Proverbios 11 - Biblia Enxet

¹ Etaqnawhok Wesse' egegkok ma'a kelyetsáteyak ekmenyexmo nak, kalkohok eyke apwáxok ma'a kelyetsáteyak megkamenyexma nak.

² Negmegqakto chá'a hegmések ma'a eyeymáxkoho nak egwáxok; keythok eyke chá'a apkelya'áseykegkoho aqsok ma'a énxet'ák meyke éleymáxkoho apkelwáxok.

³ Apkeltémakxa ekpéwomo chá'a kataqmelchessesek apkelxega m'a énxet'ák apkelpéwomo nak; keñe m'a énxet'ák apkelmopwancha'a nak chá'a amya'a kanaqtawásekxohok agkok chá'a m'a apkelmopwancha'a amya'a nak.

⁴ Mehempasmek sa' ekxámokma aqsok egagkok ma'a ekhem nélyekpelchamáxchexa sa', ektaqmalma nentémakxa sa' eyke hegwagkasek teyp ma'a nétsapmakxa nak.

⁵ Ektaqmalma aptémakxa chá'a kapékesseshok apxega m'a énxet ekpéwomo nak aptémakxa, esexnáneykpekxohok apagko' eyke chá'a kápekxak aptémakxa ekmaso m'a énxet ekmaso nak aptémakxa'.

⁶ Apkeltémakxa ekpéwomo eyke chá'a kalwagkasek teyp ma'a énxet'ák élpéwomo nak apkeltémakxa', étsapeykha apnénya'ák eyke chá'a kalsexnenak ma'a énxet apmáheyo nak chá'a elsexnenak apnámakkok.

⁷ Apketsekkek agkok énxet ekmaso nak aptémakxa', kamassegwók han ma'a apkelhaxneykha tén han ma'a ekxeyenma neykhe apwáxok éta'.

⁸ Emallahancheshok aqsok ekyentaxno Dios ma'a énxet ekpéwomo nak aptémakxa', keñe yának kaphewakxak aqsok ekyentaxno m'a énxet ekmaso nak aptémakxa'.

⁹ Kanaqtawasha chá'a apnámakkok appeywa m'a énxet ekmaso nak aptémakxa', hegwagkashok eyke chá'a teyp apmopwána aqsok ma'a énxet ekpéwomo nak aptémakxa'.

¹⁰ Tásek agkok apheykha m'a énxet'ák élpéwomo nak apkeltémakxa', kalpayhekxak chá'a apkelwáxok ma'a énxet'ák apheykha nak tegma apwányam; apkeletsekkek agkok ma'a énxet'ák élmasagcha'a nak apkeltémakxa', elátsaha chá'a énxet'ák.

¹¹ Exatakhak chá'a xama tegma apwányam eñama kélpasmo m'a énxet'ák apkelpéwomo nak, élmasagcha'a apkeltémakxa' apkelpeywa eyke chá'a katnéssesek apmopso.

¹² Asagkek chá'a katnehek appeywa exének pók ma'a énxet ekyeyháxma nak; keñe m'a énxet metnaha nak ekyeyháxma, ewanmak aqsa.

¹³ Eltennasha chá'a apyókxoho énxet'ák ma'a énxet apkeltenneykha nak chá'a amya'a aplege; ewanmak eyke aqsa chá'a meyke apkeltenneykha m'a énxet ekha nak kéláyo.

¹⁴ Asagkek agkok apxegkesso apchókxa m'a apkelámha apmonye'e nak, ekmaso katnehek; kaxatakhak eyke chá'a m'a apxáma enxoho apkelpaqmeteykha appasmeykha apkeltamheykha.

¹⁵ Asagkek katnehek sentáhakxa m'a nenxeyenma nak agyánmagkassesek aqsok apméyak ma'a magweteykxa nak; tásek katnehek apha m'a énxet mexeyenma nak eyánmagkassesek aqsok apméyak pók.

