Miqueas 2 - Biblia Enxet

Kelwesse'e apnaqtawáseykegkoho énxet'ák apmopyóseka

¹ ¡Énxet'ák la'aye, élxéneykha nak apkelwáxok elanagkok aqsok ekmaso neyseksa aphéyak apkelyetnamakxa néten, kelsakak agkok, elanagkok chá'a m'a élxeyenma nak apkelwáxok elanagkok, hakte yetneyk apmopwancha'a elanagkok!

² Katsapok chá'a apnegya'ák elanok xapop, keñe elmok chá'a; katsapok chá'a apnegya'ák elanok tegma, keñe elmenyexek chá'a. Enaqtawasagkohok chá'a énxet yetlo apnámakkok, cham'a ektáha nak chá'a apagkok xapop, tén han ma'a aqsok apkelxaweykekxa nak.

³ Cháxa keñamak aptáha nak Wesse' egegkok se'e: “Yetneyk ko'óxa élchetamso ewáxok yaqwánxa atnéssesek kéxegke. Wáphássesek sa' aqsok ekmaso agko', megkólwanchek sa' kólegketaxche', megkóleyxkók sa' kaxwók kólweynchamha, hakte katnehek sa' ekhem ekmaso agko'.

⁴ Kólmeneykmássesek sa' kéxegke kélmeneykmasso sẽnlapwayam ma'a ekhem sa'. Keñe sa' kóltéhek se'e: ‘Ẽlmasséssekmók egagko' negko'o; kélyaqmagkassek pók apagkok ma'a negókxa, ektáha axta apagkok ma'a Wesse' egegkok, meyke kélnókáseykha xama enxoho; kélexpánchessek xapop egagkok nepyeseksa m'a énxet'ák aptáha nak sẽlma.’”

⁵ Cháxa keñamak peya sa' megkaxek kéxegke xapop kélagkok nepyeseksa m'a Wesse' egegkok énxet'ák apagkok.

Dios appeywa apkellegasso apkelmopwancha'a amya'a

⁶ “Ná hẽlyo'óta chá'a negko'o yetlo sẽllegasseykta amya'a yaqwánxa katnehek egmonye' —etnehek chá'a elpaqmétek ma'a. ¡Yawanchek negko'o hegwohok ma'a aqsok ekmaso nak!”

⁷ ¿Apkeltaqnómakpek enxeykel'a m'a Jacob énxet'ák apagkok? ¿Aplamchek enxeykel'a kaxwók ma'a Dios? ¿Keya aptémakxa Dios elának aqsok xa? ¿Megkataqmalmakhaya chá'a appeywa elának ma'a ekpéwo nak aptémakxa?

⁸ Kélenmexma kaxwók kéxegke kéltamhákxak ma'a énxet'ák ahagkok. Kélyementameykegkek apkelnaqta apkeltaqmalma m'a apkelweykta axta makham apkelenyeykta m'a kempakhakma, cham'a élxeyenma axta apkelwáxok apkelwagkáseykpo teyp.

⁹ Kélántekkessegkek axanák éltaqmeleykegkaxa nak awáxok neyseksa ekheykha m'a kelán'ák, keñe étchek kélyementameykegko, cham'a sélmésso axta ko'o.

¹⁰ ¡Kólchempekxa néten! ¡Kólxeg! Háwe néllókassamakxa negyampe s'e; kólmasséssók sa' meyke eyeymomáxche eñama ekyetno élánamáxche aqsok ekmaso m'a kañe'.

¹¹ Yetneyk agkok xama énxet aptamheykha apmopwána amya'a, etnehek chá'a s'e: “Añeksohok chá'a ko'o kéxegke m'a anmen yámet égmenek, tén han ma'a mók anmen nak”, cháxa yaqwayam etnehek Dios appeywa aplegasso apagkok ekleklamo apwáxok xa énxet'ák nak.

Dios apxeyenma elwagkasek teyp énxet'ák apagkok

¹² Wánchásekxak sa' ko'o apyókxoho Jacob énxet'ák apagkok; ayekhámekxak sa' apqántawók apkeleymomap nak ma'a énxet'ák Israel. Wánchásekxak sa' aptémól'a nepkések yaqnekxak ma'a apxagkok aptémól'a nepkések yaqnekxak ma'a yókxexma ektaqmelakxa nak pa'at, énnegkesek sa' exma eñama apxámokma.

¹³ Dios sa' exog apmonye'e elanaksek ámay, keñe sa' elyetlók ma'a énxet'ák, elántépok sa' ma'a átog nak tegma apwányam. Exog sa' amonye'e apyókxoho énxet'ák ma'a Wesse' apwányam apagkok, cham'a Wesse' egegkok.