Lamentaciones 3 - Biblia Enxet

Ektáhakxa ántánxo senlapwayam

¹ Ko'o sekteme sekya'áseykegkoho ektémakxa nenlegeykegkoho eñama señassáseykegkoho Wesse' egegkok aplo.

² Ey'assegkek axta m'a ekyáqtéssamakxa nak exma, éntameykekxeyk axta m'a meykexa nak élseyéxma;

³ yókxoho ekhem axta setekpageykha meyke néxa'.

⁴ Apkelyaqsáseykegkek axta émpehek, nekha'a étkók axta apteméssessók exchakkok;

⁵ ewakhessegkek axta ekmaso ewáxok, tén han seklegeykegkoho;

⁶ exnéssegkek axta ekyáqtéssamakxa exma, ektémól'a m'a apkeletsapma axta nano'.

⁷ Ewakhassegkek axta aphaxta, yaqwayam enxoho matyepe'; élpextetegkek axta cadena élyentaxno;

⁸ élpáxameykha axta eykhe séltémo hepasmok, axta eyke yaháxenmok sélmaxnagko;

⁹ eyáhakkáseykekxeyk emonye' apnegkenma meteymog, ¡apyetnakhásseykmek ma'a ámay ahagkok!

¹⁰ Máxa méwa élyexanmeykha aptemék séláneykencha'a, ektémól'a óso ketók sethanmakxa'.

¹¹ Étnakhásseykmek ma'a ámay ahagkok, élyensepmeyk sepathetma, ¡égwagkassamok apagko'!

¹² ¡Apkeykessegkek axát'ák yágke apagkok keñe sepékessamo semakte!

¹³ Kelántaxnegweykmók sekyókxa m'a yágke sélyáte nak Wesse' egegkok.

¹⁴ Apyókxoho énxet'ák ahagkok sésmésso ko'o; yókxoho ekhem chá'a sésmésso.

¹⁵ Eyánchessessamok ko'o eklo ewáxok Wesse' egegkok; askehek ma'a sekya seyeykegko nak chá'a.

¹⁶ Élekkexchessegkek em'ák seyenhassama ahátog xapop; eyeykegkek xapop.

¹⁷ Massegkek ko'o ekyetno meyke ektáhakxa sekha, élwagqeykmek ma'a ektémakxa ektaqmeleykha egwáxok.

¹⁸ Weykmók ekxeyenma ewáxok ekmassegweykmo ektémakxa sélhaxanma m'a Wesse' egegkok.

¹⁹ Kaxénwakxohok chá'a ewáxok ma'a ektémakxa ekyaqhápeykha ewáxok tén han ekmaso sekha, eklo ewáxok, tén han seklegeykegkoho;

²⁰ xénchek agkok chá'a ewáxok xa, ayelqaxchek chá'a.

²¹ Xama aqsok akke ko'o émenyeyk méhelwánaqmágwome', tén han malwátéssemek sélhaxanma:

²² Méko néxa segásekhayo m'a Wesse' egegkok, megkamassegwomek nahan ektémakxa ektaqmeleykha apwáxok henlano'.

²³ Yókxoho axto'ók chá'a katnekxak axnagkok; ¡awanhók agko' ektémakxa nak mehenyenyaweykha!

²⁴ Keñe axta ektéma ewáxok se'e: ¡Wesse' egegkok apteme ekyókxoho aqsok ahagkok; cháxa keñamak may'ásseykmo nak!

²⁵ Elásekhohok chá'a Wesse' egegkok ma'a ektáha nak chá'a apcháyo, cham'a apkelye'eykekxa nak chá'a.

²⁶ Tásek agwanmak aqsa anleyxek hempasmok ma'a Wesse' egegkok.

²⁷ Tásek elenmaxakpohok xama énxet aqsok ekyentaxno yetlo meyke appekhésamap, eyeynmo aptémakxa wokma'ák.

²⁸ Kéméxcheyk chá'a exek apxakko' énxet tén han ewanma aqsa, apkeltamho enxoho m'a Wesse' egegkok;

²⁹ kéméxcheyk etnehek meyke eyeymáxkoho apwáxok etekxók nápat xapop, lapmaxcheyk keytek apkelhaxanma m'a apmonye';

³⁰ kéméxcheyk egkések apmáxempenek apmáheyo nak etekpagkasek, tén han elenmaxakpohok aptaqnómap ekwányam agko'.

³¹ Megkawegqók segyamasma m'a Wesse' egegkok.

³² Henlegássesagkohok eykhe nahan chá'a, yepyósegwók eyke nahan chá'a henlano', hakte awanhók agko' ma'a ektémakxa segásekhayo.

³³ Megkalchehek eykhe apwáxok henlegássesagkoho, tén han ellegássesagkohok ekmáske m'a énxet'ák.

