Proverbios 14 - Biblia Enxet

¹ Kalának chá'a axagkok ma'a kelán'a ekya'áseykegkoho nak aqsok; keñe m'a kelán'a ekyeyháxma nak, katsagkásekxohok agkok chá'a eñama ekteme ekyeyháxma.

² Apcháyo chá'a etnehek Wesse' egegkok ma'a ekpéwomo nak aptémakxa'; ewanyaha eyke chá'a m'a ekmaso nak aptémakxa'.

³ Keyxkohok chá'a appeywa m'a énxet ekyeyháxma nak; keñe m'a énxet apya'áseykegkoho nak aqsok, kamyók chá'a m'a aptáhakxa enxoho chá'a appeywa.

⁴ Méko agkok kéltósso yaqwayam kólchakkasek, méko katnehek aqsok ekyexna eknakxamáxche m'a namyep; keñe m'a ekha enxoho kéltósso ekyennaqte, xámok katnehek eknakxamáxche.

⁵ Metnehek apmopwána amya'a m'a apxeyenma nak chá'a apweteykegkoho naqso'; apmopwána amya'a eyke chá'a etnehek ma'a apxeyenma nak chá'a apweteykegkoho megkamámnaqsoho.

⁶ Etegyaha eykhe apya'áseykegkoho aqsok ma'a énxet apwañémo nak chá'a aqsok, méteyágwomek eyke; keñe m'a apmopwána nak aqsok, yeskohok chá'a étak apya'áseyak aqsok.

⁷ Ná épetchegwomho m'a énxet élyeyháxma nak, hakte megkaltamaksek xép aqsok ma'a apkelpeywa nak.

⁸ Keykpelchásseshok chá'a aptémakxa énxet apya'áseykegkoho nak chá'a aqsok ma'a negya'áseykegkoho nak aqsok, keñe m'a énxet ekyeyháxma nak, kalyexanchesha chá'a m'a aptémakxa nak ekyeyháxma.

⁹ Ellektegmaha aqsa chá'a elanagkok aqsok ekmaso m'a énxet'ák élyeyháxma nak, kataqmalmakha eyke chá'a apwáxok elanok Dios ma'a énxet'ák meyke nak apkeltémakxa'.

¹⁰ Ya'ásegkók egwáxok ektémakxa nak eklegeykegkoho ekmáske, megkagkések nahan ekpayheykekxa awáxok ma'a megkateykxa nak.

¹¹ Kólmasséssessók sa' apxanák ma'a énxet'ák élmasagcha'a apkeltémakxa'; tásek sa' eyke katnehek aphéyak apxanák ma'a énxet'ák meyke nak apkeltémakxa'.

¹² Yetneyk ámay apkene nak kataqmelak énxet, nétsapmakxa eyke maheykegkok xa ámay nak.

¹³ Néktegmeykha kápok ma'a senlapwayam nak, massegwokmek agkok ekpayheykekxa egwáxok, kayaqmegekxak ma'a nenlekxagweykha.

¹⁴ Kalkohok chá'a apwáxok elanok aptémakxa m'a ekyeyháxma nak; kalkohok han chá'a apwáxok elanok aptémakxa m'a énxet meyke nak aptémakxa.

¹⁵ Naqsók chá'a etnéssesek ekyókxoho ektáhakxa enxoho apcháneyákpo m'a énxet meyke nak ekxeyenma apwáxok; elanok eyke chá'a sekxók apmahágkaxa m'a énxet ekha nak ekxeyenma apwáxok.

¹⁶ Yáwhok elának aqsok ekmaso m'a énxet apya'áseykegkoho nak aqsok, étnakhaksek nahan, keñe m'a énxet ekmaso nak aptémakxa', megyekyek chá'a elána'.

¹⁷ Megkalchetmek chá'a sekxók apwáxok yaqwánxa elának aqsok ma'a énxet ekmanyehe nak elwok; keñe m'a élchetámeykha nak chá'a sekxók apwáxok, mepekhésakpe'.

¹⁸ Énxet meyke nak élchetámeykha apkelwáxok, kápekxak aqsa chá'a m'a segyeyháxma nak; keñe m'a ekha nak élchetámeykha apkelwáxok, elxawagkok sa' apkelya'áseykegkoho aqsok.

