Proverbios 22 - Biblia Enxet

¹ Tásek kataqmelek chá'a nenxénamaxche', kaxnók anxámasagkok ma'a aqsok egagkok, tásek antemhek ekha sẽláyo, kaxnók kaxek ekxámokma m'a sawo ekyátekto ekmomnáwa, tén han ma'a sawo ekmope ekmomnáwa.

² Hawók mók ektémakxa m'a ekxákma nak aqsok apagkok tén han meyke nak aqsok apagkok: Wesse' egegkok axta apkelane xa apqánet nak.

³ Étak chá'a aqsok ekmaso m'a énxet ekha nak chá'a élchetámeykha apwáxok, keñe étnakhaksek chá'a; keñe m'a meyke nak chá'a élchetámeykha apwáxok, exog aqsa, keñe eñegkohok chá'a ektemégweykmoho exma ekmaso.

⁴ Hegwetaksohok ekxákma aqsok egagkok ma'a nenteme nak chá'a megkeymáxkoho egwáxok, tén han ma'a nenteme nak negáyo Wesse' egegkok, ekha sẽláyo han antéhek, hegwetaksek han ekwenaqte negweynchámeykha.

⁵ Xámok kelhanma ámay apagkok ma'a énxet ekmaso nak aptémakxa'; tén han am'ák, étnakhaksek eyke chá'a m'a apmeyámakpoho apagko' nak chá'a.

⁶ Elxekmós aptémakxa ektaqmela sakcha'a aptáhakxa nak makham ketchetse', keñe sa' ma'a aptáha enxoho apwányamo, megkalwánaqmék chá'a.

⁷ Ekxákma apkelnaqta aqsa etnehek wesse' m'a nepyeseksa nak énxet'ák meyke aqsok apagkok; keñe m'a apmassáseykha nak chá'a selyaqye apagkok pók, etnehek apkemha apmonye' apagkok ma'a ektáha nak chá'a apmassáseykha selyaqye apagkok.

⁸ Énxet aptekkesso nak aqsok ekmaso, kápekxak sa' aqsok ekmaso aptekkesso; ¡Emasséssók sa' Wesse' egegkok yetlo aplómo apagko'!

⁹ Dios sa' epasmok ma'a énxet ektaqmeleykha nak chá'a apwáxok elanok apnámakkok, eñama apkelmésso chá'a aptéyak ma'a énxet'ák meyke nak aqsok apagkok.

¹⁰ Kéltekkessek agkok ma'a énxet megkeyxnegwayam nak chá'a appeywa, kamaskok ma'a nélenmexamaxche', nélyamatchásamáxche', nénlókáseyak egmók.

¹¹ Yásekhohok wesse' apwányam ma'a énxet megkeyxamaxkoho nak chá'a apwáxok elána', apxegexma chá'a etnehek ma'a appaqmeyesma nak chá'a yetlo ektaqmeleykha appeywa elána'.

¹² Elanha chá'a Wesse' egegkok ma'a énxet apya'áseykegkoho nak aqsok, metnéssesek eyke chá'a naqso' aptáhakxa enxoho m'a énxet apmopwána nak chá'a amya'a.

¹³ Etnehek chá'a epaqmétek énxet apháxamákpoho nak chá'a etneykha s'e: “Yámakméwa yagqak ámay, heyaqhek katnehek.”

¹⁴ Máxa máxek ekmattawóneg agko' ekpeywa m'a kelán'a apha atáwa' élánegwayam nak chá'a pók énxet, apteyeykemxa nak chá'a m'a énxet apkeltaqnagko nak Wesse' egegkok.

¹⁵ Aptémakxa apagko' chá'a apketkók ma'a élyeyháxma nak, kamaskok eyke chá'a kélnókásencha'a enxoho yetlo kélyekpexcheteykha.

¹⁶ Énxet apnaqtawáseykegkoho nak meyke aqsok apagkok yaqwayam exámasagkok aqsok apagkok, essenhan han ma'a apkelmésso nak chá'a aqsok apagkok ma'a ekxákma nak aqsok apagkok, meyke aqsok apagkok sa' katnehek.

Treinta aqsok apkelxeyenma nak ma'a apkelya'áseykegkoho nak aqsok

¹⁷ Etaqmelchesho apháxenmo ekyókxoho aqsok apkelxeyenma nak ma'a apkelya'áseykegkoho nak aqsok; epekken apwáxok ma'a ektáhakxa enxoho sélxekmósso.

¹⁸ Kalkohok sa' apwáxok appekkena enxoho apwáxok, apwanchek sa' chá'a exénekxoho'.

¹⁹ Sakhem agko' xép sekya'assásegwokmo xa aqsok nak, yaqwayam enxoho etnehek apcháyo m'a Wesse' egegkok.

²⁰ Ektáxéssessek xeyep treinta ektémakxa amya'a, ekhágko nak ma'a sẽlpaqhetchesso nak, tén han ma'a negya'áseykegkoho nak aqsok,

²¹ yaqwayam enxoho kalxekmósek ektémakxa nak negyekpelchémo ekmámnaqso', yaqwayam enxoho kapéwhok apkeltennasso m'a apkelmaxneyeykha nak chá'a exchep.

- 1 -

²² Ná etwasagkoho chá'a m'a meyke nak aqsok apagkok, eñama apteme meyke aqsok apagkok, ná eyaqhap eltamhok esexnenak nápaqta'awók segyekpelchémo m'a meyke nak ekmasma,

²³ hakte Wesse' egegkok sa' epasmok ma'a, keñe sa' eñássesagkohok ma'a ektáha nak chá'a apnaqtawáseykegkoho.

- 2 -

²⁴ Ná etne apkelásekhayókxa tén han apkelxegexma'a m'a énxet'ák apkelyennaqteyáseykha nak chá'a apyempe'ék, tén han apkelnatheyáseykha nak chá'a,

²⁵ kaltamék katnehek xép xa apkeltémakxa élmasagcha'a nak ma'a, apsexnánémap apagko' etnehek.

- 3 -

²⁶ Ná exén chá'a xama enxoho eyánmagkassesek apméyak aqsok ma'a pók énxet,

²⁷ hakte méko agkok xép apyánmagkasso, kawomhok sa' kélyementama m'a aptaháno apyetnamakxa nak néten.

- 4 -

²⁸ Nágkólxegkásekxoho chá'a xapop kélagkok ma'a néxa appekkenmakxa axta m'a kélyapmeyk nanók axta kéxegke.

- 5 -

²⁹ Énxet aptaqmelchessamo nak chá'a apkelane aptamheykha, etnehek sa' aptamheykha m'a apheykegkaxa nak apkelwesse'e apkelwányam, metnehek sa' wesse' apagkok ma'a meyke nak kéláyo.