Miqueas 6 - Biblia Enxet

Dios apkeltennasso Israel aqsok élsexnenagko

¹ Kóleyxho kaxwók kéxegke aptáhakxa nak appeywa Wesse' egegkok: “¡Etnamha, exén kaxwók aqsok apmáheyo exének naqta'awók egkexe, keyxhok sa' appeywa exchep ma'a xóp élekhahéyak!”

² Kéxegke egkexe, kóleyxho sa' se'e tén han xapop awhak: peyk elyekpelkohok kaxwók Wesse' egegkok énxet'ák apagkok, peyk eltennaksek aqsok élsexnenagko m'a énxet'ák Israel.

³ Keso aptáhakxa nak appeywa Wesse' egegkok se'e: “Énxet'ák ahagkok, hélátegmowák sa', ¿háxko sekteméssessamakxa ko'o kéxegke? ¿háxko sekteméssessamakxa ko'o kéxegke sélya'assama exma?

⁴ Élántekkesegkek axta ko'o kéxegke m'a Egipto, sélmallahanchessama m'a ektémakxa axta kélteme kélásenneykha naqsa. Eyáphássessegkek axta ko'o yaqwayam enaqlawha m'a Moisés, Aarón, tén han María.

⁵ Énxet'ák ahagkok, kaxénwakxoho kélwáxok ma'a aqsok ekxeyenma axta apwáxok elának Balac, wesse' apwányam axta m'a Moab, tén han apchátegmoweykegkokxa axta m'a Balaam, Beor axta apketche. Kaxénwakxoho kélwáxok ma'a kélyeykhaya axta Sitim, kélmaheykegko m'a Guilgal, kaxénwakxoho kélwáxok appasmoma axta apkelmallahanchessama m'a Wesse' egegkok.”

Apkelhaxanma nak Wesse' egegkok elának énxet

⁶ ¿Yaqsa sa' ko'o asakxések Wesse' egegkok yaqwayam alpeykesho', cham'a Dios apha nak néten? ¿Awakxaya sa' ko'o aphakxa yetlo sekyentameykekxa weyke étkók kennawo' xama apyeyam agkok, yaqwayam enxoho kawatnaxchek kólmések?

⁷ ¿Kapayhekxaya sa' apwáxok Wesse' egegkok, sélmésa enxoho ko'o mil nepkések apkelennay'a, essenhan diez mil litro pexmok égmenek? ¿Essenhan sekmésa enxoho hatte átnaha apketkok, ekyánmaga sénmexeykekxa Dios, tén han may'assáxma?

⁸ Énxet, apkeltennássek xép Wesse' egegkok ma'a aqsok ektaqmela nak, tén han yaqsa apkelhaxna elának xép: apkelhaxneyk elának ma'a aptémakxa ekpéwomo, tén han apmopyósa elanok pók, tén han elyahakxohok yetlo megkeymáxkoho apwáxok ma'a Dios.

Amya'a ekxénamaxche negmenyexma nak egmók tén han negmowána amya'a

⁹ Apkelwóneyha Wesse' egegkok ma'a apheykha nak tegma apwányam, tásek han ageyxhok yetlo negáyo: “Kóleyxho, énxet'ák, tén han kélpaqhetcháseykha nak chá'a kélnámakkok ma'a tegma apwányam:

¹⁰ Heykegkek aqsok ekxámokma élmenyexamaxche m'a apxanák nak énxet'ák élmasagcha'a apkeltémakxa, tén han ma'a kelyetsáteyak segmenyexmo, sektaqnagkamo nak chá'a ko'o.

¹¹ Mowanchek ko'o alásekhekxohok ma'a apkelmeykha nak chá'a kelyetsáteyak kéllekkesso nak nekha ekyentaxno, tén han ekmowána amya'a nak.

¹² Apyókxoho kelwesse'e apheykha nak se'e tegma apwányam apnaqtawáseykegkoho m'a apmopyóseka nak; apkelmopwancha'a amya'a nahan apyókxoho apheykha nak ma'a, tén han apkelyexancháseykha chá'a pók.

¹³ Cháxa keñamak seklegássásegkoho nak, tén han sekmasséssekmo eñama mey'assáxma.

¹⁴ Etwok sa' eykhe apto, meyaqkanmek sa' eyke, meyk sa' aqsa chá'a kaqhek; yánchásekxak sa' eykhe chá'a apto, yahamók sa' eyke chá'a kasawhaxche', kéméxcheyk sa' agkok chá'a xama aqsok, wának sa' kólmasséssessók chá'a neyseksa kempakhakma.

¹⁵ Eknekxak sa' eykhe chá'a aqsok aktek, menakxek sa' eyke chá'a ekyexna; elyaqhápok sa' eykhe olivo ekyexna, memha sa' eyke m'a pexmok agkok; elteyammok sa' eykhe m'a anmen yámet ekyexna, ménhek sa' eyke m'a égmenek nak.

¹⁶ Hakte apyetlamchek xép aptémakxa axta m'a Omrí, apkeláneyak ma'a aptamheykegkaxa axta m'a Ahab apnámakkok, aptemegkek ma'a aptamheykegkaxa axta. Cháxa keñamak peya nak atnéssesek xép aqsok eyeymáxkohol'a kóllano' tén han apkesmésamap yetlo m'a énxet'ák apagkok, kápekxak sa' xép apkelmegqakto m'a énxet'ák ahagkok.”