Oseas 3 - Biblia Enxet

Oseas tén han kelán'a ektawáseykegkoho atáwa' élánegwayam chá'a pók énxet

¹ Aptáhak axta makham seyáneya Wesse' egegkok se'e: “Exeg makham, yásekhekxoho makham ma'a kelán'a élane nak ma'a pók, cham'a ektawáseykegkoho nak atáwa' élánegwayam pók énxet. Cháxa aptémakxa Wesse' egegkok apkelásekhayo m'a israelitas, elyo'ókxohok eykhe chá'a m'a mók aqsok apkeláyókxa nak, etawagkok han chá'a m'a anmen yámet ekyexna kélyamasso kélyaqyeyáseykekxa kélmésso nak chá'a.”

² Keñe axta sekma xama kelán'a, ekyánmagkassek axta quince sawók selyaqye élmope, tén han trescientos treinta kilos ma'a apho nak hótáhap.

³ Axta ektáhak seyáneya s'e: “Ahóxek sa' katnehek sektamheykha sekxegexma exche'; nágkagkés ekyókxa pók énxet ekha ekyánmaga, nágkalánegwom pók énxet, atnehek sa' ko'óxa xa ektáha nak meyke sektawáseykegkoho.”

⁴ Ahóxek sa' katnehek meyke wesse' apwányam apagkok ma'a israelitas, tén han meyke apkemha apmonye' apagkok, keñe han meyke apkelnapma chá'a aqsok apnaqtósso, tén han meteymog élpagkanamaxche', tén han meyke apkelnaqta apkelmeykegko nak chá'a apkelmaxnéssesso Dios énxet'ák apagkok, tén han kéleykmássesso étkók ma'a apxanák nak.

⁵ Keñe sa' natámen xa, elchexyók ma'a israelitas, elchetmok sa' Dios Wesse' apagkok, tén han ma'a David apteme nak wesse' apwányam apagkok, elyo'ótak sa' yetlo apkeláyo Wesse' egegkok amonye' ektemegwánxa néxa', tén han etegyagkok aqsok éltaqmela yaqwayam nak elmések.