Miqueas 7 - Biblia Enxet

Israel apkeláneyak aqsok élmasagcha'a

¹ ¡Ko'o laye! ekhawók ma'a énxet apyekhámeykhal'a aqsok natámen eknakxamáxche ekyexna m'a namyep, massék sekwet'a anmen yámet ekyexna, tén han higo ekyexna, sekmáheyól'a chá'a.

² Méko kaxwók énxet ekpéwomo aptémakxa keso náxop, tén han meyenseyam nak ma'a Dios; apkelhaxneykha aqsa chá'a kaxwók apnámakkok yaqwayam elnápok; apnegkenchessegkek aqsa chá'a kelhanma yaqwayam elmok.

³ Apwancha'ak elanagkok ma'a aqsok ekmaso; eltamhok chá'a elxawagkok ekyánmaga m'a wesse' apkeláneykha nak, elmok chá'a takha' kólmések selyaqye yaqwayam mepékesók aqsok apkelxeyenma m'a énxet'ák segyekpelchémo nak, elanagkok chá'a ekxénakxa enxoho chá'a apkelwáxok elanagkok ma'a kelwesse'e nak, etwássesha chá'a apkeltémakxa énxet'ák ma'a tegma apwányam.

⁴ Máxa yámet ekha nak am'ák apkelxénamap nak chá'a éltaqmalma apkeltémakxa xa énxet'ák nak, máxa pegke m'a apkelxénamap nak chá'a ekha kéláyo. Xegakmek eyke ekhem yaqwánxa kólyaqmagkásekxak apkeltémakxa, apkeltennassama axta m'a énxet apkelhaxneykha cham'a aplegasso nak Dios appeywa. Keñe sa' katyapok nepyeseksa melya'áseyak aptamhágkaxa.

⁵ Ná etnésses chá'a naqsók appeywa pók, nágyáwho chá'a xama enxoho m'a apxegexma nak; elanagkoho chá'a appeywa appaqhetchesa enxoho aptáwa'.

⁶ Hakte elwanyaha chá'a apyapmeyk ma'a kélketchek apkelennay'a nak, kalenmexekxak chá'a chána m'a kélketchek kelwán'ák nak, kalenmexekxak chá'a kelyepyámog ma'a atánegken'ák nak, apkelenmexma chá'a etnahagkokxak ma'a apnámakkok apancha'awo nak.

⁷ Aleyxek sa' eyke ko'o m'a Wesse' egegkok; malwataksek sa' sélhaxanma m'a Dios ahagkok sewagkasso nak teyp, hakte yeyxhok sa' ko'o sélmaxnagko m'a.

Israel apkelmallane

⁸ Énxet'ák sélenmexma nak, nágkalpayhekxa kélwáxok kólwetak ekmaso sekha, ekyaqnenmeyk eykhe ko'o, wampekxak sa' eyke makham néten; ekhegkek eykhe ko'o ekyáqtésakxa exma, Wesse' egegkok akke sélsássesso chá'a exma.

⁹ Éláneyak ko'o may'assáxma sénmexeykekxo Wesse' egegkok, cháxa keñamak peya nak alenmaxaxkohok ma'a aplo nak; ékpelkohok sa' ko'o sektémakxa m'a, hélánekxések sa' amya'a. Hey'aksek sa' ko'o Wesse' egegkok ma'a élsakókxa nak exma, yának sa' ótak ma'a segwagkasso teyp apagkok.

¹⁰ Elwetak sa' nahan ma'a sélenmexma nak, cháxa peya sa' kalmegqaksohok apagko' xa. Hakte axta etnehek chá'a heyának se'e: “¿Háxko aphakxa Dios Wesse' apagkok?”, alanha sa' ko'o kaxwo' kólteyammaha ektémól'a yelpa' m'a ámay nak.

Jerusalén apxátekheykekxa

¹¹ Jerusalén, xegakmek ekhem peyakxa nak kóllánekxak ma'a kélhaxtegkesso nak, tén han yaqwánxa kólyanchásekxak ma'a néxa xapop apagkok.

¹² Xegakmek ekhem yaqwánxa sa' kólyo'óták xép apkeleñama ekyókxoho yókxexma: apkeleñama m'a Asiria, ekweykekxoho m'a apkeleñama nak Egipto, apkeleñama nak ma'a wátsam Nilo, ekweykekxoho m'a apkeleñama Éufrates, tén han ma'a apkeleñama nak ekyókxoho wátsam élyawe, tén han ma'a ekyókxoho meteymog élekhahéyak nak.

¹³ Meyke xama aqsok sa' katnekxak ma'a xapop nak, eñama apkeltémakxa m'a énxet'ák apheykha nak ma'a, ekyaqmageykekxa apkeltémakxa ekmaso.

Énxet'ák apkelmaxneyéyak apkeltémo kataqmelekxak apheykha

¹⁴ ¡Wesse', eltaqmelches énxet'ák apagkok, aptáha nak nepkések apnaqtósso apagkok apagko', apkelweynchámeykha nak apxakcha'awók naxma, ekwakhaya nak xapop éltaqmalma! Enaqlakxa m'a ekhakxa nak pa'at Basán tén han Galaad, ektéma axta m'a nanók axta.

¹⁵ Exekmós ma'a aqsok sempelakkasso nak agweta', ektéma axta m'a apkelántekkessama axta Egipto.

¹⁶ ¡Elwetak sa' nahan ma'a pók aptémakxa énxet'ák nak, keñe sa' elmegqáwhok apagko', neyseksa eykhe ekha apkelyennaqte! ¡Meyke apkelpeywa sa' etnahagkok, tén han meyke apkelpeyk'ák!

¹⁷ ¡Elyaqmelmakha sa' xóp ánek ektémól'a yéwa, tén han ektémól'a m'a mók aqsok élpexyaweykegkoho nak náxop kalxog! ¡Elpexyennók sa' elántépok ma'a apxanák nak, yetlo apkelyegwakto ekyawe agko' sa' elyo'ókxak xép, Dios Wesse' egagkok!

Dios meyaqmagkáseykekxa apkeltémakxa énxet'ák apagkok

¹⁸ Méko pók Dios aphawo nak xép, hakte meyaqmagkásekxeyk chá'a exchep nentémakxa ekmaso, kalwanaqmohok nahan chá'a exchep nénmexeykekxa negko'o néleymomáxche nak egqántawók énxet'ák apagkok. Atsek negko'o eltamhók xép henxekmósek segásekhayo, megkawegqók chá'a aplo.

¹⁹ Kapyósho makham henlanok negko'o, élteyammekxa nentémakxa ekmaso. Eyenyow mólya'assáxma m'a éttawanyexa agko' nak wátsam ekwányam.

²⁰ ¡Wesse', ná elwátessem ma'a ektémakxa nak mehegyenyaweykha, tén han segásekhayo apkeltennassama axta etnéssesek nanók axta m'a ẽlyapmeyk nano', cham'a Abraham tén han Jacob!