Proverbios 2 - Biblia Enxet

Negya'áseykegkoho aqsok negma takha'

¹ Hatte, elyahakxoho chá'a sektáhakxa enxoho sekpeywa; epekken apwáxok ma'a séltémókxa nak etnehek.

² Yeyxho ekpeywa m'a negya'áseyak nak aqsok; egkés apwáxok ma'a negmowána nak aqsok.

³ Nágyésap ewónmakha m'a negmowána nak aqsok tén han negyekpelchémo;

⁴ ná elwátessem aqsa apketamso, etne sa' ma'a ektémól'a antegyaha sawo ekmope élyenma essenhan ma'a aqsok ekmomnáwa ekpowásamáxkoho nak.

⁵ Tén sa' ey'ásegwók ektémakxa nenteme negáyo Wesse' egegkok; ¡ey'ásegwók sa' ma'a aptémakxa nak Dios!

⁶ Hakte Wesse' egegkok keñamak segmésso ektémakxa negya'ásegwayam aqsok; tén han sẽltámeye, keñe han negyekpelchémo.

⁷ Epasmok chá'a Wesse' egegkok ma'a énxet'ák élpéwomo nak apkeltémakxa', elmeyók han chá'a m'a meyke nak aqsok ekmaso apkeláneyak;

⁸ eltaqmelchesek chá'a m'a énxet'ák apkelánekxésso nak chá'a apheykha apnámakkok yetlo ektaqmalma apteméssesakxa, elmeyók nahan chá'a m'a énxet'ák apteme nak meyenyaweykha.

⁹ Ey'ásegwók sa' ma'a ekpayhawo nak antéhek tén han ma'a aqsok ekpéwomo nak, elának sa' nahan ma'a ekyókxoho aqsok éltaqmela nak,

¹⁰ kamok sa' apwáxok ma'a negya'ásegwayam nak, atsek sa' katnehek ekma enxoho apwáxok.

¹¹ Apmopwána apkeláneykegkoho aptémakxa tén han apmopwána aqsok, sa' katnehek chá'a exchep ektaqmelchesso xa;

¹² sa' kamyók chá'a elának aptémakxa ekmaso m'a, nepyeseksa énxet'ák élmasagcha'a nak apkeltémakxa',

¹³ cham'a énxet'ák apkelwáteséyak nak apkelyetlo ámay ektaqmela, apkelyetleykekxa nak ámay ekyáqtéssamakxa nak exma',

¹⁴ cham'a ekmátsa nak elanagkok aqsok ekmaso keñe han eyaqheykha nak chá'a apkelwáxok ma'a apkeltémakxa ekmaso,

¹⁵ apkelyetleykha nak ámay megkapéwomo apkelyetnakhágwayam nak apkelyetlo m'a ámay ekpéwomo nak.

¹⁶ Sa' kawagkasek han chá'a teyp ekpaqhetchesa enxoho m'a kelán'a megkatnaha nak aptáwa', ekmátsa nak ekpeywa henlána kaltamhok hentegkesek,

¹⁷ cham'a kelán'a ekyámasma axta atáwa' ektémakxa axta étkok, megkaxeyenma nak awáxok Dios éltennassama axta megkayenyewe'.

¹⁸ Negmahágkek agkok axagkok ma'a kelán'a nak, cháxa negyetlawa ámay nétsapmakxa xa;

¹⁹ melánteypekxók chá'a énxet ektáha enxoho apkelántaxnegwayam axagkok xa kelán'a nak, kamaskok chá'a apkelweynchámeykha m'a ámay ekyetnamakxa nak ekyennaqte egnények.

²⁰ Étlow xép ámay apagkok ma'a énxet'ák éltaqmalma nak apkeltémakxa, etne m'a apkeltémakxa nak énxet'ák élpéwomo nak apkeltémakxa'.

²¹ Hakte cham'a énxet'ák élpéwomo nak apkeltémakxa', tén han ma'a meyke nak ekmaso apkeltémakxa'; elweynchamha sa' makham keso náxop;

²² keñe sa' ma'a énxet'ák élmasagcha'a nak apkeltémakxa' kólmasséssók sa' apheykha keso náxop, kólántekkesek sa' han ma'a énxet'ák melya'assáxma nak.