Lamentaciones 2 - Biblia Enxet

Ektáhakxa ánet senlapwayam

¹ ¡Aplómo apagko' axta keñamak Wesse' egegkok apcháhakkassama ekyáqtésso exma m'a Sión ektaqmalma! Apyenyenteyk náxop ektémakxa nak ektaqmalma m'a Israel, eñama néten; megkaxénak apwáxok aplawa m'a apnegkenmakxa nak chá'a apmagkok.

² Megyeykmok xama enxoho Wesse' egegkok ma'a tegma nak Jacob; apmasséssekmek axta aplawa m'a tegma apkelyennaqte aphéyak nak Judá aptaqmalma; apyaqnegkessek axta náxop ma'a apchókxa', apkelmegqássek axta apkelwesse'e agkok.

³ Xama axta aplawa, apmasséssekmek axta ekyókxoho ektémakxa ekha ekyennaqte m'a Israel. Egyementamákxeyk sempasmo apmopwána sẽlenmexa m'a nélenmexma; ¡apwatneyk táxa m'a nepyeseksa énxet'ák Jacob, kelwatneyk ekyókxoho aqsok ekhéyak nak neyáwa'!

⁴ Máxa nénmexma aptáhak Wesse' egegkok apkeykesa axát'ák yágke, apyennaqtéssek apaktog apkeykesa; apmasséssekmek ma'a ekleklamo axta chá'a egwáxok anlano', máxa m'a nénmexmal'a; máxa táxa entáhak apyenyeynto aplo m'a neyseksa nak Sión ektaqmalma.

⁵ Máxa katnaha egmók aptáhak Wesse' egegkok: apmasséssekmók apagko' ma'a Israel; apkelyaqnegkásegkek ma'a apyókxoho tegma apkelyawe agkok, tén han ma'a tegma apkelyennaqte, apcha'ak meyke néxa apkellegeykegkoho ekyentaxno apkelwáxok ma'a Judá, tén han apkellekxagweykha.

⁶ Máxa apmenyexma aptáhak megyessákxo aptawásencha'a m'a tegma appagkanamap apagkok; apmasséssekmek ma'a kélpeykessamókxa nak chá'a. Apmasséssekmek Wesse' egegkok élánamáxche nak chá'a kélessawássessamo m'a Sión, tén han ma'a sábado. Aplo keñamak aptaqnawaya m'a wesse' apwányam tén han ma'a apkelmaxnéssesso nak chá'a énxet'ák apagkok.

⁷ Aptaqnókek Wesse' egegkok ma'a ekwatnamáxchexa nak chá'a aqsok, apyenyókek ma'a tegma appagkanamap apagkok; apméssek yaqwayam elyaqnegkesagkok apkelenmexma m'a kélhaxtegkesso ekmasma nak chá'a tegma apwányam. ¡Legáxcheyk kélwehéseykha m'a Wesse' egegkok nak tegma appagkanamap apagkok, ektémól'a kañexchek kélwehéseykha kélessawássessamo!

⁸ Apxeyenmeyk axta Wesse' egegkok elyaqnegkesek ma'a kélhaxtegkesso nak Sión. Apkelyetsátegkek axta yaqwánxa emasséssók, apkelanak axta han meyke apkelwátesseyam. Apkelyaqnegkásegkek axta m'a nápakhaw'ék tegma tén han ma'a kélhaxtegkesso, apkellapwagkásegko axta aptémól'a énxet, apheyásawók axta mók apkelyaqnegkesso.

⁹ Meyke atña'ák táhak ma'a tegma apyawe méko han ma'a kélápeykekxexa nak chá'a: ¡náxop kélchexeyk kélekkexákxo! Kélchexakhagwokmek nepyeseksa énxet'ák melya'áseyak nak Dios ma'a wesse' apwányam tén han ma'a kelwesse'e apagkok; massegwokmek kaxwók ma'a Dios segánamakxa apagkok. ¡Massegwokmek nahan apxekmóssamo chá'a aqsok Wesse' egegkok ma'a apkellegasso nak appeywa, yaqwayam enxoho ellegaksek énxet'ák!

¹⁰ Apkelwanmeyágkek aqsa apheyncha'a náxop ma'a apkelámha apmonye'e nak Sión, apkelexpaqha'ak chá'a apqatkok xapop, apkelántaxneykxeyk han apáwa sẽlwáxaqxamo nak. Kelháxahágkek ekwokmoho éltekxeya naqta'a xapop ma'a kelán'a étkók nak Jerusalén.

