Oseas 5 - Biblia Enxet

¹ “Apkelmaxnéssesso énxet'ák ahagkok, kóleyxho sa' se'e; Énxet'ák Israel, kóltaqmelchesho sa' kélháxenmo; kéxegke wesse' apwányam nak apnámakkok, kóleyxho sa' se'e: Kéxegke sa' kólyekpelchexkoho', hakte máxa kelhanma kélpekkenmal'a kéltemék kéxegke m'a Mispá, tén han xama yám'én kéltegyessól'a m'a egkexe nak Tabor,

² máxa máxek ekmattawóneg la'a kéltemék ma'a xóp ekyapwate nak Sitim. Cháxa keñamak peya nak allegássesagkohok kéxegke.

³ Ekweteyak ko'o m'a Efraín, ekya'ásegkók ma'a Israel. Apkeláneyak aptémakxa ekmaso megkamopsexta m'a Efraín, apkenyetséssegkek apyempehek ma'a Israel.”

⁴ Apkeltémakxa ekmaso megkahayók elyo'ókxak Dios apagkok ma'a énxet'ák, melya'ásegkok ma'a Wesse' egegkok, eñama élmá apkelwáxok apkeláneyak apkeltémakxa ekmaso megkalmopsexta'a.

⁵ Apcheymákpoho keñamak Israel eksexnáneya; pelápagkassek Efraín ma'a mey'assáxma apagko' nak, ¡kawakxohok sa' nahan Judá appelápeyam xamo' ma'a!

⁶ Elxog sa' yetlo apnaqtósso nepkések tén han weyke ektamok ma'a Wesse' egegkok, méteyekxeyk sa' eyke, hakte apkexakhamchek ma'a.

⁷ Apkelyamasmeyk apkelyetleykha m'a Wesse' egegkok, hakte pók énxet apketchek ma'a apketchek nak. Ekmanyehe agko' sa' kólmasséssessók ma'a xapop apagkok nak, eñama apkelyamasma apkelyetleykha m'a Wesse' egegkok.

Énxet'ák Israel kéllegassáseykegkoho tén han Judá

⁸ ¡Kólpáwes sa' kélaqkahasso aqsok egkepetek ma'a Guibeá, kélpáwassamól'a chá'a kempakhakma, kólpáwes kélaqkahasso m'a Ramá! ¡kólána elanagkokxak aptamhágkaxa m'a Bet-avén! ¡Kólteméssesha sa' apkelwáxok ma'a énxet'ák Benjamín!

⁹ Ekxénchek ko'o yaqwánxa katnehek ma'a nepyeseksa nak pók aptémakxa énxet'ák Israel, naqsók sa' katnehek: Ekmaso agko' sa' katnekxak ma'a apchókxa nak Efraín ekwa'a sa' ekhem kéllegassáseykegkoho.

¹⁰ Aptáhak Wesse' egegkok se'e: “Aphawók apkelámha apmonye'e nak Judá m'a énxet'ák apxegkáseykegkohol'a chá'a néxa xapop apagkok. ¡Máxa yegmen ekyegkenamaxchel'a sa' atnehek wáhakkasseták seklo!

¹¹ Mékoho kélteméssessók ma'a énxet'ák nak Efraín, massegkek kélháxenmo m'a ektémakxa nak chá'a ekpayhémo ekha xapop apagkok, hakte apmenyeyk chá'a elyetlakxak ma'a aqsok kéláyókxa élmowancha'a amya'a nak.

¹² Anaqtawasha sa' ko'o m'a énxet'ák Efraín, máxa sa' atnehek ma'a askok ektómól'a apáwa, ekmaso sa' atnessásekxak ma'a Judá, máxa sa' atnehek ma'a ektémól'a yaqtónma yámet.

¹³ “Apwet'ak sa' agkok Efraín apháxekpo, apwet'ak sa' agkok apkelyense m'a Judá, emhagkok sa' Efraín ma'a Asiria etegyaha yaqwayam epasmok ma'a wesse' apwányam ekyawe nak kéláyo, mopwanchek sa' eyke eltaqmelchessók, mopwanchek sa' han eltaqmelchessessók ma'a apkelyense nak.

¹⁴ Sa' atnehek ko'o aktamagkok Efraín, tén han Judá m'a ektémól'a méwa kaktamagkok aqsok, ko'o ahagko' sa' han atnéssesagkok nápakha'a apketkók, tén sa' axñekxak makham, alyenyawasagkokxak sa', méko sa' kalwagkasek teyp.

¹⁵ “Keñe sa' ataqhohok makham ma'a séñamakxa, ekwokmoho apkelya'ásegwokmo melya'assáxma m'a, tén han apkelchexyekmo enxoho hektamok ko'o. ¡Hektamok sa' neyseksa apkellegeykegkoho!”