Oseas 2 - Biblia Enxet

¹ Keñe sa' kéxegke kóltéhek kólának kélyáxeg'a s'e: “Dios énxet'ák apagkok”, tén sa' kélyáxeg'a kelwán'ák kóltéhek kólának se'e: “Kélásekheykekxoho”.

Énxet'ák Israel apyamasma Dios

² Aptáhak Wesse' egegkok se'e: “¡Kólxénchásekxoho sa' ektémakxa egken, hakte háwe ko'o kaxwók etáwa' m'a, háwe han kaxwók ko'o atáwa'! ¡Kalwataksek sa' ma'a ektémakxa nak ekwetamaxche' ekteme kelán'a ekyaqmagkáseyak pók énxet ektegye selyaqye! ¡Kalwataksek sa' eknegkenchesso yáxña'akxoho nam'agkok ma'a élásekhayókxa nak!

³ Sa' agkok katnahak xa ektáha nak, meyke apáwa agko' sa' atnéssesek ekyókxa'; sa' atnéssesek ma'a ektémakxa axta sekxók ektéyeykmo, sa' atnessásekxak ma'a ektémól'a yókxexma meykexa énxet, ekyamáyo agko' la'a xapop, wának sa' katsapok hem eyaqhe.

⁴ Megkalapyóshek sa' alanok ma'a étchek nak, hakte ektémakxa ekyaqmagkáseyak pók énxet ekpathetéyak ektegye selyaqye keñamak ekwete xa.

⁵ Keláneyak axta ekmaso ektémakxa megkamasexta m'a egken nak, massegkek axta ekteme meyke ektémakxa', ektéma axta ekpeywa s'e: ‘Ategyaha sa' ko'o sélpathetéyak, segkésso nak chá'a sekto, tén han ma'a yegmen, tén han nepkések apwa', tén han apáwa apkeláxñeyo nak, tén han pexmok égmenek, tén han ma'a sekya.’

⁶ “Cháxa keñamak peya nak ko'o wáhakkásekxak am'ák ma'a ámay agkok nak, wahaxtegkesek sa' ma'a neyáwa', yaqwayam sa' megkótyehek ámay agkok.

⁷ Kalyetlók sa' eykhe chá'a m'a élpathetéyak nak chá'a, megkaltahanyekxeyk sa' eyke, kalchetmok sa' eykhe, megkalwetekxeyk sa' eyke. Keñe sa' katnehek se'e: Ay'ókxak sa' makham ma'a etáwa' apmonye' axta, hakte tásek axta sekha xamo' ma'a kaxnók se'e kaxwo nak.

⁸ “Makke kay'ásegkok sektáha chá'a ko'o sekmésso m'a hótáhap apaktek, tén han vino, tén han ma'a pexmok égmenek; megkay'ásegkok sektáha chá'a ko'o sekxámassáseyak ma'a sawo ekmope ekmomnáwa, tén han sawo' ekyátekto élmomnáwa nak, éláneya nak chá'a m'a aqsok eyáyókxa'.

⁹ Awaták sa' ko'o makham, alwaták sa' ma'a hótáhap apaktek, tén han vino, ekwokmo enxoho eknakxamáxchexa', almekxak sa' nahan ma'a nepkések apwa' ahagkok, tén han apáwa apkeláxñeyo nak, sélmésso axta yaqwayam kalántaxnekxa'.

¹⁰ Yáxña'akxoho sa' apekkenchesek ekyókxa meyke apáwa, nápaqta'awók ma'a élpatheteykegko nak chá'a. ¡Méko sa' kawának hémentók yaqwánxa nak atnéssesek!

¹¹ Amasséssessók sa' ekpayheykekxa awáxok, tén han ma'a élsawássessamókxa nak chá'a, tén han ma'a pelten aphaxnagkok, tén han ma'a ekhem sábados, tén han ma'a ekyókxoho élsawássessamókxa nak chá'a ekhem.

¹² Amasséssessók sa' ma'a éneykekxa nak anmen yámet, tén han ma'a éneykekxa nak higo, ektéma nak chá'a ekxeyenma s'e: ‘Keso ekyánmaga segkésso nak chá'a ko'o m'a sélpathetéyak nak chá'a.’ Ekmompánaqma sa' atnessásekxak, aqsok nawha'ák éllo sa' katókasek.

¹³ Añássesagkohok sa' ko'o ektémakxa axta m'a nentámen axta élméssama axta chá'a kéleykmássesso m'a aqsok ekmátsa nak ekpaqneyam éten agkok, élnáxegkáseykencha'a axta chá'a élatchessessama aphék ma'a élatchesso aphék, tén han élnatanma, yaqwayam kalyetlók ma'a élpathetéyak nak chá'a, ekmassama axta ekxeyenma awáxok ko'o. Ekxénchek ko'o xa, sektáha nak Wesse'.

Dios apkelásekhayo énxet'ák apagkok Israel

¹⁴ “Wának sa' kamekxak makham awáxok ko'o: ay'aksek sa' yókxexma meykexa nak énxet, kataqmalmakha sa' sekpeywa alána'.

¹⁵ Agkeyásekxak sa' makham ma'a éneykekxa axta anmen yámet, élhaxneykha ektaqmela agkok sa' atnessásekxak ma'a xóp ekyapwate agkok nak Acor Sa' heyásekhekxohok ko'o makham ma'a, ektéma axta m'a ektémakxa axta étkok, ektéma axta m'a ekteyapma axta m'a Egipto.

¹⁶ Keñe sa' héltemhek ‘Etáwa'’, meheltéhek sa' ‘Baal ahagkok’ Ekxénchek ko'o xa, sektáha nak Wesse'.

¹⁷ Kamaskok sa' kaxwók kalxének élwesey m'a Baales, megkalxénaxcheyk sa' nahan chá'a kaxwók xa.

¹⁸ “Alának sa' ko'o ekhémo mók sélpaqhetchásamáxkoho aqsok nawha'ák éllo xa ekhem nak, tén han náta, tén han yéwa, yaqwayam sa' megkalteméssesha m'a énxet'ák Israel, alekkexek sa' ko'o yágke xa apchókxa nak amasséssók sa'; tén han ma'a sókwenaqte, tén han ma'a kempakhakma, yaqwayam sa' exmakha meyke ektáhakxa apkelwáxok énxet'ák ahagkok.

¹⁹ Israel, etáwa' sa' ko'o atnehek megkatnégwayam néxa, etáwa' ahagko', ekhawo nak ekxeyenma m'a segánamakxa nak, megkatnégwomek sa' néxa seyásekhayo, tén han ekmayósa sélányo.

²⁰ Etáwa' sa' ko'o atnehek xeye', mayenyawha sa' chá'a, keñe sa' xeye' héltéhek Wesse'.

²¹ Ko'o Wesse' ektáhak sekpeywa s'e: Apaqhetchesek sa' ko'o m'a néten, keñe sa' néten kaxének kaxwók awáxok xapop;

²² tén sa' xapop kaxének awáxok katekkesek hótáhap, keñe han vino, pexmok égmenek, keñe sa' Jezreel kaxek xa aqsok nak.

²³ Axnésha sa' énxet'ák ahagkok ma'a xapop nak, ahagkok ahagko'; kayóshok sa' ko'o alanok ma'a Lo-ruhama, tén sa' atnehek wának Lo-amí s'e: ‘Xép aptáha énxet ahagkok’, keñe sa' etnehek heyának se'e: ‘¡Xép apteme Dios ahagkok!”