Proverbios 10 - Biblia Enxet

Émha amonye' eknaqtáxésamaxche Salomón appeywa

¹ Salomón appeywa: Epeykessásekxak chá'a apwáxok apyáp ma'a kélketche apya'áseykegkoho nak aqsok; éntaxnésseshok eyke chá'a awáxok egken ma'a kélketche ekyeyháxma nak.

² Mehempasmehek ma'a aqsok élmenyexamaxche ekxámokma nak, kaxnók ma'a ektaqmalma nak nentémakxa', hegwagkasek teyp ma'a nétsapmakxa nak.

³ Megyohók Wesse' egegkok kaqhek meyk ma'a énxet ekpéwomo nak aptémakxa', megyohok eyke chá'a étak aqsok apkepmenyéxa enxoho chá'a m'a ekmaso nak aptémakxa'.

⁴ Meyke aqsok egagkok hentemhek ma'a negháxamáxkoho nak antemeykha; xámok eyke katnehek aqsok egagkok ma'a negwasqápeykekxoho nak antemeykha.

⁵ Nennakxo nak aqsok negkeneykekxa m'a ekmakhetmakxal'a, cháxa nenteme negya'áseykegkoho aqsok xa; keñe m'a nenteyenmo nak aqsa m'a ekhem nennakxamakxal'a aqsok negkeneykekxa', cháxa nenteme meyke negmegqakto xa.

⁶ Awanhek katnehek kélpasmo m'a énxet appéwomo nak, keñe m'a ekmaso nak aptémakxa, wánxa aqsa keytek apwáxok ma'a apyennaqteyáseykha nak apyempehek.

⁷ Kaxénwakxohok chá'a kélwáxok aptémakxa axta m'a énxet ekpéwomo axta aptémakxa', yetlo ektaqmalma apxénamap; keñe m'a énxet ekmaso axta aptémakxa', ñohók chá'a kamaskok ekxénweykekxoho kélwáxok.

⁸ Emok chá'a takha' apcháneyákpexa etnehek ma'a énxet apya'áseykegkoho nak aqsok; keñe m'a ekyeyháxma nak chá'a appeywa, etwasakpok chá'a.

⁹ Méko xama aqsok katnehek apkekakxa m'a meyke nak aptémakxa'; keñe m'a énxet ekmaso nak aptémakxa', kataxchek chá'a ektémakxa aqsok ekmaso apkelane.

¹⁰ Etekkesek chá'a aqsok ekmaso m'a énxet aptencháseykha nak apaqtek; keñe m'a ekyeyháxma nak chá'a appeywa, etwasakpok chá'a.

¹¹ Hempasmok chá'a hegmések ekyennaqte egnények appeywa m'a énxet appéwomo nak, keñe m'a ekmaso nak aptémakxa, wánxa aqsa keytek apwáxok ma'a apyennaqteyáseykha nak apyempehek.

¹² Katekkeshok nélenmexamaxche m'a eklo nak chá'a egwáxok, keñe eyke m'a nélásekhamaxkoho nak, kamasseksek chá'a ekyókxoho aqsok ekmaso nenlane.

¹³ Tásek chá'a katnehek apkelpeywa m'a énxet apkelya'áseykegkoho nak aqsok; keñe m'a énxet ekyeyháxma nak, kéméxcheyk chá'a kólyekpexchetchesek apkapok.

¹⁴ Eltamhok chá'a kaxámagkok apkelya'áseyak aqsok ma'a énxet'ák apkelya'áseyak nak aqsok, keñe apkelpaqmeta enxoho m'a élyeyháxma nak, etekkesek cha'a aqsok ekmaso.

¹⁵ Ekxámokma aqsok apagkok chá'a yásenneykxak ma'a apkelwesse'e nak; meyke aqsok apagkok akke chá'a kasexnenak ma'a meyke nak aqsok apagkok.

¹⁶ Ekyennaqte apnények chá'a exkak ekyaqmageykekxa m'a énxet appéwomo nak; keñe m'a ekmaso nak aptémakxa, exámasagkok aqsa mey'assáxma nak.

