Miqueas 4 - Biblia Enxet

Wesse' egegkok apteme wesse' apwányam meyke ektáhakxa negha

¹ Kólteméssesek sa' egkexe meyke ekhémo apyetnamakxa nak Wesse' egegkok tegma appagkanamap apagkok, cham'a amonye' sa' ektemegwánxa néxa ekhem. Katnehek sa' egkexe netnók agko', kalyeykhagkok sa' ma'a ekyókxoho egkexe nak. Apyókxoho pók aptémakxa énxet'ák sa' elmeyógmak ma'a;

² énxet apxámokma apagko' sa' elwa', sa' etnehek apkelpeywa s'e: “Kólchempoho, ólchántek Wesse' egegkok egkexe apagkok, tegma appagkanamap apagkok nak ma'a Jacob Dios apagkok, yaqwayam sa' hẽlxekmósek ma'a ámay apagkok, keñe sa' agkegwának ólyetlók ma'a apkeltamhókxa enxoho chá'a ólyetlók.” Hakte Sión sa' katyapok ma'a nélxekmowásamáxche apagkok nak Wesse' egegkok, Jerusalén sa' kañék ma'a appeywa nak.

³ Etnehek sa' apkelyekpelchémo Wesse' egegkok nepyeseksa m'a pók aptémakxa nak chá'a énxet'ák, elánekxések sa' nahan chá'a ektémakxa apkelenmexamap ma'a apxámokma énxet'ák. Xóp élpeyncheyam sa' etnéssásekxak ma'a sawo élwenaqte apagkok nak, keñe sa' sawhéwa apagkok etnessásekxak ma'a sawo élhaxe. Melnapakpekxék sa' nahan chá'a kaxwók pók ma'a énxet'ák, megkólxekmósek sa' nahan chá'a kaxwo' yaqwayam yempakha'.

⁴ Apyókxoho énxet'ák sa' exmakha meyke apkelaye, exmakha sa' ellókasek apkelyampe kóneg anmen yámet pessesse agkok, tén han kóneg higo yámet. ¡Wesse' egegkok ekha apyennaqte appeywa xa!

⁵ Elyahakxohok chá'a aqsok apcháyókxa m'a pók énxet'ák nak, keñe sa' negko'o ólyahakxohok chá'a Dios Wesse' egegkok meyke néxa.

Elwagkasek sa' teyp Wesse' egegkok ektáha nak énxet'ák apagkok

^6-7 Keso aptáhakxa nak appeywa Wesse' egegkok se'e: “Wánchásekxak sa' ko'o seknaqtósso nepkések xa ekhem nak, cham'a sellegassáseykegkoho axta: élmaso axta apkelyókxa, tén han apkelyampe axta, tén han apkexpánma axta. Atnéssesek sa' ko'o apkelyennaqte m'a apkeleymomap nak. Wesse' sa' ko'o atnehek nepyeseksa m'a énxet'ák ahagkok, ko'o sektáha nak Wesse' kélagkok sekhamakxa nak egkexe Sión, kaxwo' nak, tén han megkatnégwayam néxa.

⁸ Keñe sa' xép, tegma apwányam Jerusalén, tegma apwenaqte tén han apyennaqte nak Sión, xép sa' etnekxak makham tegma apwányam apagkok ma'a apchókxa, ekhawo aptémakxa axta chá'a m'a nanók axta, apheykegkaxa axta apkelwesse'e apkelwányam.”

⁹ ¿Yaqsak ektáha ekpayhencha'a nak apátog? Máxa aptáhak ma'a kelán'a ekmáskel'a awáxok kamáwhok katnehek naqláwa. ¿Meyke wesse' apwányam apagkok enxeykel'a keñamak? ¿Enxeykel'a keñamak apkeletsapma m'a appaqhetcháseykha nak chá'a?

¹⁰ Epexyawha, kapayheykha apátog tegma apwányam Sión, ektémól'a kelán'a káskok awáxok, kamáwhok katnehek naqláwa, hakte elántépok sa' xép énxet'ák apagkok aphakxa, elhók sa' ma'a yókxexma eyáxñe nak, elwakxohok sa' ma'a Babilonia. Elántekkesekxak sa' eyke Wesse' egegkok énxet'ák apagkok ma'a; elwagkasek sa' teyp nepyeseksa m'a apkelenmexma.

¹¹ Apxámok kaxwók pók aptémakxa énxet'ák apyepetchákxo pók apkenmexa exchep, aptáhak apkelpaqmeta s'e: “¡Anlanha sa' kóltawasha Jerusalén!”

¹² Makke elya'ásegkok élchetamso apwáxok Dios xa pók aptémakxa énxet'ák nak, tén han ma'a aqsok apmáheyo nak elána'; melya'ásegkok apmáheyo yánchásekxak, ektémól'a hótáhap apyexna kéltéteykekxa kélchexakkassól'a apyempe'ék apák.

¹³ ¡Tegma apwányam Sión, yempekxa néten, ellegássesagkoho apkelenmexma! Hakte aptáhak Wesse' egegkok se'e: “Agkések sa' ko'o exchep apyennaqte ektémól'a m'a weyke kennawo' sawól'a kepet'ák, tén han sawo ekyexwasel'a aphék, yaqwayam sa' enaqtawasagkohok apxámokma apagko' énxet'ák. Elyementók sa' xép ma'a aqsok apagkok ekxámokma apkelmenyexcháseyak axta pók énxet'ák, keñe sa' hélmések ko'o, sektáha nak Wesse' ekyókxoho keso náxop.”