Lamentaciones 5 - Biblia Enxet

Ektáhakxa cinco senlapwayam

¹ Wesse' egegkok, kaxénwakxoho apwáxok ma'a sentémakxa axta negko'o; henlano, elano ektémakxa sẽlxéneykha ekmaso.

² Mók nekha apkeleñama kaxwók apkelmák ma'a ekyókxoho aqsok egagkok; pók énxet'ák kaxwók aptáhak apagkok ma'a enxanák nak.

³ Nélyéheykha nentemék, meyke egyapmeyk; máxa xentampe'e tamheykegkok ma'a méme egagkok.

⁴ ¡Nentegye egagko' han chá'a ekha ekyánmaga m'a yegmen; negyánmagkasso han kaxwók ma'a yántápak egagkok!

⁵ Ẽlchexenchessegkek aqsok ekyentaxno egyespa'ák; nélyampaye', mehẽlhayok óllókasek nélyampe.

⁶ Nélmaxneyeykha axta chá'a nentéyak ma'a egipcios tén han asirios.

⁷ Apkeláneykegkek axta melya'assáxma ẽlyapmeyk nano', keñe kaxwók apmassegwokmo, negko'o kaxwók egápeykxak ma'a apkelsexnánémap axta.

⁸ Sẽlásenneykha kaxwók negko'o aptamhágkok ma'a kélásenneykha naqsa nak, méko han xama enxoho yaqwayam hẽlmallahanchesek neyseksa sẽlma.

⁹ Mageygweykekxak nentegyeykegko nentéyak, magayék ma'a kempakhakma yapmeyk apheykha nak meykexa énxet.

¹⁰ Máxa táxa axagkok temék élmeyesma egyempe'ék, kelméxenchessegkek egyempe'ék meyk sẽlnapma.

¹¹ Kélnaqtawáseykegkók kélteméssesseykmoho exma kelán'ák tén han kelán'a étkók ma'a Sión tén han tegma apkelyawe nak Judá.

¹² Kélnaqtehetchessegkek apmék kélmakheyáseykencha'a néten ma'a apkelámha apmonye'e egagkok, massegkek kéláyo m'a apkelwányam nak.

¹³ Kéltekxekxegkek aqsok aktek ektekxekxo m'a énxet'ák apkelyennaqte apagko' nak; kelháxessegkek yántapák élyentaxno m'a wokma'ák egagkok.

¹⁴ Méko kaxwók apkelwányam ma'a atña'ák nak tegma apwányam; massék kaxwók eklegáxko apkelmeneykmasso m'a apketkok.

¹⁵ Massék kaxwók élpayheykxo egwáxok; ekyaqhápeykha egwáxok tamheykekxak ma'a nennéweykha ekmátsa axta.

¹⁶ Teyekmek kaxwók ma'a eyaqheykencha'a axta egwáxok; ¡negko'o la'aye, nenláneykegko nak mólya'assáxma!

¹⁷ Cháxa keñamak élmasagko nak egwáxok; cháxa keñamak élhánaqtama nak egaqta'ák.

¹⁸ Meteymog ektaháneykekxa mók tamheykekxak ma'a egkexe Sión; cha'a élweynchámeykegkaxa nak kaxwók yammáleg ma'a.

¹⁹ Wesse', megkatnégwomek eyke exchep néxa apteme wesse' apwányam; ¡exek sa' chá'a m'a aptaháno eyeymáxkoho nak!

²⁰ ¿Yaqsa ektéma ekmassegweykmo agko' nak negko'o ekxeyenma apwáxok? ¿Yaqsa ektéma segkexakhama nak ekwenaqte agko'?

²¹ ¡Wesse', yána agyo'ókxak makham xép, keñe sa' agyo'ókxa'! ¡Yána katnekxak makham nélweynchámeykha ektémakxa axta nano'!

²² Ẽltaqnaweykegkók apagko' eyke exchep; aplómok apagko' xeyep senlányo.