Lamentaciones 4 - Biblia Enxet

Ektáhakxa cuatro senlapwayam

¹ ¡Peysamákxeyk ma'a sawo ekyátekto ekmomnáwa nak! ¡Massegwokmek élyenma m'a sawo ekyátekto ekmomnáwa agko' nak! ¡Kexpaqneykha ekyókxoho máséyak ámay ma'a meteymog apagkok nak ma'a tegma appagkanamap!

² Máxa weygke apkelánamap la'a yelpa' apkelanél'a xama apkelane yátegwáxwa kaxwók kéltemessásak ma'a apheykha nak Sión, eyaqheykha axta chá'a kélwáxok kóllano', kélhéssamo axta chá'a m'a sawo ekyátekto ekmomnáwa.

³ Weykmók semheg nawha'ák éléyak chá'a nam'agkok ma'a étkók, apkellómók apagko' eyke m'a apheykha nak tegma apwányam ahagkok, máxa m'a xápen apkelleykha nak meykexa énxet megkalmopyósal'a elanok apketkók.

⁴ Hem egkelnapmak ma'a sakcha'a megkalyamasma nak makham neme, kelyamáyak axkok. Kaltemeykha chá'a ektéyak sakcha'a, méko eyke xama enxoho yaqwayam chá'a egkések.

⁵ Meyk kaxwók kelnápak ámay ma'a ekyetnama axta chá'a aptéyak ekxámokma éltaqmalma. Apheykha kaxwók neyseksa aqsok ekmanyása m'a apkektega axta neyseksa aqsok éltaqmalma.

⁶ Awanhók agko' apkeltémakxa ekmaso m'a énxet'ák apheykha nak tegma apwányam ahagkok, megkaxnawok ma'a ektémakxa axta melya'assáxma m'a apheykha nak Sodoma, kélmassésseykmo axta ekmanyehe agko', meyke xama enxoho kélchetámeyak.

⁷ Kelmópowok axta apyempe'ék ma'a énxet'ák agkok, axta kaxnawok ma'a ekweykenxal'a ekmope yeyam appok, kelmópowok axta, axta kaxnawok ma'a ektémól'a weyke nagkeygmenek; yáma élyexwase axta m'a apkelyókxa', axta kaxnawok ma'a meteymog ekyexwasel'a; keltásek axta apkelyókxa', hawók axta m'a meteymog ekyápaqmatél'a.

⁸ Keñe kaxwók apkelpeysekmoho apagko', megkaxnawok ma'a ekweykenxal'a ekyáqtésso exma; méko chá'a kalyekpelkohok ma'a ámay nak. Kelánteyepmeyk apexchakkok, ¡kelyamáyak apyempe'ék ektémól'a yántápak!

⁹ Tásek axta ektémakxa apkeletsapma axta neyseksa kempakhakma, megkaxnawok ma'a apkeletsapma nak meyk élnapma, hakte taqmelcháseykegkók axta aqsa apkeletsapma eñama meyke aptéyak eñama nak keso náxop.

¹⁰ Ekháneykekxa ancha'awók han étchek ma'a kelán'ák éltaqmalma axta awáxok; ektéyak axta tamheykekxak ma'a étchek nak, kélmasséssekmo axta m'a tegma apwányam apagkok nak ma'a énxet'ák ahagkok.

¹¹ Aplómok apagko' ma'a Wesse' egegkok, axta emágweykekxak aplo; apwatnegkek axta m'a Sión keñe apmassésseykmo ekweykmoho m'a apowhók nak.

¹² Apkenagkamchek axta kelwesse'e apkelwányam nak keso náxop, tén han apyókxoho apheykha nak keso nélwanmégkaxa, mopwanchek elántexek katnaha apnámakkok tén han apkelenmexma m'a atña'ák nak Jerusalén.

¹³ ¡Apyókxoho Dios appeywa apkellegasso tén han apkelmaxnéssesso Dios énxet'ák apagkok keñamak ekyegkenamaxko éma apagkok meyke nak apkeltémakxa m'a kañe' nak tegma apwányam!

¹⁴ Apkelyawheykha aqsa apkelweynchámeykencha'a m'a ámay nak tegma apwányam, máxa meyke apaqta'ák aptamheykegkok; apkeltexnémakpek éma, méko kamáwhok kapaknegwomhok ma'a apkelnaqta nak.

¹⁵ Kóltéhek chá'a kólyennaqtések kélpeywa kólának énxet'ák se'e: “¡Kóláwho, nágkólyepetkoho, énxet élmanyása apyempe'ék xa, nágkólpaknegwomho!” “Apkelweynchámeykha aqsa apkelxegányam —etnehek chá'a elxének ma'a melya'áseyak nak Dios—”, mopwanchek ellenxanmagkohok apheykha s'e.

¹⁶ Apkexpánchessegkek Wesse' egegkok ma'a aphakxa nak, massegkek apkeláneykha. Massegkek kéláyo m'a apkelmaxnéssesso nak Dios énxet'ák apagkok, massegkek nahan apkelmopyósa kéllányo m'a apkelámha apmonye'e nak.

¹⁷ Kelyampayak egaqta'ák nélhaxanma, nélhaxanmeyk eyke aqsa, chaqhémok nélhaxanma hempasmok. Nélhaxanmeyk eykhe elwak énxet'ák megkalmopwána nak hempasmok.

¹⁸ Enláneykha chá'a ekyókxoho nélmahágkaxa enxoho chá'a; mogwanchek ólántépok ámay. Ketók negmassamakxa'; ¡wokmek kaxwók néxa nélweynchámeykha!

¹⁹ Apmelyeyhawók apagko' apkenyehéyak ma'a segmenxenma nak, apkelyeykhásseykmók ma'a náta élyawél'a; egmenxeneykha m'a neyseksa egkexe nak, ¡egnegkencháseykegkek kelhanma m'a meykexa nak énxet!

²⁰ Apmomakpek ma'a Wesse' egegkok apkelyéseykha nak, sẽlwasqakkáseykekxoho axta chá'a, cham'a wesse' apwányam nentéma axta chá'a agának se'e: “Aghakha sa' chá'a negko'o aphakxa exchep nepyeseksa énxet'ák yaqwayam hẽlmeyók chá'a”.

²¹ ¡Apchókxa Edom, kaktegmaha, kapayhekxa awáxok; ekhama axta ektéma máxa wesse' ekwányam ma'a yókxexma Us! ¡Kaxkak sa' xeyáxa' m'a ekya ekmáske nak, kaqhek sa' ektémól'a anmen, meyke apáwa sa' kaweynchamha!

²² Sión, massegwokmek kaxwók xeye' eklegeykegkoho; metekkesek sa' kaxwók Wesse' egegkok ey'aksek megkatnahakxa eyókxa'. Keñe sa' xeye' Edom, eñássesagkohok sa' ektémakxa ekmaso, yáxña'akxoho sa' epekkenchásekxak ektémakxa megkay'assáxma.