ektaqmeleyncha'a appeywa apkelana.

- 9 -

⁹ Ná epaqhetchesha chá'a m'a énxet ekyeyháxma nak, hakte ey'ássók katnehek ma'a appeywa ektaqmalma nak.

- 10 -

¹⁰ Nágkólxegkásekxoho chá'a xapop kélagkok ekpekkenamaxchexa axta nanók néxa', ná émentagwom han xapop apagkok ma'a apkelyéheykha nak,

¹¹ hakte yetneyk xama apyennaqte apagko' apkelmasma m'a énxet'ák nak, cham'a peya sa' etyapok elmeyók yenmexek xép.

- 11 -

¹² Yoho katxek apwáxok nélxekmowásamáxche', yeyxho chá'a m'a negya'ásegwayam aqsok.

- 12 -

¹³ Enókásha chá'a wokma'ák, elyekpexchetmakha sa' eykhe chá'a, megyaqhek sa' eyke;

¹⁴ hakte apnókáseyha sa' agkok xa, emallahanchesek sa' ma'a nétsapmakxa nak.

- 13 -

¹⁵ Hatte, apwetágwokmek sa' agkok apya'ásegwayam aqsok, awanhek sa' ko'o katnehek ekpayheykekxa ewáxok;

¹⁶ kapayhekxohok agko' sa' ewáxok sekleg'a enxoho exének ma'a ekpayhawo nak antéhek.

- 14 -

¹⁷ Ná eyásekkes apkeltémakxa m'a énxet'ák melya'assáxma nak; etne aqsa chá'a apcháyo m'a Wesse' egegkok;

¹⁸ tén sa' kataqmelwók apwetágwayam apmonye', megqakhók sa' eleyxek ma'a apkeltémo nak éta'.

- 15 -

¹⁹ Hatte, etaqmelchesho chá'a apháxenmo sekpeywa, ey'ásegwom han chá'a; kaxén chá'a apwáxok étlók ma'a ámay ektaqmela nak.

²⁰ Ná epaxqaha chá'a m'a anmen át'ák nak, tén han ma'a melésso nak chá'a etawagkok aptéyak,

²¹ hakte meyke aqsok apagkok chá'a etnahágkok ma'a anmen át'ák nak, tén han ma'a melésso nak chá'a etawagkok aptéyak, keñe m'a énxet'ák apkelháxamákpoho nak chá'a eltemeykha, elántaxnekxak aqsa chá'a m'a apáwa apkelyeptamap nak.

- 16 -

²² Yeyxho chá'a appeywa apyáp, ektáha axta apkelane; ná etaqnaweyha chá'a egken ektáha enxoho ekwányamo'.

²³ Ema m'a ekteme nak ekmámnaqso', tén han negya'ásegwayam, nélxekmowásamáxche', keñe han ma'a negyekpelchémo, ¡ná ekxeyha aqsa ekha ekyánmaga!

²⁴ Megqakhók kapayhekxak apwáxok tén han kaqheykha apwáxok apyáp ma'a kélketche ektaqmalma nak aptémakxa, tén han apya'áseykegkoho nak aqsok;

²⁵ ¡epeykessásekxa apwáxok apyáp tén han egken, egkés ekpayheykekxa awáxok ma'a ektáha axta ektekkesso!

- 17 -

²⁶ Hatte, etaqmelchesho chá'a apháxenmo ekyókxoho sektáhakxa enxoho chá'a sekpeywa ko'o, kalkoho apwáxok se'e sektémakxa nak ko'o;

²⁷ hakte hawók máxek ekmattawóneg la'a m'a kelán'a ekyaqmagkáseyak nak pók énxet ektegye selyaqye, hawók máxek ketsék la'a ekmattawóneg ma'a kelán'a megkatnaha nak entáwa';

²⁸ máxa apmenyexmal'a katnehek kaleyxmakha énxet, apxámok nahan katnehek énxet eknaqtawassáseykha apnaqteyegka'a.

- 18 -

²⁹ ¿Yaqsa énxet aplegágkoho nak? ¿Yaqsa énxet appaqméteyncha'a nak? ¿Yaqsa énxet apkelátegmoweykpo nak? ¿Yaqsa énxet apkelekxagweyncha'a nak? ¿Yaqsa énxet kélyensasa nak meykexho aqsok eksexnenagko? ¿Yaqsa énxet élyeyha nak exma apkelyeheykha?

³⁰ Neykhe m'a énxet melwátésseyam nak apyá vino, keñe han ma'a apkelyekkóneykha nak chá'a m'a kaxwe élánamáxche nak anmen.

³¹ Ná elano m'a vino, ekyexwáseykekxa nak égmenek, élyenma nak ma'a kélyeta nak. ¡Ekmátsa nak annaqsapok!

³² Máxa eyke yéwa sentakxól'a katnehek natámen, henlegássesagkohok ekmáske.

³³ Kaxekmósek sa' chá'a m'a aqsok meteykxa nak, exénwók sa' aqsa chá'a aqsok ekyeyháxma;

³⁴ yának sa' yántáha aqsok ma'a neysekso nak wátsam ekwányam, yának sa' épetcha'ak ma'a yámet ekyawe nak naw'a,

³⁵ tén sa' etnehek se'e: “Éltekpagáha eykhe, makke añégkok ekmáske; élyekpexchetáha eykhe han, makke han ay'ásegkok; ekxátekhágwokmek sa' agkok éllawa enxoho sekya, keñe sa' ataqhohok ategyágwakxak makham mók vino.”