¹⁹ Elháxahagkok sa' chá'a énxet'ák élmasagcha'a nak apkeltémakxa' apmonye'e m'a énxet'ák éltaqmalma nak apkeltémakxa'; keñe sa' ma'a melya'assáxma nak, elpaqmésmakha sa' átog apagkok eltamhok epasmok ma'a énxet'ák élpéwomo nak apkeltémakxa.

²⁰ Kammohok aptaqnaweykekxa apnámakkok apagko' ma'a énxet meyke nak aqsok apagkok; apxámok eyke etnehek apnámakkok ma'a énxet ekha nak aqsok apagkok.

²¹ Aptaqnókek agkok chá'a pók énxet, cháxa apkelana mey'assáxma xa, ¡apkeleñémo eyke m'a énxet apmopyósa nak chá'a elanok ma'a meyke nak aqsok apagkok!

²² Elxegánegwók chá'a ámay apagkok ma'a énxet'ák apmáheyo nak chá'a elanagkok aqsok ekmaso; keñe m'a énxet apmáheyo nak chá'a elának aqsok ektaqmela, yásekhakpohok chá'a, kólpasmaha han.

²³ Awanchek hempasmok ma'a negwasqápeykekxoho nak chá'a nentamheykha; meyke aqsok egagkok akke antéhek ma'a nempaqméteykha naqsa nak chá'a neghakxa'.

²⁴ Énxet ekha nak apya'áseykegkoho aqsok, ekha kéláyo chá'a katnéssesek ma'a apmopwána nak aqsok; keñe m'a élyeyháxma nak, kólya'asagkohok chá'a aptamhéyak élyeyháxma.

²⁵ Ewagkashok chá'a teyp pók ma'a apxeyenma nak chá'a ektáha naqso' apweteykegkoho; esexnenak eyke han chá'a pók yetsapok ma'a apxeyenma nak chá'a apweteykegkoho megkamámnaqsoho.

²⁶ Nenteme negáyo Wesse' egegkok, cháxa nenteme ekyennaqte magya'ásseyam xa, apkelmasma nak chá'a m'a kélketchek.

²⁷ Nenteme negáyo Wesse' egegkok, cháxa éñamakxa m'a ekyennaqte nak egnények, segmallahanchessamól'a sẽlpextehetma nétsapma.

²⁸ Ekyawe apcheymákpoho etnehek wesse' apwányam ma'a apxámokma nak énxet'ák apagkok; mékoho eyke etnehek wesse' apwányam ma'a apqántawók enxoho énxet'ák apagkok.

²⁹ Énxet mepekhésso nak chá'a elwok, cháxa magkenatchesso ekyetna ekyawe apyekpelchémo aqsok; énxet appekhésamap nak, cháxa magkenatchesso apteme ekyeyháxma.

³⁰ Hegméshok ekyennaqte egyempehek ma'a ektaqmeleykha nak chá'a egwáxok; kaxnók ma'a nennathe nak chá'a aqsok, kakpelkok ẽxchakkok.

³¹ Énxet aptawáseykegkoho nak chá'a m'a meyke nak aqsok apagkok, elókasek chá'a m'a ektáha axta Apkelane keñe m'a apmopyósa nak chá'a elanok pók, ekyawe kéláyo chá'a etnéssesek Wesse' egegkok.

³² Kasexnáneyekxohok agkok chá'a aptémakxa ekmaso m'a énxet ekmaso nak aptémakxa'; keñe m'a énxet meyke nak aptémakxa, kamyók chá'a m'a meyke aptémakxa nak.

³³ Keytek chá'a negya'áseykegkoho aqsok apkelwáxok ma'a énxet ekpéwomo nak chá'a élchetámeykha apkelwáxok, keñe m'a énxet'ák élyeyháxma nak, melweték ektémakxa'.

³⁴ Kaxátekhaksek chá'a apchókxa m'a ekpéwomo nak nentémakxa'; kalmegqaksek eyke chá'a énxet'ák ma'a mólya'assáxma nak.

³⁵ Yásekhohok chá'a wesse' apwányam ma'a apkeláneykha apmopwána nak aptamheykha, etaqnók eyke chá'a m'a megkamopwána nak aptamheykha.