¹⁶ Ekha kéláyo chá'a katnehek ma'a kelán'a ektaqmalma nak awáxok, keñe m'a énxet apyennaqteyáseykha nak chá'a apyempehek, étak chá'a ekxámokma aqsok apagkok.

¹⁷ Énxet apmopyósa nak chá'a elanok pók, aptaqmelchásamap apagko' chá'a etnehek, keñe m'a énxet megyesseykekxa nak chá'a etwasagkohok pók, apsexnánémap apagko' chá'a etnehek kápekxak aptémakxa ekmaso.

¹⁸ Megkapasmehek ekyánmaga aptamheykha m'a énxet ekmaso nak aptémakxa'; keñe m'a énxet ekpéwomo nak chá'a aptémakxa', naqsók sa' kapasmok ekyánmaga aptamheykha.

¹⁹ Nenlenxányam nak antekkesek aqsok ekpéwomo, agwetak ekyennaqte egnények, keñe m'a nenlenxányam nak antekkesek aqsok ekmaso, agwetak ma'a nétsapma.

²⁰ Etaqnawhok Wesse' egegkok ma'a énxet ekmaso nak chá'a élchetámeykha apwáxok, kalkohok eyke apwáxok elanok ma'a énxet ektaqmalma nak chá'a apkeltémakxa'.

²¹ Naqsók sa' kóllegássesagkohok ma'a énxet ekmaso nak aptémakxa', tásek sa' eyke katnehek apkelmallane m'a énxet'ák élpéwomo nak apkeltémakxa'.

²² Sawo ekyátekto ekmomnáwa kélchexenchessamól'a apwéhek yátapomap, hawók ektémakxa m'a kelán'a ektaqmalma nak, ekyeyháxma eyke.

²³ Tásek chá'a katnehek ekteyapma m'a apkelmopmenyého nak chá'a énxet'ák élpéwomo nak apkeltémakxa'; keñe apkelmopmenyého nak chá'a énxet'ák élmasagcha'a nak apkeltémakxa, wánxa aqsa katekkesek chá'a m'a éllámáxche nak.

²⁴ Yetneyk chá'a énxet memyágweykekxa nak chá'a aqsok apagkok apkelxaweykekxoho aqsok, yetneyk han énxet apmasma nak chá'a aqsok apagkok, meyke aqsok apagkok etnekxa'.

²⁵ Kaxámagkok chá'a aqsok apagkok ma'a énxet memasma nak chá'a aqsok apagkok; exkak nahan chá'a aqsok ma'a énxet apméssamo nak chá'a aqsok pók.

²⁶ Kólyemnaha chá'a m'a énxet apmasma nak chá'a hótáhap apaktek; keñe m'a apkexeykekxa nak chá'a, tásek chá'a katnehek apxénamap.

²⁷ Yásekhakpohok chá'a m'a énxet apketamso nak chá'a aqsok ektaqmela; énxet apketamso nak chá'a aqsok ekmaso, asagkek chá'a katnehek ektáhakxa.

²⁸ Énxet apcháyo nak chá'a ekxámokma aqsok apagkok, máxa yámet áwa' ápak sa' etnehek etyamok, keñe sa' ma'a énxet'ák élpéwomo nak apkeltémakxa, máxa yámet élyápaqmátamo áwa' sa' etnahágkok.

²⁹ Énxet meltaqmelchesso nak ekheykha apxagkok, meyke xama aqsok apagkok sa' katnehek; énxet apya'áseykegkoho aqsok sa' chá'a etnehek apchásenneykha m'a énxet ekyeyháxma nak.

³⁰ Katekkeshok chá'a ekyennaqte apnények énxet ma'a aptamheykha nak énxet ekpéwomo aptémakxa', kaqhohok eyke chá'a énxet ma'a ektémakxa nak apyennaqteyáseykha apyempehek.

³¹ Apxakak sa' agkok ekyánmaga aptamheykha énxet appéwomo keso náxop, ¡sa' ekyagwánxa agkok kóllegássesagkohok ma'a ekmaso nak aptémakxa' tén han mey'assáxma!