Proverbios 13 - Biblia Enxet

¹ Elyahakxohok chá'a appaqhetchesa enxoho apyáp ma'a kélketche apya'áseykegkoho nak aqsok; keñe m'a apchásennamap nak, melyahakxeyk chá'a ektáhakxa kélnokáseykha.

² Aqsok ektaqmela nak chá'a nenxeyenma, awanchek hempasmekxa', keñe m'a énxet'ák appelakkasso nak chá'a elsexnenak apnámakkok, atsek emáwhok elyennaqtésha apyempe'ék.

³ Nenláneykegkoho nentáhakxa nempeywa, cháxa negmeyókaxkoho egagkok egagko' xa; etwasakpohok apagko' eyke chá'a m'a énxet ekxákma nak appeywa.

⁴ Apmenyeyk eykhe katnehek aqsok apagkok ma'a énxet apháxamákpoho nak chá'a etneykha, métyehek eyke; xámok eyke katnehek aqsok apagkok ma'a énxet ekha nak aptamheykha.

⁵ Etaqnawhok negmowána amya'a m'a énxet ekpéwomo nak aptémakxa'; keñe m'a énxet ekmaso nak aptémakxa, elmegqeyk chá'a elanok énxet'ák ma'a aptémakxa, asagkek chá'a katnehek apxénamap.

⁶ Aptémakxa ekpéwomo chá'a kamyók ma'a énxet meyke nak aqsok ekmaso apkelane; aptémakxa ekmaso eyke chá'a katsagkasek ma'a énxet mey'assáxma nak.

⁷ Yetneyk énxet meyke agko' nak aqsok apagkok apkeltemessásamap nak chá'a ekxákma aqsok apagkok, yetneyk han énxet ekxámokma nak aqsok apagkok, máxa eyke meyke aqsok apagkok chá'a etnahágkok.

⁸ Aqsok apagkok chá'a kawagkasek teyp ma'a énxet ekxámokma nak aqsok apagkok; keñe m'a meyke nak aqsok apagkok, meñeyk chá'a xama enxoho kólmáwhok kólteméssessamhok exma ekmaso.

⁹ Máxa cháléwasso eyápogwate etnahagkok ma'a énxet'ák élpéwomo nak apkeltémakxa'; máxa eyke cháléwasso eksapane agko' la'a etnahagkok ma'a énxet'ák melya'assáxma nak.

¹⁰ Nélenmexamaxche aqsa katekkesek ma'a eyeymáxko nak egwáxok, keñe m'a megkaleymáxkoho nak chá'a apkelwáxok, elmok chá'a takha' m'a ektémakxa kélpaqhetcháseykha.

¹¹ Aqsok egagkok ekmanyehe nak chá'a agweta', yahamok kasawhaxche'; kaxámagkok eyke chá'a m'a negáncheseykekxa nak chá'a ketsék ketse'.

¹² Aqsok ekwenaqte nak élhaxnamáxche megkatyapma nak, kayaqhakkasek egwáxok, máxa eyke yámet segméssamo nak ekyennaqte egnények ma'a aqsok ekteyapma nak chá'a negmámenyého.

¹³ Énxet melyaheykekxa nak chá'a kélpaqhetcháseykha, kaqhek sa' apwáxok natámen; exkak sa' eyke ekyánmaga m'a énxet apkelyaheykekxoho nak chá'a segánamakxa'.

¹⁴ Cham'a éñamakxa ekyennaqte egnények ma'a ektémakxa nak chá'a sẽlxekmósso m'a énxet apya'áseykegkoho nak aqsok, segmallahanchessamól'a sẽlpextehetma nétsapma.

¹⁵ Yásekhakpohok chá'a m'a énxet apyekpelchémo nak chá'a aqsok, keñe m'a énxet'ák apkelpelakkassesso nak chá'a elsexnenak apnámakkok, elmahagkok chá'a m'a yaqwánxa nak elsexnenakpok.

¹⁶ Énxet ekha nak chá'a ekxeyenma apwáxok elának chá'a aqsok yetlo apmopwána, keñe m'a ekyeyháxma nak, exekmósek chá'a énxet'ák apteme ekyeyháxma.

¹⁷ Aqsok ekmaso chá'a etekkesek ma'a énxet apseykha amya'a ekmaso nak aptémakxa', etaqmelchessásekxak eyke chá'a apheykha énxet'ák ma'a apseykha amya'a metne nak chá'a apmopwána amya'a.

¹⁸ Meyke aqsok apagkok sa' etnehek ma'a énxet melyaheykekxa nak chá'a kélpaqhetcháseykha, emegqeyk sa' han chá'a; kéláyo ekyawe sa' eyke etnehek ma'a énxet apkelyeheykekxoho nak chá'a ektémakxa kélpékessáseyak.

¹⁹ Ekpayheykekxa egwáxok chá'a hegmések ma'a ektepa enxoho aqsok negmámenyého. Mopwanchek eyke eyenyekxak aqsok ekmaso m'a élyeyháxma nak.

²⁰ Epaxqaha m'a énxet'ák ekha nak apkelya'áseykegkoho aqsok, keñe sa' étak apya'ásegwayam aqsok; epaxqaha m'a élyeyháxma nak, keñe sa' etwasakpok.

²¹ Megkayeykhók chá'a aqsok ekmaso m'a énxet'ák melya'assáxma nak; aqsok éltaqmela sa' eyke elxawak ma'a énxet'ák élpéwomo nak apkeltémakxa'.

²² Xámok chá'a katnehek aqsok apnegkencháseykekxa aptawán'ák neptámen ma'a énxet ektaqmalma nak aptémakxa'; keñe m'a aqsok apagkok nak ma'a énxet'ák melya'assáxma, sa' etnekxak apagkok ma'a énxet'ák élpéwomo nak apkeltémakxa.

²³ Xámo' katnehek nento namyep apagkok ma'a énxet meyke nak aqsok apagkok, kamassegwomhok chá'a nento m'a meykexa nak ekpéwomo nentémakxa.

²⁴ Megyásekhe apketche énxet ma'a menókaseykha nak chá'a aptáhakxa; apchásekhayo apketche énxet ma'a apnókáseykha nak chá'a aptáhakxa.

²⁵ Etwok chá'a apto énxet ekpéwomo aptémakxa ekwokmoho apyaqkanakmo, meyk eyke kaqhek ma'a énxet ekmaso nak aptémakxa'.