Proverbios 1 - Biblia Enxet

Ektémakxa negmeykha negya'áseyák

¹ Keso ektémakxa axta apnaqtáxéseyak Salomón, David axta apketche, wesse' apwányam axta Israel,

² yaqwayam agya'asagkohok negya'áseyak, tén han agwetak sempékessáseyak, hempasmok agya'asagkohok ma'a amya'a ekmámnaqsoho megkaqhémo nak ageyxho',

³ agmok ektémakxa nak sẽlxekmowáseyák, negya'áseykegkoho aqsok, ekpéwomo nentémakxa, ektaqmalma nentémakxa', tén han meyke ekyeykhamaxche mók nenteméssesakxa egnámakkok;

⁴ ólya'assásegwók aqsok ma'a wokma'ák melya'áseyak nak aqsok, tén han agmések apkelyekpelchágwayam tén han agya'assásegwók ektémakxa ektaqmalma élchetámeykha apkelwáxok.

⁵ Yeyxhok ma'a apya'áseykegkoho nak aqsok, keñe yepmenyéhok chá'a mók makham apya'áseykegkoho aqsok, tén han kántagkok chá'a m'a ektémakxa apya'áseyak aqsok,

⁶ yaqwayam enxoho ey'ásegwók ma'a ektémakxa nak chá'a apkelxeyenma m'a apkelya'áseykegkoho nak chá'a aqsok, tén han ektémakxa nak chá'a apkelpeywa, apyetcháseykekxoho, tén han ma'a ekmáske nak agya'asagkoho'.

⁷ Néltamhók agkok antéhek negya'áseykegkoho aqsok, kéméxcheyk sekxók antéhek negáyo Wesse' egegkok; elwanyaha eyke chá'a énxet élyeyháxma xa ektémakxa nak negya'áseykegkoho aqsok, tén han ma'a ektémakxa nak chá'a sẽlpékessáseyak.

Apketkók tén han étkók élxawéyak amya'a

⁸ Hatte, yeyxho chá'a m'a ektémakxa appékessáseyak apyáp, ná eyenyow chá'a ektémakxa élxekmowáseyak ma'a egken,

⁹ hakte kataqmelcheshok sa' xép élnáxegkáseykha xa: máxa sa' katnéssesek ma'a ektémól'a nennatanma ektaqmalmal'a, tén han ma'a nétchesso empátek élyenmál'a.

¹⁰ Hatte, peyk sa' agkok elyexanchesha m'a énxet'ák melya'assáxma nak, ¡ná elyahakxoho aqsa!

¹¹ Sa' eykhe etnehek yának se'e: “Hẽlyetlogma'; ampekkenchesek sa' kelhanma yaqwayam agmok agaqhek ma'a énxet meyke nak aptémakxa.

¹² Apkelyennákxoho sa' ólnápok ma'a énxet'ák meyke nak apkeltémakxa, ektémól'a nétsapma kalmenaqsapok énxet'ák kélxátawayam nak kañe' takhaxpop.

¹³ Agwetak sa' ekxámokma mók ektémakxa aqsok élmomnáwa egagkok, ¡óllánesagkohok sa' enxanák ma'a ekyókxoho aqsok nélmenyexéyak nak chá'a!

¹⁴ Émpoho, etne exchep xa nentémakxa nak negko'o, tén sa' óxpánchesaxchek han ma'a aqsok nélmenyexéyak nak.”

¹⁵ ¡Hatte, ná elyetlow aqsa m'a énxet'ák nak! Ná etne m'a aptamheykegkaxa nak,

¹⁶ hakte yahamók chá'a elanagkok aqsok ekmaso m'a; ¡yahamók chá'a keytek apkelyógkexma'!

¹⁷ Kaqhok ampekkenek kelhanma m'a ekwet'a enxoho nátetkók,

¹⁸ apnegkenéyak apagko' eyke chá'a etnahágkok kelhanma xa énxet'ák nak, apkelsexnánémakpekxoho apagko' chá'a etnahagkok.

¹⁹ Cháxa ektémakxa m'a énxet étsapeykha nak apnények aqsok: kaqhekxohok agko' chá'a m'a ektémakxa nak apmopmenyého aqsok.

Negya'áseykegkoho aqsok sẽláneyeykha

²⁰ Legáxcheyk ekpeywa negya'áseykegkoho aqsok ma'a ámay nak, tén han ma'a apkelweynchámeykegkaxa nak chá'a énxet'ák;

²¹ entáhak ekpaqméteyncha'a m'a ekyókxoho atña'ák nak, tén han ma'a átog nentaxnamakxa nak tegma apwányam apweynchamakpexa nak énxet'ák:

²² “Wokma'ák megkólya'áseyak nak aqsok, megkólésso nak kóllektegmaha, tén han élyeyháxma nak. ¡Kólwátésák hana kéltémakxa kélteme meyke kélya'áseyak aqsok! ¡Kólwátésák ekmátsa nak kélya'ásseyam, nágkóltaqnow ma'a negya'áseyak nak!

²³ Kóleyxho sa' chá'a sélpaqhetchesa enxoho, keñe sa' ayánchesseshok chá'a sélmésso kélyókxoho m'a sekya'áseyak nak ko'o; wának sa' kólya'ásegwók ma'a ektémakxa nak élchetámeykha ewáxok.

²⁴ Élwóneyha ko'o kéxegke, éláneyáha han séltamho kólmeyógmak se'e, makke hélyahákxak kéxegke.

²⁵ Kéltaqhésawók aqsa m'a sekpeywa; megkólmak takha' m'a seknókáseykha nak.

²⁶ ¡Alesmaksek sa' eyke ko'óxa kéxegke eyáhapwa'a enxoho aqsok ekmaso! ¡Alya'ássók sa' ma'a kélyegwaya kélagko' sa',

²⁷ ekwa'a enxoho kélnepyeseksa kéxegke m'a nélmeneykha tén han ekmaso nak negha, magya'áseyak nentáhakxa tén han ekyentaxno egwáxok, ektémól'a éxchahayam ekyennaqte kamasséssók ekyókxoho aqsok!

²⁸ “Hélwónmakha sa' eykhe xa ekhem nak, magwátegmowagkehek sa' eyke ko'o; hélchetmok sa' eykhe, mehelwetekxeyk sa' eyke;

²⁹ hakte kéltaqnagkamchek ma'a ektémakxa nak negya'áseykegkoho aqsok, megkólmáheyók kóltéhek kéláyo Wesse' egegkok.

³⁰ Megkólmenyeyk kólmok takha' m'a sekpeywa nak; kéltaqnagkamchek ma'a sektémakxa nak seknókáseykha.

³¹ ¡Kápekxak sa' xa ektémakxa nak chá'a aqsok ekmaso kélláneyák! ¡Kalleklágwók sa' ektémakxa nak ekmaso kéltémakxa'!

³² Meyke apkelya'áseyak aqsok chá'a kalnápok ma'a melya'áseyak nak aqsok, keñe m'a élyeyháxma nak kalnápok chá'a m'a meyke nak élyetnakhayo apkelwáxok;

³³ wánxa agkok ma'a énxet ektáha nak aptaqmelchessamo apháxenmo sekpeywa, tásek sa' katnehek apha, meyke apkeye xama aqsok ekmaso enxoho.”