Oseas 10 - Biblia Enxet

Israel kélmassésseyam élwatnamáxchexa aqsok

¹ Aphawók Israel ma'a anmen yámet ekxámokmal'a ekyexna, xámagkek agkok ma'a ekyexna nak, kaxámagkok han chá'a apkeláneyak ma'a élwatnamáxchexa nak aqsok, yágwokmók agkok chá'a ektaqmalma m'a xapop apagkok nak, kayágwomhok han chá'a aptaqmelchessamo apkeláneyak ma'a meteymog élpagkanamaxche nak.

² Ánet apwáxok ma'a Israel, kóllegássesagkohok sa' kaxwók eñama mey'assáxma. Emasséssók sa' Wesse' egegkok ma'a apkelwatnamakxa nak chá'a aqsok, elyaqnegkessesagkok sa' ma'a meteymog élpagkanamaxche apagkok.

³ Keñe sa' kaxwók xa énxet'ák nak etnehek elpaqmétek se'e: “Méko kaxwók wesse' apwányam egagkok, hakte massegkek negáyo m'a Wesse' egegkok. ¿Yaqsa elának xama wesse' apwányam yaqwayam hempasmok negko'o?

⁴ Epaqmésmakha aqsa chá'a, héltennaksek chá'a aqsok apmopwána amya'a, exnéshok aqsa chá'a mók apkelpaqhetchásamákpoho m'a pók apkelwesse'e nak; kaxhok sa' yámet ekmaso m'a ektémakxa nak chá'a apkelánekxésso amya'a énxet'ák, ekteyapmól'a m'a kélpeynchámxa enxoho xapop.”

⁵ Apkelpexyennegkek apkelaye m'a énxet'ák Samaria; kellapwámegkek eñama ekxegányam weyke étkók kéleykmássesso ekyetnama nak ma'a Bet-avén. Apkellekxagweyha apketama énxet'ák, tén han ma'a appasmo apkelmaxnéssesso nak Dios énxet'ák apagkok, hakte massegwokmek ma'a eyaqheykha nak chá'a apkelwáxok.

⁶ Kólsakxak sa' han weyke étkok kéleykmássesso m'a Asiria, yaqwayam sa' kólmések ma'a wesse' apwányam ekyawe nak kéláyo. Keñe sa' emegqeyk ma'a Efraín, kamegqaksek sa' Israel ma'a kéleykmássesso apagkok nak.

⁷ Máxa yámet nekha ketsék sa' etnehek exyenmok ma'a wesse' apwányam Samaria, ekseykhal'a takha' yegmen.

⁸ Kólmasséssók sa' ma'a apkelpeykessamókxa nak chá'a aqsok kéleykmássesso, apkeláneykegkaxa nak chá'a melya'assáxma m'a énxet'ák Israel. Kampagqak sa' ma'a néten apkelwatnamakxa nak chá'a aqsok, katyapok sa' yámet ekha nak am'ák, keñe sa' énxet'ák etnehek elának meteymog élwenaqte élekhahéyak se'e: “¡Hẽlpós negko'o!” keñe sa' etnehek elának egkexe étkók se'e: “¡Hegápekxa negko'o!”

Wesse' egegkok apxeyenma yaqwánxa etnéssesek Israel

⁹ Aptáhak Wesse' egegkok se'e: “Melwáteseykegkok apkeláneyak melya'assáxma m'a énxet'ák Israel, apcheynamo axta apkeláneyak ma'a Guibeá. ¡Melwáteseykegkok melya'assáxma! Cháxa keñamak ekmáheyo nak káhapwak kempakhakma m'a Guibeá, kay'áwak xa élmasagcha'a nak apkeltémakxa.

¹⁰ Allegássesagkohok sa' ko'o xa énxet'ák nak, cham'a sekmako sa'. Épetchekxak sa' pók énxet'ák yenmexek ma'a Israel, cham'a séllegassásegkoho sa', eñama élmasagcha'a agko' apkeltémakxa.

¹¹ “Máxa axta weyke étkok kéltámessól'a m'a Efraín, ekmátsal'a kampaksek apyempe'ék ma'a hótáhap apaktek. Ekpekkenchessek kaxwók nagyétek ektaqmalma nak ma'a yámet, yaqwayam keynyawaksek ma'a ekyenyawasso nak, tén sa' Judá ényawaksek ma'a élchekha nak, keñe sa' Jacob ényawaksek ma'a ektepelcheykekxal'a xapop.

¹² Axta ektáhak ko'o séláneya s'e: Kólchenekxa sa' kéxegke ekpéwomo nentémakxa', tén sa' kólnakxek kólmekxak ma'a negásekhayo nak. Kólpeynchámekxa sa' makham xapop, yaqwayam sa' kólchenekxak makham aqsok, hakte wokmek kaxwók ekhem yaqwayam kólchetmok Wesse' egegkok, ekwokmoho sa' apwa'akto, apsánto sa' ekxámokma agko' nélwagkásamáxche teyp kélnepyeseksa kéxegke.

¹³ Kélcheneykekxeyk eyke kéxegke ekmaso nentémakxa, kélnakxegkek ma'a megkapéwomo nak nentémakxa, kélteykegkek ma'a ekmowána amya'a nak. “Yátnáxeg apkelyenyawasso apagkok apkenchesso nak kempakhakma keñamak apcháyo tén han apxámokma kempakhakma yapmeyk apagkok

¹⁴ keñamak peya katyapok ekyennameykha exma kempakhakma nepyeseksa m'a énxet'ák apagkok, kólmasséssók sa' apyókxoho tegma apkelyennaqte apagkok, ektéma axta apmassésseykmo tegma apwányam Bet-arbel ma'a wesse' apwányam Salmán, cham'a apkempakhaya axta, apkelyepetcháseykencha'a axta xapop chána yetlo étchek yaqwayam elnápok.

¹⁵ Sa' katnehek kéxegkáxa xa ektáha nak, kélheykha nak Betel, eñama ekmaso agko' kéltémakxa. ¡Ektepakxoho ekhem sa' yetsapok wesse' apwányam Israel!