Miqueas 3 - Biblia Enxet

Amya'a apkelxénamap kelwesse'e ekmaso nak apkeltémakxa

¹ Kóleyxho sa' kaxwo', kelwesse'e, tén han apkelámha apmonye'e nak Israel, ¿yagkapayhawok kéxegke kólya'asagkohok ma'a aqsok ekpéwomo nak?

² Kéltaqnagkamchek kéxegke m'a aqsok ektaqmela nak, keñe kélásekhayo m'a aqsok ekmaso nak; kélhaxyawássessegkek apyempe'ék ma'a énxet'ák ahagkok, yáxña'akxoho kélnegkencháseykekxak apexchakkok.

³ Kélteykegkek yetlo apaqta'ák énxet'ák ahagkok; kélhaxyawássessegkek apyempe'ék, keñe kélekkexchessama apexchakkok; máxa kélteméssessók ma'a ápetek kélmáheyól'a kólxatmok weygke.

⁴ Xama ekhem sa' kéxegke kólwónmakha Wesse' egegkok, megyátegmowagkehek sa' eyke. Exyánegkesek sa' kéxegke xa ekhem nak, eñama kélláneyak aqsok ekmaso.

Amya'a apkelxénamap Dios appeywa apkellegasso sẽlyexancháseykha

⁵ Megkataqmelweykmok apkelxega m'a énxet'ák ahagkok eñama apkelyexancháseykha chá'a m'a apkellegasso nak sekpeywa apkelmopwancha'a amya'a, apkeltennasso nak chá'a katnehek meyke ektáhakxa apheykha m'a apkelmésso nak chá'a aptéyak, keñe eltennaksek chá'a yempakhak ma'a meléyak nak chá'a aptéyak. Aptáhak apkelxéna Wesse' egegkok, cháxa apkellegasso nak appeywa apkelmopwancha'a amya'a:

⁶ “Kamaskok sa' kéxegke kólwetak aqsok kélxekmóssamo axta'a, megkólxének sa' nahan chá'a yaqwánxa katnehek egmonye' ekyáqtésakxaxma.” Kamassegwók sa' kéláyo xa apkellegasso nak sekpeywa apkelmopwancha'a amya'a, kápok sa' aqsa ekyáqtéssóxma.

⁷ Elmegqáwhok apagko' sa' xa apkelwetayo nak chá'a aqsok ekpowásamáxkoho, melya'asagkek sa' aptamhágkaxa m'a apkelxeyenma nak chá'a yaqwánxa katnehek egmonye'. Elwanmeyagkok sa' aqsa xa apyókxoho nak, eñama megyátegmoweykegkokxa m'a Dios.

⁸ Keñe sa' ko'o, heyánchesseshok segkésso sekyennaqte m'a Wesse' egegkok espíritu apagkok, tén han ekpéwomo nentémakxa, tén han magwaye emonye', yaqwayam sa' magwéssekxeyk alxénchásekxohok apkelenmexeykekxoho Dios ma'a énxet'ák Israel tén han melya'assáxma.

Jerusalén apmassegwayam

⁹ Kóleyxho sa' kaxwo' se'e, kelwesse'e, tén han apkelámha apmonye'e nak Israel, kéltaqnagko nak chá'a m'a nentémakxa ekpéwomo, kélyetnakhásseyam nak chá'a ekyókxoho m'a aqsok ekpéwomo nak,

¹⁰ kélmeykha nak kéllane Jerusalén ma'a nentekyawa, kélmeykha nak kéllane tegma apwányam Sión ma'a megkapéwomo nentémakxa.

¹¹ Elmok chá'a takha' elxawagkok selyaqye m'a énxet'ák segyekpelchémo nak tegma apwányam, selyaqye aqsa chá'a eltamhok elxawagkok ekyánmaga apkelxekmósso apnámakkok ma'a apkelmaxnéssesso nak Dios énxet'ák apagkok, keñe m'a apkellegasso nak chá'a Dios appeywa, elmok chá'a ekyánmaga apkeltenneykha elxénmakha appasmo m'a Wesse' egegkok, etnehek chá'a apkelpeywa s'e: “Apheyk negyeseksa negko'o Wesse' egegkok; méko xama aqsok ekmaso awanchek hegáhapwak negko'o.”

¹² Kéxegke keñamak peya kólpeynchámekxohok xóp ma'a egkexe Sión, kéxegke keñamak peya etnekxak nápakha'a apketkók ma'a Jerusalén, tegma apwányam nak egkexe Sión, kápekxak sa' ekmompánaqma m'a egkexe nak tegma appagkanamap.