¹⁷ Énxet apháxenmo nak kélpaqhetcháseykha, emhagkok ma'a ámay ekyennaqtamakxa nak egnények; keñe m'a énxet megyaháxenmo nak kéltennáseykekxoho aptáhakxa, etwasakpok sa'.

¹⁸ Ekpósek chá'a ektémakxa aplo m'a énxet apmopwána nak amya'a, keñe m'a élyeyháxma nak elsawha aqsa chá'a apkelmopwancha'a amya'a.

¹⁹ Énxet ekxákma nak appeywa, xámok chá'a katnehek megyaqhémo appeywa; apya'áseykegkoho aqsok akke m'a apwanmeyeykha nak aqsa chá'a.

²⁰ Hawók appeywa énxet appéwomo m'a ektémakxa nak sawo ekmope élyenma ektaqmalma nak; mékoho agko' eyke m'a ektémakxa nak chá'a élchetámeykha apwáxok ma'a énxet ekmaso nak aptémakxa'.

²¹ Apxámok etnehek énxet ekpasmo appeywa m'a énxet appéwomo nak, keñe m'a énxet ekyeyháxma nak, yetsapok aqsa chá'a eñama apteme ekyeyháxma.

²² Ekxákma aqsok egagkok hegwetaksek ma'a ektémakxa nak Wesse' egegkok sempasmo, megkeypetchek ma'a nenlegeykegkoho nak.

²³ Atsek aqsa chá'a katnehek apwáxok énxet ekyeyháxma apkelana enxoho aqsok ekmaso; keñe m'a énxet apya'áseykegkoho nak aqsok, kapeykessásekxak aqsa chá'a apwáxok ma'a negya'áseykegkoho nak aqsok.

²⁴ Káhapwak chá'a apcháyakxa nak ma'a énxet ekmaso nak aptémakxa, keñe m'a énxet appéwomo nak exkak chá'a m'a aqsok apmopmenyého nak.

²⁵ Wa'ak agkok chá'a éxchahayam ekyennaqte, emassegwók chá'a m'a ekmaso nak aptémakxa', keñe énxet ekpéwomo nak aptémakxa', emallánek chá'a.

²⁶ Máxa yámnátekhet nentól'a etnéssesek ektáha nak chá'a apchápháseykha m'a énxet apháxamákpoho nak etneykha, máxa etnéssesek ma'a éten segaqhél'a.

²⁷ Ahóxek katnehek negha m'a nenteme nak chá'a negáyo Wesse' egegkok, kólyaqwátesseshok eyke chá'a apheykha m'a énxet'ák élmasagcha'a nak apkeltémakxa'.

²⁸ Ekpayheykekxa egwáxok yetnak apmonye'e peya nak elxawagkok ma'a énxet'ák élpéwomo nak apkeltémakxa'; keñe m'a énxet'ák élmasagcha'a nak apkeltémakxa', melxawagkek sa' ma'a aqsok apkelmopmenyého.

²⁹ Elmeyók chá'a Wesse' egegkok ma'a énxet'ák apkeláneyak nak aqsok ektaqmela, emasséssók eyke chá'a m'a énxet'ák apkeláneyak nak chá'a aqsok ekmaso.

³⁰ Méko sa' kaltaqhesha m'a énxet ekpéwomo nak aptémakxa', keñe sa' ma'a énxet ekmaso nak aptémakxa', meweynchamha sa' chá'a keso náxop.

³¹ Negya'áseykegkoho aqsok chá'a katyapok appeywa m'a énxet ekpéwomo nak aptémakxa', keñe m'a énxet ekmaso nak aptémakxa, kólyaqténchesek sa' apaxkok.

³² Exének chá'a aqsok ekleklamókxa nak egwáxok ma'a énxet ekpéwomo nak aptémakxa'; keñe m'a énxet ekmaso nak aptémakxa, wánxa aqsa exének ma'a aqsok ekmaso nak.