Nahúm 1 - Biblia Enxet

Dios apkeltaqnawéyak énxet'ák Nínive

¹ Keso weykcha'áhak apxawe axta eñama kélxekmósso m'a Nahúm apkeñama axta Elcós. Cháxa amya'a ekxeyenma nak ma'a tegma apwányam Nínive.

² Wesse' egegkok apteme Dios, sẽlmeyeykha, tén han apyaqmagkáseykekxa nak chá'a mók kélteméssesakxa: eyaqmagkásekxak chá'a apteméssesakxa m'a ektáha nak chá'a apkenmexeykekxa, eltaqnaweygkok chá'a m'a apkelenmexma nak.

³ Mepekhaksek chá'a elwok ma'a Wesse' egegkok, apmeyhek eyke, megkatnehek chá'a mellegassáseykegkoho m'a apkelsexnánémap nak. Exog chá'a Wesse' egegkok ma'a neyseksa éxchahayam ekyennaqte, cha'a ekpánchesso apmagkok ma'a yaphope nak.

⁴ Epaqhetchesek chá'a ekyennaqte wátsam ekwányam, tén keymek chá'a. Yának chá'a kalyameygkok ma'a ekyókxoho wátsam. Kalyameygkok nahan chá'a pa'at yókxexma Basán, tén han ma'a egkexe Carmelo, kalyameygkok han chá'a pánaqte exnók ma'a Líbano.

⁵ Kalpexyennók chá'a apmonye' m'a meteymog élwenaqte nak; kalpayhekxak chá'a apmonye' m'a xapop élekhahéyak nak. Kayawheykha chá'a xapop ekwet'a enxoho; tén han ma'a ekyókxoho yókxexma nak keso náxop, ekweykekxoho m'a ekhéyak nak awáxok.

⁶ ¿Yaqsa megkatsepek ma'a aplawa enxoho? ¿Yaqsa awanchek kalenmaxaxkohok ma'a aplo nak? Máxa táxa eyáléwe katnehek kapayhekxak ma'a aplo, kamayhekxak chá'a neyseksa apmonye' m'a meteymog.

⁷ Tásek apwáxok ma'a Wesse' egegkok; negyepetchegweykekxexa m'a ekwa'a enxoho ekmaso negha: eltaqmelchesek chá'a m'a apteme nak melya'ásseyam.

⁸ Máxa yégayam élsól'a ekyókxoho aqsok akke etnéssesek emasséssók ma'a ektáha nak chá'a apkenmexeykekxa; ekyáqtésso exma chá'a yáhakkasek ma'a apkelenmexma nak.

⁹ ¿Yaqsa ekxéna kélwáxok kéxegke kéllánegkokxo kélpeywa yaqwánxa kólteméssesek kólenmexek ma'a Wesse' egegkok? ¡Emasséssók sa' kéxegke kélyókxoho m'a! ¡Méko awanchek katnehek ánet énmexeykekxa m'a!

¹⁰ Máxa am'ák eknaqtétamáxche sa' kóltéhek kólmétek kélyókxoho, tén han ektémól'a pa'at apák.

¹¹ Énxet'ák Nínive, kélnepyeseksa kéxegke apkeleñamak apkelánteyapma m'a énxet'ák apkeláneykekxa nak chá'a apkelpaqmeyesma yaqwánxa etnehek yenmexek ma'a Wesse' egegkok: apkeláneykekxa amya'a ekmaso aptémakxa.

¹² Cháxa keñamak aptáha nak Wesse' egegkok apkeláneya énxet'ák apagkok se'e: “Apmelyeyha'ak eykhe m'a asirios, apxámok eykhe han, kólmasséssók sa' eyke, kamaskok sa' apkelwetamap. Éllegassáseykegkok axta ko'o kéxegke, mallegássesagkók sa' eyke kaxwo'.

¹³ Alekkexchesek sa' ma'a aqsok ekyentaxno élyaqhapma nak, alyétekkessesek sa' han ma'a cadenas kélpextete nak.”

¹⁴ Wesse' apwányam Nínive, aptáhak xép apxéna Wesse' egegkok se'e: “Mexek sa' aptawán'ák neptámen, yaqwayam enxoho katepagkok apwesey; amasséssessók sa' ma'a axanák nak aqsok apcháyókxa, cham'a kéleykmássesso nak, tén han ma'a kéleykmássesso kélheyáseykegkoho nak chá'a aqsok, sa' wátawanyek xép ma'a, hakte asagkók agko' xép aptémakxa.”

Nínive aptéyam

¹⁵ ¡Kóllano! ¡Apxegakmek apseykha nak amya'a meyke ektáhakxa egwáxok ma'a néten nak egkexe! Énxet'ák Judá, kóllána kélessawassamo; kóllána m'a kélxeyenma axta chá'a kóllána'. Wánxa sa' kaxwók apkelántaxno xapop kélagkok ma'a énxet'ák élmasagcha'a nak apkeltémakxa; hakte apmassegwokmek apyókxoho m'a.