Proverbios 20 - Biblia Enxet

¹ Megkeyxnegwayam appeywa chá'a katnéssesek énxet ma'a vino; kanathéssesha chá'a apwáxok ma'a anmen ekyennaqte nak; megkay'ássesagkehek chá'a aqsok énxet ma'a eyaqha enxoho.

² Máxa yámakméwa ekpáweykha awáxok la'a etnehek aplawa enxoho xama wesse' apwányam; énxet aplókasso enxoho m'a, megkatnehek megyetsapma.

³ Payhawók etnehek énxet melátegmómap chá'a pók, hakte cháxa ektaqmela antéhek xa, apwanchek eyke etekkesek aqsa chá'a m'a ekyeyháxma nak.

⁴ Wokmek agkok ekhem nempeyncheykemxa xapop namyep egagkok, keñe mepeynchemhek xapop namyep apagkok ma'a énxet apháxamákpoho nak etneykha; keñe sa' ekwokmo enxoho ekhem kélnakxamakxa ekyexna, etegyaha sa' eykhe, méteyágwomek sa' eyke.

⁵ Máxa yegmen ekmattawóneg la'a m'a ektémakxa nak élchetámeykha apwáxok énxet, ékpelkohok eyke chá'a m'a énxet apmopwána nak chá'a aqsok.

⁶ Apxámok énxet apxéneykha nak chá'a mekxeykha apnámakkok, magwetyehek eyke xama enxoho énxet ekha kéláyo.

⁷ ¡Apkeleñémo kélketchek apkexeykekxa axta neptámen ma'a énxet ekpéwomo axta aptémakxa', tén han meyke axta aptémakxa'!

⁸ Aphakmek agkok wesse' apwányam ma'a aptaháno segyekpelchémókxa nak, xama apkelányo aqsa etnehek ékpelkohok ma'a aqsok ekmaso nak.

⁹ Méko awanchek katnehek ekpeywa s'e: “Eyaxñásekxeyk ko'o ewáxok, méko may'assáxma.”

¹⁰ Ánet aqsok aptaqnagkamakxa nak ma'a Wesse' egegkok, cham'a kelyetsáteyak megkaxnémo nak chá'a ekwánxa ektegkesso, tén han ma'a kelyetsáteyak ekmenyexmo nak.

¹¹ Aptémakxa chá'a keykpelchexkohok apkelana enxoho chá'a aptémakxa ekpéwomo xama wokma'ák.

¹² Wesse' egegkok axta apkelane s'e egheyk'ák nak, yaqwayam anlegak chá'a amya'a, tén han egaqta'ák yaqwayam agwetak chá'a aqsok.

¹³ Ná etyen chá'a, meyke aqsok apagkok katnehek; etneykha chá'a yaqwayam enxoho kaxek chá'a apto.

¹⁴ “¡Asagko'!”, etnehek ma'a énxet apma nak chá'a aqsok, keñe sa' apma enxoho, kaqheykha chá'a apwáxok aptáhakxa.

¹⁵ Tásók agko' appeywa m'a énxet appaqmeyesmo nak chá'a yetlo apya'áseykegkoho, yeykhásseykmók ma'a sawo ekyátekto ekmomnáwa, tén han ma'a aqsok élyenméyak ekhágko nak se'e ekyókxoho nélwanmeygkaxa nak.

¹⁶ Énxet apxeyenma nak chá'a eyánmagkassesek apméyak aqsok ma'a méteykxa nak, elyementem sa' apkelnaqta, elma sa' ekwokmo apyánmagkásekxo makham.

¹⁷ Atsek chá'a etnehek apmopwána amya'a énxet, keñe natámen máxa katnehek ma'a xapop ánek ekláneyól'a egwáxok.

¹⁸ Katyapok chá'a yaqwánxa etnahagkok énxet'ák ektaqmela enxoho chá'a apkelpaqmeyesma; kóltaqmelcheshok chá'a kélláneykekxa kéltáhakxa peya enxoho kampakhaxche'.

¹⁹ Mopwanchek meltennaha m'a énxet apkeltennágwayam nak aqsa chá'a nátegma, ná epaxqaha chá'a m'a énxet'ák apkeltennágwayam nak aqsa chá'a amya'a nátegma.

²⁰ Énxet apyemneykha nak apyáp tén han egken, yetsapok sa' ektémól'a kaspónak aqsok eyápogwate m'a ekyáqtésakxa agko' nak exma.

²¹ Aqsok megkamáske nak ekwetamaxche sekxo', háwe yaqwayam kapeykásekxak egwáxok.

²² Ná exén chá'a eyaqmagkásekxak kélteméssesakxa'; etne chá'a apcháyo Wesse' egegkok, sa' emallanchesek ma'a.

²³ Etaqnawhok Wesse' egegkok ma'a negmeykha nak kelyetsátéyak ekmenyexmo; mopmenyeyk ma'a kelyetsáteyak ekmenyexmo nak.

²⁴ Wesse' egegkok eyke apkeláneséyak chá'a ektémakxa apxega énxet. Méko enxama negya'áseykegkoho chá'a yaqwánxa agmahagkok.

²⁵ Asagkek eltennaksek aqsa énxet elának aqsok ma'a Dios meyke sekxók élchetámeykha apwáxok, keñe emáwhok elwátessók ektáhakxa apmésso appeywa.

²⁶ Elántekkesek chá'a aphakxa wesse' apwányam apya'áseykegkoho nak aqsok ma'a élmasagcha'a nak apkeltémakxa, elteyágkasek chá'a aqsok amnek.

²⁷ Espíritu apmésso nak chá'a énxet ma'a Dios, ekteme élsássessóxma kañók agko' apwáxok ma'a énxet.

²⁸ Megkamassegwomek chá'a apteme wesse' apwányam aptémakxa nak chá'a wesse' apwányam, apkelánesa enxoho chá'a ektaqmalma apheykha énxet'ák, yetlo apkelásekhayo, tén han ekmámnaqso'.

²⁹ Apkelyennaqte chá'a ekpeykessáseykekxa apkelwáxok ma'a wokma'ák; keñe apkelwányam kagkések chá'a ekha kéláyo m'a ektémakxa nak élmope apqatkok.

³⁰ Kamasseksek chá'a nentémakxa ekmaso m'a negmatñencha'a enxoho tén han sẽlyensasa enxoho; kataqmelekxak chá'a nentémakxa m'a sẽlyekpexcheteyncha'a enxoho.