Nahúm 2 - Biblia Enxet

¹ Énxet'ák Nínive, apya'awak kéxegke m'a apmáheyo emasséssók. ¡Kólána yaqnágwakxak néten tegma kélhaxtegkesso nepyáwa' apyennaqte m'a sẽlpextétamo! ¡Kólenmexho sa' ma'a ámay! ¡Kóllánekxa sa' kéltáhakxa yaqwayam kólempakha'! ¡Kólanchásekxa sa' sẽlpextétamo kélagkok!

² Hakte peyk egkeyásekxak makham apcheymákpoho Wesse' egegkok ma'a Jacob, peyk egkeyásekxak makham apcheymákpoho m'a Israel, ektéma axta m'a nanók axta, amonye' axta kélsawhéssamo aqsok apagkok, amonye' axta kélteméssesso m'a ektémól'a anmen yámet meyke axchakkok.

³ Élyexwase apkeláhakkásamap ma'a kempakhakma yapmeyk apagkok nak, apkelyexwase han apkelnaqta m'a sẽlpextétamo apagkok. ¡Appenchessek aptamhágkaxa yaqwayam yempakha'! Máxa táxa m'a yátnáxeg apkelyenyawasso apagkok; apkelakteykpek élpekhésa elxog ma'a yátnáxeg.

⁴ Naqtémaha ekyennaqte agko' yátnáxeg apkelyenyawasso m'a ámay nak, yaqmagáxcheyk mók ma'a apheykegkaxa nak chá'a énxet, máxa m'a yámet éláléwomól'a naw'ék, máxa takha' apkelyenma chá'a entáhak élyeyk'a.

⁵ Apméssek appeywa sẽlpextétamo apkelwesse'e apagkok ma'a wesse' apwányam, apkeltegwákpek apkenyahágko apketámegko m'a tegma kélhaxtegkesso nak, ekyetnakxa nak ekpenchásamaxche m'a yámet ekyawe kélyehegkesso nak átog.

⁶ Apkelmeykáseykxeyk atña'ák ma'a wátsam, keñe apteyekmo m'a tegma aptaqmalma.

⁷ Máxcheyk kélyentamákxo m'a wesse' apwányam aptáwa', kelyetlókok nahan ma'a éláneykha, kelxegáha agkenya'ák, máxa tamhágkok ma'a aptémól'a yágwáx'ay elpáwha, kellekxagweyha éltekpageyncha'a agkenya'ák.

⁸ Máxa ámay ekyétekkessól'a yegmen aptáhak apkenyahágko m'a énxet'ák apheykha nak Nínive. “¡Kólchaqnágwom! ¡Kóltaqhegwom!” entáhak eykhe amya'a apkeláneyákpo, méko eyke ektaqhegwokmo.

⁹ ¡Kólmenyexák sawo ekmope élmomnáwa! ¡tén han sawo ekyátekto élmomnáwa! ¡Xámok agko' aqsok éltaqmalma m'a Nínive!

¹⁰ Kélmasséssekmek Nínive, meyke xama aqsok tamhákxa', ekmaso táhak. Kelyelqáxcheyk apkelwáxok apkelaye, kelpexyennegkek aptapnák, apyókxoho massak apkelyennaqte, kelmópeykxeyk nápaqta'a.

¹¹ ¿Yaqsa ektáha m'a meteymog áxwa yámakméwa axanák nak? ¿Háxko ekhagwekxexa m'a ekheykegkaxa nak chá'a méwa étkók, élyáqtamakxa axta chá'a yámakméwa yetlo étkók meyke ektemegweykmohóxma, meykexa axta chá'a ekmenxeneykha,

¹² eyaqhamakxa axta chá'a ekyógkexma m'a méwa, eyeykegko axta chá'a nekha m'a kelwána nak, tén han ma'a étkók nak, eklánéssama axta meteymog áxwa axagkok ma'a aqsok eyaqhe nak chá'a?

Nínive kélmassésseyam apyókxoho

¹³ Aptáhak Wesse' egegkok ekha nak apyennaqte s'e: “Élenmexchek ko'o kéxegke: alwatnések sa' ma'a yátnáxeg apkelyenyawasso kélagkok kélanchesso nak kempakhakma, éten sa' atnessásekxa'; alnáhakkasek sa' méwa étkók kélagkok; alyementemekxak sa' aqsok kélmeñexéyak ekheykegko nak kañe' kélókxa', kamaskok sa' kañexchek apkelpeywa m'a apseykha nak chá'a amya'a kélagkok.”