³⁴ Kélteyammeykha nak meyke apmopyósa kóllanok ma'a apkelmomap nak apkelókxa',

³⁵ essenhan manteméssesso nak chá'a ekpayhawo nak anteméssesek énxet nápaqtók ma'a meyke nak Ekhémo,

³⁶ tén han negyetnakhásseyam nak élánamáxchekxa amya'a, cháxa aqsok apxeyenma nak chá'a Wesse' egegkok megkapayhawo nentáhakxa xa.

³⁷ Xénáxcheyk agkok chá'a xama aqsok, temégwokmok agkok nahan chá'a exma, Wesse' egegkok apkeltémo katnehek xa.

³⁸ Wayak chá'a m'a aqsok ektaqmela nak, tén han aqsok ekmaso, hakte meyke Ekhémo chá'a apkeltémo kawa'.

³⁹ Kaqhok ampaqmeyesmakha sẽllegassásegkoho enxoho eñama nentémakxa magya'assáxma.

⁴⁰ Anlanok sa' nentémakxa, keñe sa' agyo'ókxak makham ma'a Wesse' egegkok.

⁴¹ Agya'assásekxak sa' makham élchetamso egwáxok Dios ma'a néten, tén han nélmaxnagko.

⁴² Nenláneykegkek negko'o mólya'assáxma, nénmexeykekxeyk han, keñe axta exchep mehẽlásekheykekxoho.

⁴³ Egwakhéssegkek aplo, egmenxeneykha, ¡ẽlnapmeyk meyke apmopyósa senlányo!

⁴⁴ Apcháhakkásamákpek yaphope yaqwayam enxoho meñék nélmaxnagko.

⁴⁵ Máxa aqsok apák kélchexakha enteméssessók nápaqta'awók apyókxoho énxet'ák.

⁴⁶ Elpaqmétek chá'a hẽltaqnaweygkok negko'o m'a apyókxoho katnaha egnámakkok;

⁴⁷ nélmenaye, kelhanma, sẽlmassésseyam, tén han ekmaso negha, ¡cháxa sentéma nak negko'o xa!

⁴⁸ Kelpexyawánteyk ahaqtek égmenek sekwet'a kélmasséssekmo m'a tegma apwányam ahagkok seyásekhayókxa nak.

⁴⁹ Kelpexyaweykenteyk ahaqtek égmenek meyke néxa, hakte móteyagwomek setaqmelchesseyam

⁵⁰ ekwokmoho senlano Wesse' egegkok apha nak néten, cham'a aphamakxa nak.

⁵¹ Kelmássegkek ahaqta'ák ekweykekxoho kañe' ewáxok, eñama m'a ektémakxa nak kelán'ák ma'a tegma apwányam.

⁵² Máxa náta etnéssessók seyaqmáseykencha'a m'a katnaha nak énámakkok, meykexho aqsok sesexnenagko;

⁵³ yetlo ahaqta'ák eyaqxegkessók máxek, keñe apchápeykekxo meteymog ma'a átog.

⁵⁴ Eyapmeyk ko'o m'a yegmen, keñe ektéma ewáxok se'e: “Mammehek teyp.”

⁵⁵ Wesse', ekwóneykha ko'o exchep ma'a kañók agko' nak máxek:

⁵⁶ apháxenmok axta nahan sekpeywa, yahamok axta seyátegmowágko sélmaxnagko.

⁵⁷ Ey'awekteyk axta exchep ma'a sekwóneyncha'a axta, keñe aptáha seyáneya s'e: “Nágkatneykha aqsa apwáxok.”

⁵⁸ Wesse', epasmomchek axta exchep, megyahayók watsapok.

⁵⁹ Wesse', apweteyak xép megkapéwomo nak sélteméssessamakxa, ¡hélánekxés amya'a!

⁶⁰ Apweteyak xép ekmanyehe eyaqmagkásekxak kélteméssesakxa m'a, tén han apmáheyókxa nak hetnéssesek.

⁶¹ Wesse', yeyxho ektémakxa sélenmexeykha, tén han ekyókxoho kélláneykekxa kéltáhakxa ekmáheyókxa hélteméssesek;

⁶² tén han apkelpaqméteykha naqsa m'a sélenmexma, sexéneykha nak chá'a yókxoho ekhem.

⁶³ ¡Elano, ekyókxoho ektémakxa nak chá'a aqsok apkelánéyak, ko'o aqsa chá'a hey'ássók!

⁶⁴ Wesse', etnésses ekpayhawo nak etnéssesek, egkés ma'a éltémókxa nak egkések ma'a aqsok apkelánéyak.

⁶⁵ Etnésses meyke apkelya'áseykegkoho, ellegássesagkoho.

⁶⁶ Wesse', emenxen yetlo aplo, ¡emasséssem keso nélwanmégkaxa nak!