¹¹ Kelyélaqtéssek ahaqta'ák sekwóno, eklegágkok ekyentaxno agko' ewáxok; yelqáxcheyk ewáxok sekwet'a kélmasséssekmo tegma apwányam apagkok nak énxet'ák ahagkok, tén han sekwet'a apkeletsapa meyk ámay ma'a sakcha'a ekweykekxoho m'a melyamasma nak neme.

¹² Aptáhak chá'a sakcha'a apkeláneya chána s'e: “¡Méko kaxwók nento tén han vino!” Apkelyaqnenágkek han ma'a ámay nak tegma apwányam, máxa aptekyawa aptáhak, kelántaxneykxeyk apkelennama neyseksa élpatheteykha chána.

¹³ ¿Yaqsa ko'o ewanchek axnésho essenhan eytchásekxohok xeye' Jerusalén ektaqmalma? ¿Yaqsa ewanchek eytchásekxohok yaqwayam ataqmelchessásekxak awáxok xeye' Sión ektaqmalma meyke nak kélteméssesseykmoho exma'? Awanhók agko' ektémakxa kélmassésseyam, máxa m'a wátsam ekwányam; ¿yaqsa awanchek kataqmelchessók?

¹⁴ Wanchek amya'a m'a aptémakxa nak chá'a apkeltennasso aqsok apkelwete m'a apkelánémap axta chá'a etnahagkok apkellegasso Dios appeywa. Meltennassók ekmasagko ektémakxa yaqwayam enxoho eyaqmagkassesek ma'a ektémakxa nak; apkeltennáseykha chá'a m'a aqsok apkelwete ekmowána amya'a nak, naqsók han chá'a teméssessók.

¹⁵ Eltekpogmakha chá'a apmék yesmaksek elwetak ma'a apkelyeykhágwayam nak chá'a; elmóheykha chá'a elyeykesha apqatkok ey'ássók, etnehek chá'a elxének ma'a Jerusalén ektaqmalma nak: “Keyaxa ekxénamaxko nak chá'a ektaqmalma agko' keso náxop, élpeykessáseykekxoho nak chá'a apkelwáxok énxet'ák”.

¹⁶ Elpaqmétek chá'a etaqnók xeye' m'a apyókxoho katnaha nak námakkok. Etnehek chá'a exének neyseksa apkelmóheykha tén han apkelyaqyeyasáseykha apmék: “Negmasséssekmók egagko'. Cháxa nélhaxanma nak katnehek xa; ¡negwet'ak kaxwo'!”

¹⁷ Appenchessek apkelane Wesse' egegkok ma'a aqsok apxeyenma axta elána'. Apmasséssekmek meyke apmopyósa apkelányo m'a nanók apxeyenma axta emasséssók, apchahayók yesmaksek ma'a élenmexma nak, apkelyennaqtéssek ma'a élenmexma nak.

¹⁸ ¡Sión ektaqmalma, kalmaxna epasmok Wesse' egegkok! ¡Koho aqsa kalpexyewenták aqtek égmenek ekhem tén han axta'a! ¡Nágkalwátessem ekwóno, nágkamasséssem aqtek égmenek!

¹⁹ Kaxnekxa néten, kalpáxamha axta'a, nágkalwátessem élpáxameykha; kaltennés ekyókxoho nápaqtók Wesse' egegkok ma'a ektémakxa nak, koho aqsa kaxog ektémól'a yegmen; kalya'ásses néten apmék yetlo ekwóneykha, kalmaxnésses yaqwayam elwetak apkelyennaqte m'a sakcha'a agkok, apkeletsapa nak ámay eñama meyke aptéyak.

²⁰ Elano Wesse' egegkok, kalchetam apwáxok méko xama énxet apteméssessama exchep xa ektéma nak. ¿Katawagkokxak enxoho sa' eykel'a chána m'a étchek melyamasma nak makham aptéyak neme? ¿Etekyewekxak enxoho sa' eykel'a nahan apkelmaxnéssesso nak Dios énxet'ák apagkok, tén han ma'a apkellegasso nak appeywa m'a tegma appagkanamap apagkok nak?

²¹ Aphágkek aphopák ámay ma'a wokma'ák tén han ma'a apkelwányam nak; aptekyókek ma'a wokma'ák, tén han kelán'a étkók, kélyetxégko chá'a sawo. ¡Apkelnapchek axta exchep ma'a aplawa axta meyke apmopyósa apkelányo!

²² Máxa keleñamak apnaqlókmo m'a aqsok segyegwakkassamo nak, ektémól'a kólya'ammok ma'a kélessawássessamo; méko axta xama enxoho eyewagko kagketaxchek ma'a aplawa axta exchep Wesse'. Apkelnapmeyk sélenmexma m'a séktegkesso axta, tén han ma'a sélxekmowáseyak axta.