Job 9 - Biblia Enxet

Job

^1-2 Ekya'ásegkók ko'o ektéma xa ektáha nak, mopwanchek exénmakha meyke aptémakxa nápaqtók Dios ma'a énxet.

³ Peyk agkok elátegmoweykpok énxet ma'a, apkelmaxneyáha agkok ekxámokma apkelmaxneyeykha m'a Dios, mopwanchek yátegmowágkok xama enxoho apkelmaxneyeykha.

⁴ Awanhók agko' ektémakxa aqsok apya'áseykegkoho m'a Dios, tén han apmopwána, ¿yaqsa awanchek kalátegmoweyxche' tén han katnessásekxak kóneg?

⁵ Méko kay'asagkohok apkelaqxegkahasa enxoho Dios ma'a egkexe; kalyaqnegkesagkok chá'a aplo.

⁶ Cha'a apyawheyáseykha chá'a xapop ma'a, tén han ma'a awhak nak.

⁷ Apkeltémo han chá'a megkatyepek ma'a ekhem, tén han meltémo chá'a elápogwátek ma'a yaw'a.

⁸ Meyke ekpasmo axta appeykessók ma'a néten, tén han apkelteyammeykencha'a m'a yegmen askok ekyawe ekyetnama nak wátsam ekwányam.

⁹ Axta han apkelane ektémakxa ekhéyak ma'a élápogwátéyak nak néten: cham'a Osa Mayor, tén han ma'a Orión, tén han ma'a Élántépeyam, keñe han ma'a yaw'a apchaqneykekxa ekpayho nak ma'a nepyeyam.

¹⁰ ¡Cha'a apkelane chá'a ekxámokma aqsok élyawe éltaqmalma m'a, aqsok magmowána nak agya'asagkoho'!

¹¹ Eyeykhágwa'ak agkok ko'o Dios, mótyehe'; hetáxñágwohok sa', may'asagkehek eyke.

¹² Apmeyk agkok xama aqsok, méko awanchek kanókasha. ¿Yaqsa awanchek kalmaxneyha aptáhakxa'?

¹³ Aplókek agkok Dios, yehémek kamaskok aplo; mékoho aptemessáseykekxak ma'a élxegexma'a nak yéwa ekwányam Rahab.

¹⁴ ¿Háxko ko'o atnehek wátegmowagkok Dios amyawaxkohok ahagko'?

¹⁵ Naqsók eykhe sekteme meyke agko' sektémakxa', mowanchek eyke wátegmowagkok; cha'a apteme segyekpelchémo ahagkok ma'a, wánxa aqsa ewanchek almaxnak heyásekhekxohok ma'a.

¹⁶ Eyáneyáha agkok ko'o yaqwayam ayentamok ma'a sẽlyekpelchémókxa nak, apwokmek agkok ma'a, megyeyxók ma'a sekpeywa.

¹⁷ Heyhak kexa éxchahayam ekyennaqte, hexámassesagkok sélyense meykexho sektáhakxa';

¹⁸ heyánchessesagkok eklo ewáxok, megyohok allókasek sénnama.

¹⁹ ¿Péya eynnaqtések ko'o émpehek ay'ókxa'? Apmeyhók apagko' eyke m'a. ¿Ayentamoya m'a sẽlyekpelchémókxa nak? ¿Yaqsa sa' kayentemegma'?

²⁰ Hexének sa' eyke ko'o seksexnánémaxche, tén han ekmaso sektémakxa, neyseksa ekpéwomo sektémakxa meyke aqsok ekmaso sélane.

²¹ Méko ko'o sektémakxa, megkeytnakhaksók eyke ewáxok; éleklágwokmek sekweynchámeykha.

²² Hawók mók ekyókxoho aqsok. Keso ektémakxa chá'a ko'o ewáxok se'e: emasséssók chá'a m'a apsexnánémap nak, tén han ma'a meyke nak aptémakxa.

²³ Apketsekkek agkok énxet meyke aptémakxa káhapwak aqsok ekmaso, yesmaksek aqsa Dios elanok ektáhakxa'.

²⁴ Apmeyáseykekxeyk Dios élmasagcha'a apkeltémakxa keso nélwanmeygkaxa', apkelpextehetchessegkek apaqta'ák ma'a segyekpelchémo nak. Háwe agkok Dios apteméssesso xa, ¿yaqsa katnehek ekteméssesso?

²⁵ Kayhek ekxega ekhem ahagkok, meyke sekwete ekpayheykekxa ewáxok.

²⁶ Máxa yántakpayhe ekyennaqte ekxega temék, máxa m'a náta ekyawel'a kathánek ekyógkexma'.

²⁷ Éltamhók agkok ko'o hélwánaqmak ma'a seklegeykegkoho, máxa atnehek ma'a ekpayheykekxal'a ewáxok,

²⁸ keñe hégwakkásekxak makham ma'a ekyókxoho seklegeykegkoho, hakte ekya'ásegkók ko'o apya'ásseykmo Dios sekteme meyke sektémakxa.

²⁹ Exeyenmeyk agkok ko'o sektáha seksexnánémáxche', kaqhok awasqápekxoho'.

³⁰ Megkeyxek sélyenyesso ko'o emék keltexnéyak, tén han alchektek ma'a meteymog nekha',

³¹ heweykesagkok sa' ko'o Dios ma'a neyseksa yelpa', kawomhok sa' nahan setaqnagko hélanok ma'a sélnaqta nak.

³² Mowanchek ko'o alátegmoweyxchek ma'a Dios, sekteméssessamól'a énxet xamo' nak, mowanchek nahan atnehek wának se'e: “Nók, ólmahagkok egqánet ma'a sẽlyekpelchémokxa nak.”

³³ ¡Tásek axta eykhel'a exek negyeseksa negko'o xama segyekpelchémo, yaqwayam enxoho hẽlyekpelkohok negko'o s'e egqánet nak,

³⁴ yaqwayam enxoho enókasha Dios elwataksek señassáseykegkoho, keñe han elwataksek seyánchessáseykegkoho sélmenaye!

³⁵ Keñe axta ko'o alpaqhetchesaxkohok yetlo meyke seyeye, hakte magwanagkók ko'o keytnak aqsok magwaqhémo.