Miqueas 5 - Biblia Enxet

David aptáwen neptámen aptépéyak

¹ “Jerusalén, yánchásekxa sa' kaxwók sẽlpextétamo apagkok yaqwayam sa' emyók, hakte nélwakhéxche', peyk kóltekpagkasek apmáxempenek yámet ma'a apkemha apmonye' nak Israel.

² Keñe exchep, Belén Efrata, apteme nak ketchetsek nepyeseksa m'a Judá apnámakkok, xép sa' yenyék etyapok xama wesse' apwányam apagkok Israel, aptáwen neptámen nak ma'a nanók énxet.”

³ Apkexakhamchek eyke kaxwók Wesse' egegkok ma'a ektáha nak énxet'ák apagkok, ekweykmoho sa' ektáha naqláwa m'a kelán'a élhaxanma nak kategkesek étche apkenna'. Keñe sa' kólpáxaqteyásekxak makham ma'a apchókxa xamo' nak israelitas, kélnaqleykekxa axta megkatnahakxa apkelókxa.

⁴ Yempekxak sa' néten ma'a wesse' apwányam yaqwayam sa' eltaqmelchesek ma'a énxet'ák apagkok, yetlo apmopwána, tén han apcheymákpoho eñama nak apmésso m'a Dios Wesse' apagkok, exmakha sa' meyke élya'ásekhaxma m'a, hakte kólteméssesek sa' apcheymákpoho Wesse' egegkok, ekweykmoho m'a néxa xapop nak.

⁵ Esógmak sa' meyke ektáhakxa negha m'a. Apkelántaxnegwa'ak sa' agkok asirios negókxa, tén han apkelántaxnegwa'a enxoho m'a tegma apkelyawe egagkok nak, óláphássesek sa' siete apkelámha apmonye'e, tén han ocho énxet'ák ekha nak kéláyo yaqwayam elenmexek.

⁶ Sa' etnahagkok kelwesse'e apkelwányam Asiria m'a, cham'a apchókxa Nimrod, yetlo apmeykha sókwenaqte, hẽlmallahanchesek sa' nepyeseksa asirios apkelántaxna enxoho negókxa, appayhékxo enxoho m'a kañe' xapop egagkok.

Israel apmassésseyam apkelenmexma

⁷ Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, etnahagkok sa' ma'a ektémól'a yálye, apcháphassól'a Wesse' egegkok, tén han ektémól'a ekmámeye ekpálweyktál'a pa'at, melhaxanma nak chá'a apkeltémókxa etnehek ma'a énxet.

⁸ Keñe sa' nepyeseksa apxámokma énxet'ák, apkeleymomap nak ma'a Jacob énxet'ák apagkok, máxa yámakméwa sa' etnahagkok neyseksa m'a aqsok nawha'ák éllo nak, máxa méwa sa' etnahagkok ekleykhal'a nepyeseksa m'a nepkések kélnaqtósso, ektahanmal'a neyseksa ekyeykhe keñe katnéssesek nápakha'a apketkók, eksawhomól'a kalnápok apyókxoho.

⁹ Wesse', sa' etnehek xép ektamagkok xa, tén han emasséssók apyókxoho m'a apkelenmexma nak.

Néxa kempakhakma tén han kélpeykessamo kéleykmássesso

¹⁰ Keso aptáhakxa nak appeywa Wesse' egegkok se'e: “Annáhakkasek sa' ko'o apkelchánte yátnáxeg xa ekhem nak, asawhaksohok sa' amasséssessók yátnáxeg apkelyenyawasso apagkok apkenchesso nak kempakhakma;

¹¹ apmopsagcha'a sa' atnessásekxak ma'a tegma apkelyawe apagkok nak, alyaqnegkessesagkok sa' ma'a tegma apkelyennaqte apagkok;

¹² asawhaksohok sa' amasséssessók ma'a énxet'ák apagkok ekha nak apkelmopwancha'a, meyke apkeltennasso yaqwánxa katnehek egmonye' sa' atnéssesek;

¹³ amasséssessók sa' ma'a aqsok apcháyókxa nak, tén han ma'a meteymog apkelpeykessamo nak chá'a, yaqwayam sa' melpeykesók chá'a kaxwo' ma'a aqsok apcháyókxa ektáha nak chá'a apkelane apagko'.

¹⁴ Alyaqnegkessesagkok sa' ma'a yámet awhók élyawe apkelpeykessamo nak chá'a, amasséssessók sa' apyókxoho m'a tegma apkelyawe apagkok.

¹⁵ Yetlo seklo sa' ko'o ayaqmagkásekxak setnéssessamakxa m'a pók aptémakxa énxet'ák, mehelyaheykekxa nak.”