Oseas 9 - Biblia Enxet

Oseas apkellegasso kóllegássesagkohok Israel

¹ Nágkólátsaha aqsa énxet'ák Israel; nágkólnextegmakha aqsa néten kalpayhekxak kélwáxok, aptamheykegko nak chá'a pók énxet'ák nak, hakte kélyamasmeyk Dios kélagkok eñama kélláneyak kéltémakxa ekmaso megkólmasexta'a. Atsek chá'a kóltamhok kólxawak ekyánmaga kélláneyak kéltémakxa megkólmasexta'a m'a kélchexakkassamakxa nak chá'a apyempe'ék ma'a hótáhap apaktek.

² Mexek sa' hótáhap apaktek apagkok ma'a énxet'ák Israel, tén han vino apagkok, ketsék agko' sa' katnehek ma'a vino kaxwe élánamáxche nak.

³ Emyekxak sa' makham Efraín ma'a Egipto, Etáswakxak sa' nento élmanyása m'a Asiria. Mexnakha sa' kaxwók ma'a Wesse' egegkok apchókxa nak:

⁴ melyegkenchesek sa' kaxwók anmen yámet égmenek ma'a Wesse' egegkok, melmések sa' han kaxwók ma'a aqsok apkelnapma. Keñe sa' ma'a pán aptéyak nak, etnehek sa' pán nento senlapwayam, keñe sa' ma'a ektáha enxoho chá'a aptéyak, etnahagkok chá'a élmanyása apyempe'ék. Etawagkok sa' chá'a xa pán nak, mopwancha'ak sa' eyke elsakxak ma'a Wesse' egegkok nak tegma appagkanamap apagkok.

⁵ ¿Yaqsa sa' kóllának kéxegke kélessawássessamókxa nak chá'a Wesse' egegkok?

⁶ Apkenyaheykegkek ekmáheyo kólmasséssók ma'a, énxet'ák Egipto sa' eyke yánchásekxa', sa' kólátawanyek ma'a Menfis. Pa'at sa' kápekxak ma'a aqsok éltaqmalma apagkok, sawo' élmope élmomnáwa nak, katyapok sa' yámet ekha nak am'ák ma'a apkelpakxeneykegkaxa nak.

⁷ ¡Wokmek kaxwók yaqwánxa kóllegássesagkoho'! ¡Wokmek kaxwók yaqwánxa kólyaqmagkásekxak ekpayhawo nak kólteméssesek! ¡Ey'asagkohok sa' eyke Israel ekwokmo enxoho xa ekhem nak! Kéltemék chá'a kéxegke s'e: “Ekyeyháxma m'a Dios appeywa aplegasso nak. Ekyeyháxma m'a énxet apha nak apwáxok espíritu.” Kéltemegkek chá'a kéxegke kélpeywa xa ektáha nak, hakte láneyók kélwáxok ma'a kéltémakxa ekmaso, kéllómok kélagko'.

⁸ Apteméssessegkek Dios apkeleyxcháseykha Efraín ma'a aplegasso nak appeywa, kélpekkenchessegkek eyke chá'a kéxegke kelhanma m'a apmahágkaxa enxoho chá'a, ¡weykekxók kéltaqnagko kélwákxo enxoho chá'a m'a Dios tegma appagkanamap apagkok nak!

⁹ Kélnaqtawásamáxkók kélagko', kéltémakxa axta nanók ma'a Guibeá. Kaxénwakxohok sa' eyke apwáxok Wesse' egegkok ma'a kéltémakxa ekmaso, ellegássesagkohok sa' eñama megkólya'assáxma.

Ellegagkohok sa' énxet'ák Israel eñama melya'assáxma

¹⁰ Aptáhak Wesse' egegkok se'e: “Payheykekxeyk axta ko'o ewáxok sekweteya m'a Israel, máxa axta ektemék énxet apwetágwayam la'a anmen yámet ekyexna m'a yókxexma meykexa nak énxet. Máxa axta ektemék ko'o sélányo kélyapmeyk nanók axta kéxegke m'a higo ekyexna amonyel'a. Keñe axta apkelweykmo m'a Baal-peor, apkelmeyásamákpo m'a aqsok kéláyókxa élmowancha'a amya'a nak, apkelmopsagcha'a apagko' axta apkeltemessásamákpok, ektéma nak ma'a aqsok kéláyókxa apkelmopmenyého nak ma'a.

¹¹ Máxa náta sa' katnehek kampak ma'a ektémakxa nak apcheymákpoho m'a Efraín. Mexek sa' chá'a kaxwók sakcha'a kaxwe appalleyam, méko sa' kaxwók katnehek ma'a kelán'ák lós'awo', kamaskok sa' kaxek kélketchek.

¹² Kélwánegkessek sa' agkok kélketchek, ko'o sa' alyementemekxak meyke seyégkesso xama. ¡Asagkek sa' katnehek ektáhakxa xa énxet'ák nak, séxaya sa' ko'o!

¹³ Ekweteyak ko'o Efraín apteméssessama apketchek ektémól'a yaqwayam elnápok ma'a apkelnempaqwáméyak: apkelántekkessegkek chá'a yaqwayam etekyók.”

¹⁴ ¡Wesse', etnésses xép ma'a ekpayhawo nak etnéssesek! ¡Etnéssesák megkate étchek ma'a kelán'ák, tén han meyke neme apyegmenek agkok!

Wesse' egegkok apkeltaqnawéyak énxet'ák Efraín

¹⁵ Aptáhak Wesse' egegkok se'e: “Apkeláneykegkek axta ekyókxoho aqsok ekmaso m'a Guilgal, cha'a seyeynamókxa axta ko'o séltaqnawéyak ma'a. Alántekkesek sa' ko'o exagkok, eñama ekmaso m'a aqsok apkeláneyak; malásekheyk sa' chá'a kaxwo', hakte kalyeyha'ak apkelwáxok ma'a apyókxoho apkelámha apmonye'e apagkok nak.

¹⁶ Apyensegkek ma'a Efraín, máxa m'a yámet élyamayél'a kepmenák, ekmassel'a ekha ekyexna. Étak sa' eykhe apketchek, ko'o sa' eyke alnápok.”

¹⁷ Mopmenyeyk elyahakxohok Dios ahagkok xa énxet'ák nak, cháxa keñamak peya sa' elyetnakhaksek ma'a Dios ahagkok, elweynchamha sa' aqsa nepyeseksa m'a pók aptémakxa nak énxet'ák.