Proverbios 19 - Biblia Enxet

¹ Tásek antéhek meyke aqsok egagkok tén han meyke nentémakxa, kaxnók antéhek ma'a segyeyháxma tén han negmowána amya'a.

² Asagkek agmáwhok agko' anlának aqsok meyke nak sekxók élchetámeykha egwáxok; magaqhók chá'a m'a nempekhésa enxoho chá'a.

³ Aptémakxa ekyeyháxma chá'a keytnakhássók apxega m'a énxet, keñe ephéssekxak chá'a apteméssesso m'a Wesse' egegkok.

⁴ Apxámok etnehek apnámakkok ma'a ekxákma nak aqsok apagkok, keñe m'a énxet meyke nak aqsok apagkok, kammohok melányo m'a apnámakkok apagko' nak.

⁵ Kóllegássesagkohok sa' chá'a m'a apxeyenma nak chá'a apweteykegkoho megkamámnaqsoho; mopwanchek sa' yegketakpok ma'a énxet apteme nak chá'a apmopwána amya'a.

⁶ Énxet segméssamo nak chá'a aqsok segmésso naqsa, tén han memyágweykekxa nak chá'a aqsok apagkok, apyókxoho énxet chá'a ektamok, apchásekhayókxa chá'a etnehek.

⁷ Aptaqnókek agkok apnámakkok ma'a énxet meyke nak aqsok apagkok, ekyágwánxa agkok melanók ma'a apkelxegexma'a nak.

⁸ Énxet apwete nak apya'ásegwayam tén han apkelane nak ma'a ektémakxa nak apya'ásegwayam aqsok, cháxa apteme apchásekhamakpekxoho apagkok apagko' xa, tásek han katnehek apha.

⁹ Kóllegássesagkohok sa' chá'a m'a apxeyenma nak chá'a apweteykegkoho megkamámnaqsoho; yetsapok sa' eyke m'a apteme nak chá'a apmopwána amya'a.

¹⁰ Megkapayhawok etnehek énxet ekyeyháxma m'a aptémakxa nak ma'a énxet ekxákma nak aqsok apagkok, ekyagwánxa agkok megkapayhawok etnehek apkemha apmonye' kélásenneykha naqsa nepyeseksa m'a apkelwesse'e nak.

¹¹ Ekha élchetámeykha apwáxok chá'a katnésseshok énxet ma'a mepekhésamap nak chá'a elwok, keñe ekha kéláyo chá'a katnéssesek ma'a meyaqmagkáseykekxa nak chá'a mók kélteméssesakxa'.

¹² Máxa yámakméwa ekpáweykha awáxok la'a etnehek aplawa enxoho m'a wesse' apwányam, máxa eyke yálye élyássessól'a pa'at ma'a ektaqmeleyncha'a enxoho apwáxok henlano'.

¹³ Etwássesha chá'a apwáxok apyáp ma'a kélketche ekyeyháxma. Máxa yegmen eksekkenmal'a katnehek ma'a kelán'a ekyenneykha nak chá'a ekpeywa kalának atáwa'.

¹⁴ Egyapmeyk chá'a sempekkencháseykekxa m'a enxagkok tén han selyaqye egagkok; Wesse' egegkok akke keñamak chá'a segmésso m'a entáwa' ekmowána nak aqsok.

¹⁵ Yentexek chá'a katnehek nenteyenma m'a negháxamáxkoho nak, meyk chá'a kaqhek ma'a apháxamákpoho nak chá'a etneykha.

¹⁶ Ahóxek chá'a katnehek apha m'a énxet apkelyeheykekxoho nak segánamakxa; yetsapok eyke chá'a m'a apwanyémo nak chá'a ektémakxa Wesse' egegkok sẽlxekmósso.

¹⁷ Negmésso aqsok apmeykha naqsa m'a énxet meyke nak aqsok apagkok, cháxa negmésa han Wesse' egegkok ma'a aqsok negmésso naqsa, Wesse' egegkok sa' han eyaqmagkásekxak mók aqsok ektaqmela nenlane.

¹⁸ Elyentamakpoho chá'a elxekmósagkok apketche aptáhakxa enxoho makham apketchetse', ná eyeykhássamo aplegassáseykegkoho, yaqhek katnehek.

¹⁹ Exkak chá'a kéllegassáseykegkoho énxet aplómo apagko' nak chá'a; negmássessekmek agkok yaqwayam kóllegássesagkoho', kayágwomhok aqsa aplo.

²⁰ Yeyxho chá'a ektáhakxa kélpaqhetchesso, ema chá'a takha' ektáhakxa kélnókáseykha; keñe sa' etnehek ekha apya'áseykegkoho aqsok.

²¹ Xámok chá'a katnehek ekxénakxa apwáxok elának aqsok ma'a énxet, wánxa eyke aqsa chá'a katyapok ma'a apkeltamho enxoho Dios.

²² Meyke apyenyaweykha pók kélmenyeyk etnehek ma'a énxet; tásek antéhek meyke aqsok egagkok, kaxnók antéhek negmowána amya'a.

²³ Kawegqohok negweynchámeykha m'a nenteme nak chá'a negáyo Wesse' egegkok; kapayhekxak chá'a egwáxok neyseksa negha, méko katnehek xama aqsok ekmaso nenlegeykegkoho.

²⁴ Epogwátek chá'a sokpayhe emok apto m'a énxet apháxamákpoho nak chá'a etneykha, mopwanchek eyke ey'ásekxak apátog.

²⁵ Kéllegassásegkok agkok ma'a énxet megkeyxnegwayam nak chá'a appeywa, keñe sa' ey'ásegwók aqsok ma'a mey'áseyak nak aqsok; xama kélnókáseykha aqsa ey'ásegwók ma'a énxet apya'áseykegkoho nak aqsok.

²⁶ Énxet aptawáseykegkoho nak chá'a apyáp, tén han aptekkesso nak axagkok ma'a egken, cháxa apkelana aqsok segmegqassamo nak, megkapayhawo nak etnehek xama kélketche.

²⁷ Hatte, massék sa' agkok apkelyahákxoho kélnókáseykha, étnakhaksek sa' ma'a kélpaqhetchesso ektaqmela nak.

²⁸ Ey'assók aqsa chá'a ektaqmalma kéllánekxésso amya'a énxet'ák ma'a énxet apxeyenma nak chá'a apweteykegkoho megkamámnaqsoho; aqsok ekmaso aqsa chá'a exének ma'a ekmaso nak aptémakxa'.

²⁹ Penchásexcheyk yaqwayam kóllegássesagkohok ma'a megkalyexnegwayam nak chá'a apkelpeywa; keñe han yaqwayam kólyekpexchetagkok ma'a énxet'ák élyeyháxma nak.